UPOSTOLO Paulu wa sonehela olondaka evi Akristão va kala ko Roma kunyamo wa 56 K.K. Embimbiliya ka lilombolola nda Paulu wa endele ko Espanya ale sio. Pole, lelikolisilo lia Paulu ale liolomisionariu vikuavo Akristão, esapulo liwa Liondaka ya Suku, lia pitĩla ko Espanya kocita cavali K.K.

Noke yotembo yimue, etendelo Liakristão lia fetika oku livokiya kuenje lia lisanduila kolonepa viosi vio Espanya. Omo liaco, ca sukilile okuti omanu vaco va kuata Embimbiliya lia pongoluiwa kelimi lio Latin. Omo okuti kocita cavali ofeka yo Espanya ya vialiwile lo Roma, elimi lio Latin olio lia enda oku vanguiwa lomanu valua.

Akristão vatete kofeka yo Espanya va pongoluila Ambimbiliya alua kelimi lio Latin ana eya oku kũlĩhiwa hati, Vetus Latina Hispana. Ambimbiliya aco kelimi lio Latin, a kala anyamo alua ko Espanya osimbu Jerônimo ka mãlele oku soneha elivulu liaye lina lieya oku tukuiwa hati, Vulgata Latina kocita catãlo K.K.

Embimbiliya lia Jerônimo lina a—malusuila oku pongoluila ko Beteleme ko Palestina—lia pitĩla lonjanga ko Espanya. Eci Lucinius umue wa enda oku lilongisa Embimbiliya a limbuka okuti Jerônimo o kasi oku pongoluila Embimbiliya kelimi lio Latin, wa yonguile oku kuata lonjanga Embimbiliya liaco lio kaliye. Eye wa tuma a sonehi epandu ko Beteleme oco va ka sonehe ulandu waco kuenda oku u nena ko Espanya. Vokuenda kuotembo, o Vulgata ya piñanya o Vetus Latina Hispana. Ambimbiliya aco kelimi lio Latin a kuatisa omanu vo ko Espanya oku tanga Embimbiliya loku kuata elomboloko liesapulo lialio. Pole, eci Uviali wo Roma wa lunduiwa, kua moleha alimi akuavo.

Kocita catãlo, epata limue liomanu li tukuwa hati, Visigodos kuenda apata akuavo o ko Alemanya—a ilukila—ko Espanya kuenje vofeka mueya elimi liokaliye li tukuwa hati Gótica. Omanu va kala vetavo li tukuiwa hati—Arianismo ka va tavele kelongiso lia Suku umosi muvatatu. Ovo va nenavo Embimbiliya liavo li tukuiwa hati: Gótica de Ulfilas. Embimbiliya liaco lia tangiwa lomanu vo ko Espanya toke kesulilo liocita cepandu, eci Recaredo, soma ya va Visigodos, a ñila ketavo Liokatolika kuenje wa siapo etavo lio Arianismo. Eye wa nyõla alivulu osi a kuatele a sonehiwile kelimi lio Arian oku kongelamo Embimbiliya lio Ulfilas. Omo liaco, vofeka yo Espanya ka mua kaile vali alivulu a sonehiwile kelimi lio Gótica.

Ndaño lovitangi viaco, Ondaka ya Suku ya amamako oku lisanduila vo Espanya. Pole, omanu ka va vangowaile lika o Gótica, momo kolonepa vialua vio Espanya omanu va enda oku vangula elimi likuavo lio Latin, kuna kua tunda alimi alua o ko Roma a vanguiwa lomanu vo kocifuka co Ibéria. * Alivulu amue osimbu a sonehiwa kelimi lio Latin, a enda oku tukuiwa hati Ardósias visigótica, momo a sonehiwile vovipa. Alivulu aco a sonehiwa oku upisa kocita cepandu kuenda kocita cepanduvali, mu sangiwa olonepa  vimue Violosamo kuenda Viavanjeliu. Vocipa cimue mua sonehiwa ocipama cosi 16 Cosamo.

Oku sonehiwa Kuambimbiliya aco vovipa, kua ecelela okuti ci kale vana va lilongisa calua kuenda vana ka va lilongisile calua, va pondola oku tanga kuenda oku kopiyala Ondaka ya Suku. Citava okuti alongisi va enda oku kuama Ambimbiliya aco poku longisa olondonge viavo oku tanga kuenda oku soneha. Ovipa viaco vioku soneha via lelukile calua oku vi landa momo via litepele la vina via tĩlile calua va mosteiros medieval va enda oku soneha Ambimbiliya avo a kuete oviluvialuvia.

Embimbiliya limue ka lia tĩlile oku li landa, lia sangiwile vonembele yo San Isidoro yo ko León, Espanya. Olio lia sonehiwa kunyamo wo 960 K.K., kuenda li kuete 516 kamẽla, a kuete 47 kolosentimetulu vusovĩ kuenda 34 kolosentimetulu voku sanjavala kuenda li lema 18 kolokilu. Embimbiliya likuavo li tukuiwa hati, Bíblia de Ripoll, okuti cilo li sangiwa vociseleko calivulu ko Vaticano, lia sonehiwa 1020 K.K. Pokati Kambimbiliya osi a sonehiwa kotembo yaco, eli olio li kuete oviluvialuvia vialua. Oco ku lingiwe upange waco woku soneha oviluvialuvia, omunu wa sukilile oku pita eteke liosi oku soneha olondaka via tete ale oku pita osemana yosi oku soneha emẽla lia tete. Ndaño okuti, Ambimbiliya aco a posokele, pole, ka a kuatisile koku sandeka esapulo Liondaka ya Suku komanu.

Vokuenda kuocita cecelãla, vofeka yo Espanya mua moleha elimi likuavo eci va musulumanu veya vofeka. Kolonepa vina via vialiwile la va musulumano, o Arabe ya piñanya o Latin kuenje ca sukila oku pongoluila Embimbiliya kelimi lio kaliye.

Ambimbiliya alua a pongoluiwa kelimi lio Arabe—capiãla enene Avanjeliu—a li sanduila ko Espanya medieval. Kocita ceceya, bisipu umue o tukuiwa hati, John, wo ko Sevilha wa pongoluila Embimbiliya liosi kelimi lio Arabe. Ci sumuisa omo okuti, onepa yalua yalivulu a pongoluiwa kelimi lio Arabe a nyẽlela. Avanjeliu amue apongoluiwa kelimi lio Arabe, kocita cekũi lia selekiwa vonembele yo ko León, ko Espanya.

Vokuenda kuotembo yaco, o Castilhano, ale o , ya fetika oku lisanduila Vocifuka co Ibérica. Elimi eli liokaliye lia kuata esilivilo koku sandeka Ondaka ya Suku. * Kocita 13, ko La Fazienda de Ultra Mar, kua sangiwa Embimbiliya limue liosimbu lia sonehiwa kelimi lio Espanyole. Velivulu liaco mua sangiwa ulandu watiamẽla kungende woku enda ko Isareli kuenda ovipama vimue vio Pentateuco lalivulu akuavo Ovisonehua vio Heveru kuenda Avanjeliu Lovikanda.

Asongui vetavo ka va sanjukilile upange woku pongoluila Embimbiliya kalimi akuavo. Kuenje kunyamo wo 1234, ohongole yovitunda viatavo ya lingiwa ko Tarragona, ya handeleka okuti Ambimbiliya osi a pongoluiwa kalimi ofeka, a eciwe kovitunda oco a timĩhiwe. Pole, ocihandeleko caco ka ca tẽlele oku tateka upange woku pongolola Embimbiliya. Soma Alfonso X (1252-1284) una wa tendiwile okuti eye wa fetika uloño woku soneha elimi lio Espanyole, wa yonguile okuti Embimbiliya li pongoluiwa kelimi liokaliye kuenje wa kuatisa kupange waco. Alivulu a pongoluiwa kelimi lio Espanyole vokuenda kuotembo yaco, mua kongelele Embimbiliya li tukuwa hati, Pré-Afonsina, lina lia pongoluiwa vali enene kotembo yaco. Noke kua moleha Embimbiliya likuavo li tukuiwa hati, Afonsina.

Alivulu ava a kuatisa koku sandeka elimi liokaliye lio Espanyole. Catiamẽla Kembimbiliya lio Pré-Afonsina, ulume umue o tukuiwa hati, Thomas Montgomery wa popia hati: “Omunu wa pongolola Embimbiliya eli wa linga upange umue u komohisa momo va kuama upopi umue wa suapo. . . . Upopi waco wa leluka kuenda wa kuatisa omanu vana ka va kũlĩhile ciwa elimi lio Latin.”

Ambimbiliya aco atete kelimi lio Espanyole, ka va a pongoluile oku upisa kalimi atete, pole a pongoluiwa oku upisa ko Vulgata Latina. Oku upisa kocita 14, asonehi vamue va Yudea va pongoluila alivulu alua kelimi lio Espanyole Ovisonehua vio Helasi oku upisa kelimi lio Heveru. Kotembo yaco, ko Espanya kua kala omanu valua va Yudea vocifuka co Europa, kuenda vakuakupongolola Embimbiliya va kuatele oviña viwa kelimi lio Heveru vina via va kuatisa oku linga ciwa upange wavo woku pongolola. *

Umue pokati kulandu u komohisa, Embimbiliya li tukuiwa hati, Biblia de Alba, lina lia malusuiwa oku sonehiwa kocita 15. Ulume umue wa kemãla kofeka yo Espanya o tukuiwa hati, Luis de Guzmán, wa tuma Ulongisi Moisés Arragel oco a pongoluile Embimbiliya kelimi lio castizo (Espanhol puro). Eye wa lombolola asunga avali lieci ca sukilile oku soneha Embimbiliya liokaliye. Catete wa popia hati: “Koloneke vilo Ambimbiliya ana a sonehiwa kelimi lio Românica, ka a kuete upopi wa suapo.” Cavali ceci okuti: “Omanu vana va lisoka letu va sukila vali enene atosi a lombolola olonepa vina okuti ka ca lelukile oku kuata elomboloko.” Epingilo liaye li lekisa okuti kotembo yaco omanu va kuatele onjongole yoku tanga kuenda oku kuata elomboloko Liembimbiliya. Lia lekisavo okuti Embimbiliya lia pongoluiwa kelimi liofeka lia sandekiwile ale ko Espanya.

 Omo liekuatiso lia va kuakupongolola ko medieval kuenda vakuavisonehua, omanu vo ko Espanya vana va lilongisa calua va ponduile oku tanga ciwa Embimbiliya kelimi liavo muẽle. Omo liaco, Juan Orts González wa limbuka okuti “Osimbu Luther ka kaleko handi omanu vo ko Espanya va kũlĩhile ciwa Embimbiliya, okuti omanu vo ko Alemanya ale vo ko Inglaterra ci sule.

Kesulilo liocita 15, kofeka yo Espanya kua tumbikiwa ocihandeleko ca kisikile okuti ka citava oku pongoluila Embimbiliya kalimi ofeka ale oku kuata Ovisonehua viaco. Omo liaco, Embimbiliya lia tatekiwa vokuenda kuotembo yalua ko Espanya. Noke yoku pita ci soka ovita vitatu kanyamo va liwekapo lelambalalo liaco. Vokuenda kuotembo yaco ya tĩla, omanu vamue vakuotõi va sandeka Ambimbiliya okaliye kelimi lio Espanyole kuenje va a nena vuyombeki ko Espanya. *

Ulandu owu Wembimbiliya ko Espanya medieval, u lekisa okuti, vana va yonguile oku nyõla Ondaka ya Suku va ci linga volonjila via litepa. Ndaño lelikolisilo liaco, ovo ka va tẽlele oku nyola ondaka Yukuonenewosi.—Osamo 83:1; 94:20.

Omo lielikolisilo lia sonehi vaco, ca ecelela okuti Embimbiliya li lisanduila kolonepa viosi ko Espanya medieval. Koloneke vilo valua va kuakupongoluila Embimbiliya kalimi akuavo, va siata oku kuama ongangu ya vana va pongoluila Ovisonehua kelimi lio Latin, Gótica, Arabe, kuenda ko Espanyole. Omo liaco, omanu valua koloneke vilo vana va vangula elimi lio Espanyole, va pondola oku tanga Ondaka ya Suku kelimi li vetiya utima wavo.