Embimbiliya lia litepa lalivulu akuavo a sangiwa voluali. Momo lie? Momo ca leluka oku li limbuka. Vembimbiliya mu sangiwa ovolandu ocili atiamẽla komanu va kala muẽle komuenyo, ukamba wavo lavakuavo kuenda la Suku. Ovolandu aco a tu longisa ovina viwa, ci tava oku a pongoluila kalimi alua kuenda omanu va sangiwa kolonepa viosi va pondola oku kuata elomboloko liulandu waco. Olonumbi Viembimbiliya vi kuatisa calua.

Ocina ca velapo ceci okuti, Embimbiliya, elivulu limue okuti, ka li lombolola lika ovina viatiamẽla ku Suku, pole, lia tunda ku Suku. Olio li tukula onduko ya Suku, ekalo liaye, ocipango caye catiamẽla kongongo kuenda komanu, okuti ka ci pongoloka. Embimbiliya li lombololavo okuti tunde kosimbu omanu va siata oku likolisilako oku yula eci cĩvi leci ciwa. Olio li lekisavo okuti, voluali mue yuka ovina vialua vi nena esanju komanu. Oku tanga lutate Embimbiliya ci pamisa ekolelo kuenda ceca elavoko.

Vembimbiliya tu sangamo ovolandu okuti ka a sangiwa valivulu akuavo. Embimbiliya li tu lomboluila ocili catiamẽla ka tosi akuãimo:

• Ndomo tua lulikiwa kuenda esunga lieci tu talela ohali

• Eliangiliyo lia Suku lioku pongolola ekalo liomanu

• Ovina Yesu a tu lingila

• Elavoko liongongo kuenda liomanu

Momo lie ku tangela ovipama vikuãimo kuenda oku kũlĩhĩsa eci Embimbiliya li popia?