Nda citiwila ocipepi lo Bilbao konano yo Espanya. Nda kala omõla wavali pokati komãla vakuãla. Epata lietu lia tiamẽlele ketavo lio Katolika kuenda oloneke viosi nda endaile Komisa. Eci nda kuata 23 kanyamo nda linga ulongisi wetavo kuenda nda solele calua upange waco una nda linga vokuenda kueci ci soka 40 kanyamo. Pokati kovina viosi, nda solele calua oku longisa ovina vietavo lio Katolika kuenda kovoteke nda enda oku talavaya nda ndiangonisa oku longisa omãla vafeko va yongola oku linga o komunyãu yavo yatete.

Noke yoku pita 12 kanyamo tunde eci tua kuela, ulume wange wa fa kuenje nda siala locikele coku tekula omãla vakuãla vafeko. Otembo yaco nda kuata 33 kanyamo! Nda seteka oku sanda elembeleko kalongiso etavo liange lio Katolika, pole nda kuata apulilo alua. Nda enda oku li pula ndoco: ‘Momo lie omanu va fila, nda Kristu wa tu yovola? Momo lie vohutililo tu pingila hati Usoma wa Suku wiye, nda omanu olondingesunga vienda kilu?’ Handi vali nda simaile ndoco: ‘Nda eci tu fa tu sombisiwa la Suku, momo lie noke tu sukilila oku tunda kilu, vopurgatoriu, ale vifelu oco tu pite vesombiso lia sulako?’

Nda linga apulilo aco kolopatele vimue nda lisanga lavio. Umue pokati kavo wa tambulula hati: “Sia ci kũlĩhĩle. Ka pulise bisipu. Momo lie o lingila epulilo eli? Ove hẽ ku tava okuti kuli Suku? Ku ka lisakalaise lovina viaco!” Pole nda amamako oku sandiliya atambululo. Noke nda endele koku yevelela ohundo yimue ya lingiwa locisoko cimue covitunda vio Jesuitas, va Pendekostale kuenda ocisoko comanu vana va tatãla ekalo lia Suku. Pole, lomue pokati kavo wa tambulula apulilo ange.

Eci nda kuata 60 kanyamo, kafeko umue o kuete epanduvali kanyamo wa ndi laleka oku enda kohongele Yolombangi Via Yehova. Nda sola calua ovina nda mola levi nda yeva, pole omo liupange wange walua, sia kuatele vali otembo yoku lisanga Lolombangi Via Yehova. Noke yanyamo avali, ulume umue o tukuiwa hati Juan lukãi waye Maite okuti Olombangi Via Yehova, va totola kepito liange.  Vokuenda kuolosãi vitatu, va tambulula apulilo ange kuenje nda fetika oku lilongisa Embimbiliya.

Nda solele calua elilongiso liaco! Nda enda oku konomuisa ovina viaco Vambimbiliya atatu oco ndi kũlĩhĩse nda Olombangi Via Yehova vi longisa muẽle ocili. Noke nda limbuka okuti ovina viosi nda lilongisa vokuenda kuanyamo alua vetavo liange, viesanda. Eci nda limbuka etepiso lia kala pokati kovina nda lilongisa ketavo liange levi nda kala oku li longisa Vembimbiliya, ca ndi sumuisile calua. Nda li yeva ndu okuti ovina nda li longisa kosimbu vina via kala ndolombombo via enda ondongosi, via kala oku tukũiwa.

Noke ulume wange wavali wa vela calua kuenje, wa fa. Kunyamo waco, nda siapo upange omo lioku kuka, kuenje nda tunda volupale luo Bilbao vokuenda kuotembo yimue. Juan lukãi waye Maite va ilukilavo volupale lukuavo. Omo liaco nda liwekapo oku li longisa Embimbiliya. Ndaño nda liwekelepo oku li longisa, pole nda kũlĩhĩle okuti nda sanga ukuasi umue. Nda enda oku sokolola calua ovina viaco.

Noke lioku pita 20 kanyamo okuti otembo yaco ndi kuete 82 kanyamo, Juan la Maite va tiuka ko Bilbao kuenje veya oku ndi nyula. Nda kuata esanju lialua eci nda va mola! Nda limbuka okuti Yehova ka njivalele kuenje nda fetika vali oku li longisa Embimbiliya. Juan la Maite va lekisa epandi lialua, momo olonjanja vimue nda enda oku pitulula apulilo amuamue. Nda sukilile oku yevelela ovolandu alua Embimbiliya oco ndi ivaleko ovina viesanda nda lilongisa kosimbu. Handi vali, nda yonguilevo oku kuata elomboloko lia suapo liocili Cembimbiliya oco ndi sapuileko akamba vange lepata.

Eci nda kuata 87 kanyamo nda papatisiwa kuenje lia kala epuluvi limue liesanju komuenyo wange. Nda papatisiwa kohongele yimbo Yolombangi Via Yehova. Ukulu umue wekongelo wa linga ohundo ya tiamisiwila kokuetu tua kala oku lavoka oku papatisiwa. Noke yoku yevelela ohundo nda lila. Ca kala ndu okuti Yehova o kasi oku vangula lame. Noke yoku papatisiwa, Olombangi vialua via Yehova vieya oku ndi lama lesanju ndaño vamue pokati kavo sia va kũlĩhile!

Nda kũlĩhile okuti Yesu Kristu eye “onjila.” (Yoano 14:6) Pole, elilongiso liange Liembimbiliya lia ñuatisa oku kũlĩha Yehova, una Yesu a tu songuila kokuaye. Kaliye ndi pondola oku likutilila ku Suku nda isia yange haye ekamba liange ukuacisola. Eci nda tanga elivulu losapi hati, Kuata Ukamba Wocili la Yehova, * nda kuata esanju lialua. Onjanja yatete nda li tanga vokuenda kuteke umosi! Ulandu nda tanga watiamẽla kohenda ya Yehova wa ndi lembeleka calua.

Eci ndi sokolola otembo nda pita loku sandiliya efendelo liocili, ndi ivaluka olondaka via Yesu viokuti: “ Pingi, kuenje cu wihiwi, vanji, kuenje vu sanga; totoli, kuenje liu yikuluilua.” (Mateo 7:7) Cilo, omo okuti nda sanga atambululo nda sandiliya vokuenda kuotembo yalua, ñuete esanju lioku sapuilako vakuetu.

Ndaño ñuete 90 kanyamo, handi ndi kuete ovina vialua vioku li longisa viatiamẽla ku Yehova. Eci ngenda kolohongele Vonjango Yusoma, ndi yeva esanju lialua omo liukũlĩhĩso ndi ka tambula kuenda ukamba ndi ka kuata la vamanji. Ndi lavoka oku ka kala vali ulongisi Voluali Luokaliye palo posi. (Esituluilo 21:3, 4) Ñuetevo elavoko lioku ka mola vali vangandiange va ka pinduiwa kuenda oku va longisa ocili Cembimbiliya. (Ovilinga 24:15) Ndi lavoka oku va lomboluila ombanjaile Yehova a nyiha kotembo yange yoku kuka!