OSAPI YO KOÑOÑO: ANGA HẼ SUKU ONGANGALA?

Momo Lie Omanu Va Siatela Oku Popia Vati Suku Ongangala?

OVE hẽ o sima okuti epulilo li sangiwa koñoño yorevista yilo ka liwako? Vamue va sima okuti epulilo liaco lia kãla, kuenda vakuavo va sima vati, Suku hangangalako. Momo lie?

Omanu vana va puluka kovilemawe va pulisa ndoco: “Momo lie Suku a ecelela okuti ovina viaco vi pita? Anga hẽ ka kuete ocikembe letu? Ale mbi ongangala?”

Vakuavo eci va tanga Embimbiliya va sakalala. Poku sokolola ulandu wa Noha kuenda ovina viatiamẽla Ketande, va pula ndoco: ‘Momo lie Suku umue ukuacisola a pondela omanu vaco? Eci ka ci lekisa hẽ okuti ongangala?’

Anga olonjanja vimue wa siatavo oku linga apulilo aco? Ale ku tẽla oku tambulula eci omunu umue a ku pulisa nda Suku ongangala? Ndaco oco ocitangi cove, kũlĩhĩsa epulilo eli okuti, li pondola oku ku kuatisa.

MOMO LIE TUA SUVUKILA UNGANGALA?

Ca leluka oku eca etambululo liaco. Etu, tua suvuka ungangala, omo tu kuete olondunge vioku tepisa pokati keci ciwa leci cĩvi. Etu tua litepa calua lovinyama. Ululiki wetu wa tu sovola ‘lesetahãlo liaye.’ (Efetikilo 1:27) Eci ci lomboloka nye? Ci lomboloka okuti, wa tu avela uloño woku situlula ovituwa viaye, kuenda wa tu ĩha olondunge vioku tepisa pokati keci ciwa leci cĩvi. Sokolola ndoco: Nda okuti, Suku wa tu ĩha olondunge vioku tepisa pokati keci ciwa leci cĩvi, kuenda tua suvuka ungangala, Suku ka pondolavo oku ci linga?

Embimbiliya li eca uvangi waco, muna tu sanga etambululo lia Suku eci a popia hati: “Ovituwa viange vi kasi kupãla lovituwa viene, lovisimĩlo viange vi kasi kupãla lovisimĩlo viene.” (Isaya 55:9) Nda tu pisa Suku okuti ongangala, ka tu kasi hẽ oku litenda ndu okuti olondunge vietu via velapo, viaye ci sule? Omo liaco, tu sukila oku kũlĩhĩsa ovovangi alua, osimbu handi ka tua pisile Suku. Ka tu ka pisi Suku okuti ongangala, pole tu konomuisi ovina vimue vi molehela ndu okuti eye ongangala. Oco tu kuatisiwe, tu kũlĩhĩsi eci ondaka “ungangala” yi lomboloka.

Eci tu tukula omunu umue okuti ongangala, poku pisa ovituwa viaye vĩvi. Omunu ongangala yuna okuti o sanjuka eci omanu vakuavo va tala ohali, kuenda ka sumua eci omanu vaco va liyaka lovitangi. Cimuamue haico ci pita la isia una okuti nda poku pindisa omõla o sanjukila oku u lemẽha, omãla vaye vo tenda okuti ongangala. Pole, isia una o pindisa omõlaye oco o longise loku u teyuila, isia yaco uwa. Olonjanja vimue, tu pisa lonjanga ovisimĩlo viomunu umue omo ka tua kũlĩhĩle esunga liaco.

Tu konomuisi ovina vivali via siata oku vetiya omanu oku sima okuti Suku ongangala. Catete, ovilemawe via siata koloneke vilo, kuenda ovina tu tanga Vembimbiliya viatiamẽla kasombiso a Suku. Anga hẽ ovina viaco vi lekisa okuti Suku ongangala?

[Elitalatu kemẽla 3]

Utima wetu wa tekela koku lekisa ohenda kuenda tua suvuka ungangala