Embimbiliya li Pongolola Omuenyo Womanu

ULUME umue ko Eskosia nye a limbuka okuti oco ceca onima yiwa okuti upange umue wolomĩlu u sule? Nye ca kuatisa ulume umue ko Brazil oku siapo omuenyo wevĩho kuenda oku liwekapo oku sipa olodroga? Umalẽhe umue ko Eslovenia wa tẽla ndati oku liwekapo oku nyua ovinyua vi koluisa? Tanga eci omanu vaco va popia.

“Omuenyo wange wa molẽhele ndu okuti wa kala uwa.”—JOHN RICKETTS

UNYAMO WOKU CITIWA: 1958

KOFEKA A CITIWILA: ESKOSIA

ULANDU: OMUNU UKUALOMĨLU VIWA

OMUENYO WANGE KOSIMBU: Nda kulila vepata limue lia kuatele olombongo vialua. Isiange wa kala esualali liolohoka vio Grã-Bretanya, omo liaco, tua enda oku iluka calua. Ka tua kaile lika ko Eskosia, tua kalavo ko Inglaterra, ko Alemanya, ko Kenia, ko Malasia, ko Irlanda kuenda ko Kupro. Tunde eci nda kuata anyamo ecelãla, nda tangela volosikola vio Eskosia. Noke, nda tangela kosikola ya Velapo yo Cambridge, ko Inglaterra.

Eci nda kuata 20 kanyamo nda fetika upange umue wambata ecelãla kanyamo konepa yo petololiu. Nda talavaya ko Amerika yo Kombuelo, vo Afrika, kesulilo liaco vo Australia yo Kutakelo. Noke yoku ilukila ko Australia, nda sovola onjo yolomĩlu okuti, vokuenda kuotembo nda yi landisa.

Noke yoku yi landisa, nda liwekapo oku talavaya eci nda kuata 40 kanyamo. Otembo yange yepuyuko nda enda oku yi pesila koku linga ovongende. Nda linga ungende olonjanja vivali lomoto woku kũlĩha o Australia yosi. Nda kũlĩhavo onepa yalua yoluali. “Omuenyo wange wa molẽhele ndu okuti wa kala uwa.”

NDOMO EMBIMBILIYA LIA PONGOLOLA OMUENYO WANGE:Osimbu sia liwekelepo oku talavaya, nda yonguile ale oku sanga onjila yimue yoku eca olopandu ku Suku, omo liomuenyo nda kuatele. Nda fetika oku endaenda Ketavo lio Anglikana muna nda kulila. Pole, olio ka lia endaile oku longisa calua Cembimbiliya. Noke, nda lilongisa la vakuetavo liolo Mormons, pole, nda liwekapo omo okuti, ka va longisa calua Lembimbiliya.

Eteke limue, Olombangi Via Yehova via totola kepito liange. Vepuluvi liaco, nda limbuka okuti, alongiso avo osi a kunamẽla Vembimbiliya. Ocisonehua cimue va ndi lekisa, ukanda 1 Timoteo 2:3, 4. Ku popia okuti, Suku o yongola okuti, “omanu vosi va popeliwa kuenda va kuata ukũlĩhĩso wa suapo wocili.” Nda komõha calua eci va popia okuti, ka tu sukila lika oku kuata ukũlĩhĩso, pole, te ukũlĩhĩso wa suapo Wembimbiliya.

Oku lilongisa Embimbiliya Lolombangi Via Yehova, ca ndi kuatisa oku kuata ukũlĩhĩso waco wa suapo. Ndeci, nda lilongisa okuti, Suku la Yesu, ka va pangi onepa kelongiso liokuti Suku Umosi Muvatatu; ovo omanu vavali va litepa. (Yoano 14:28; 1 Va Korindo 11:3) Nda sanjuka calua omo lioku lilongisa ocili eci ca leluka. Konepa yikuavo, nda kuata onyeño omo lioku pesila otembo yalua koku seteka oku kuata elomboloko lielongiso limue ka li kuete elomboloko!

Kuenje nda fetika oku endaenda kolohongele Violombangi Via Yehova. Nda komõha calua lovituwa viwa via lekisiwako—ovo va kala “ndolosandu.” Ocisola ovo va lekisa ca ndi vetiya oku kolela okuti, nda sanga etavo liocili.—Yoano 13:35.

NDOMO NDA KUATISIWA: Noke lioku papatisiwa, nda kũlĩha ukãi umue wa posoka calua o tukuiwa okuti Diane. Eye wa kulila vetavo Liolombangi Via Yehova kuenda wa kuatele ovituwa viwa via enda oku ndi vetiya. Noke tua likuela. Ukamba kuenda ekuatiso lia Diane, via siata oku kala esumũlũho lia Yehova kokuange.

Ame la Diane tua kuata onjongole yalua yoku ilukila kuna kuli esukila lialua liakundi volondaka viwa. Kunyamo 2010, tua ilukila ko Belize, vo Amerika Sentral. Kofeka yaco tua kundila omanu va sole Suku haivo va kuete enyona lialua liukũlĩhĩso Wembimbiliya.

Ndi yevite ombembua yo vutima omo lioku sanga ocili catiamẽla ku Suku kuenda Ondaka yaye Embimbiliya. Omo okuti cilo ndukundi wotembo yosi, nda siata oku kuata esanju lioku longisa omanu valua. Ka kuli esanju likuavo lia velapo nda oku mola ndomo Embimbiliya li mioñolola omuenyo womunu umue—ndeci ca pita lame. Cilo, nda sanga onjila yiwa yoku eca olopandu ku Suku omo liomuenyo ndi kuete.

“Ovo va ndi kapeleko calua.”—MAURÍCIO ARAÚJO

UNYAMO WOKU CITIWA: 1967

KOFEKA A CITIWILA: BRAZIL

ULANDU: OMUENYO WEVĨHO

OMUENYO WANGE KOSIMBU: Nda kulila vimbo limue litito luo Avaré, voluvumba luo São Paulo. Valua va kasi vimbo liaco, va talavaya kupange woku sanda eteku.

Isiange wa fa eci nda kala handi vimo lia ina yange. Eci handi nda kala okokuenje, osimbu ina yange ka kasi konjo, nda enda oku wala ovowalo aye. Ekalo liange lia fetika oku pongoloka ndeli liakãi, omanu va fetika oku ndi tenda ndukuakulipekela la vakuavimatamata vimuamue. Noke liotembo yimue, nda fetika oku lipekela lotuakuenje tukuavo kuenda lalume.

Kesulilo liutila wange, nda enda oku sanda olombandeki ndi lipekela lavio (ci kaile alume ale akãi) kuosi va sangiwa—volo bare, volonjo viuteke ndaño muẽle kovaso yolonembele. Kocipito co volokololo nda enda oku wala ndukãi kuenda kolosikola viomiluko vio samba. Nda kũlĩhĩwile calua.

Valua pokati kakamba vange va kala vana vakuakulipekela la vakuavimatamata vimuamue, ovipuepue kuenda vakuakufenya olodroga. Vamue pokati kavo va ndi vetiya oku seteka oku fenya olodroga kuenje nda litumbikavo kocituwa caco. Pamue nda enda oku sipa vokuenda kuteke wosi. Olonjanja vimue nda enda oku pita utanya wosi lika liange loku fenya olodroga. Nda kopele calua okuti, omanu va simĩle okuti, ndi kuete o SIDA.

NDOMO EMBIMBILIYA LIA PONGOLOLA OMUENYO WANGE: Vokuenda kuotembo yaco nda kũlĩha Olombangi Via Yehova. Ovo va ndi kapeleko calua. Ocisonehua cimue va ndi tangela Va Roma 10:13, ku popia hati: “Wosi o vilikiya vonduko ya Yehova, o ka popeliwa.” Olondaka viaco via lekisa ciwa esilivilo lioku tukula onduko ya Yehova. Olonjanja vialua noke lioku sipa olodroga uteke wosi, nda enda oku yikula onjanela loku vanja kilu kuenda oku likutilila ku Yehova loku lila poku pinga ekuatiso liaye.

Eci nda mola esumuo lia ina yange omo liekalo liange lohali nda kala oku tala yi tunda koku sipa olodroga, nda nõlapo oku siapo ocituwa caco cĩvi. Noke, nda tava oku lilongisa Embimbiliya Lolombangi Via Yehova. Ovio via ndi likuminya okuti, elilongiso liaco lia laikele oku nyĩha vali ongusu yoku liwekapo oku nyua olodroga—kuenje ca eca onima yiwa!

Poku amamako oku lilongisa Embimbiliya nda limbuka okuti, nda sukilile oku linga apongoloko alua. Ocina ka ca lelukile oku ci siapo, omuenyo woku lipekela la vakuavimatamata vimuamue, omo okuti, nda ci fetika vutila. Ocina cimue ca ndi kuatisa, oku liwekapo oku kala lakamba vãvi. Nda tepa ukamba lomanu vaco kuenda nda liwekapo oku endaenda kolo bare lo volonjo viuteke.

Ka ca lelukile oku linga apongoloko aco, pole, ocina cimue ca ndi lembeleka, oku kũlĩha okuti Yehova wa ndi kapako kuenda wa kũlĩha alikolisilo nda kala oku linga oco ndi yule uyaki waco. (1 Yoano 3:19, 20) Kunyamo 2002 sia endaile vali oku lipekela la vakuavimatamata vimuamue kuenda nda papatisiwa Ndombangi ya Yehova.

NDOMO NDA KUATISIWA: Ina yange wa komõha calua lapongoloko nda linga kuenje wa fetikavo oku lilongisa Embimbiliya. Ocina ci sumuisa ceci okuti, noke eye wa kuatiwa luvei umue vowoño, pole, wamamako oku vokiya ocisola caye ku Yehova kuenda kocili Cembimbiliya.

Vanyamo ecelãla a sulako, nda siata oku longisa omanu vakuavo Embimbiliya kupange wotembo yosi. Ocili okuti, kua kala olonjanja vimue nda sukilile oku likolisilako oku tamãlala lolonjongole vĩvi. Pole, ocina ci ndi pamisa oku kũlĩha okuti, poku tamãlala lolonjongole viaco, ndi kasi oku sanjuisa calua Yehova.

Oku pamisa ukamba wange la Yehova loku ambata omuenyo u li tava lolonumbi viaye, ca siata oku vokiya esanju liekalo liange komuenyo. Cilo, ndi pondola oku popia okuti, ndulume umue o kuete esanju.

“Nda kala ndetamboli ka li yuka.” —LUKA ŠUC

UNYAMO WOKU CITIWA: 1975

KOFEKA A CITIWILA: ESLOVENIA

ULANDU: OHOLUA

OMUENYO WANGE KOSIMBU: Nda citiwila volupale luo Liubliana, vofeka yo Eslovenia. Nda kuata utila uwa toke eci nda tẽlisa anyamo akuãla. Noke isia yange wa li ponda. Kuenje ina yange wa sukilile oku talavaya calua oco a tekule omãla vavali va kala oku kula okuti, ame la kota liange.

Eci nda kuata 15 kanyamo, nda ka kaile la inakulu yange. Nda solele oku kala laye omo okuti valua pokati kakamba vange va kala vosanjala yaco. Nda kuatelevo elianjo lialua okuti eci nda kala la ina yange ci sule. Eci nda kuata 16 kanyamo, nda fetika oku tunda kesulilo liosemana lomanu va enda oku nyua ovinyua vi koluisa. Nda kulisa esinga liange, nda enda oku wala ndeci vakuesino kuenda nda fetika oku sipa.

Nda seteka oku mãha olodroga vialua, pole, nda limba kuholua omo okuti, oco nda solele calua. Kefetikilo nda enda lika oku nyua olokopo vimue viovinyu, noke liotembo yimue nda enda oku nyua ci pitahãla elitulu vepuluvi limuamue. Nda tẽlele oku liviaviaya ciwa ndaño nda kolua calua. Olonjanja vimue nda enda lika oku limbukiwa okuti nda nyua cimue ci koluisa omo lielemba. Ndaño ndoco, ka va ponduile oku kũlĩha nda nda nyua alitulu añami ovinyu ale o serveja—oku ci kongela lo vodka yalua!

Olonjanja vialua ame nda enda oku kuatisa akamba vange oku votoka noke yoku pita uteke volonjo viuteke, ndaño okuti, pokati kavo ame nda nyuapo vali. Eteke limue, nda yeva umue pokati kavo wa popia hati, ame nda kala “ndetamboli ka li yuka”—ondaka yimue yesepu kelimi lio Esloveno okuti, omunu umue o nyua calua vakuavo ci sule. Olondaka viaco via ndi sumuisa calua.

Nda fetika oku sokolola eci nda sukilile oku linga lomuenyo wange. Nda fetika oku liyeva okuti si silivila. Ca kala ndu okuti, cosi ndi linga ka ci kuete esilivilo.

NDOMO EMBIMBILIYA LIA PONGOLOLA OMUENYO WANGE: Kotembo yaco, nda limbuka okuti ekamba limue lio kosikola lia kala oku lekisa ovituwa via litepa; wonjukile vali. Nda komõha locituwa caco kuenda ndo laleka oco tu ka nyuile kumosi okafe. Eye wa ndi lomboluila okuti wa fetikile oku lilongisa Embimbiliya Lolombangi Via Yehova. Wa ndi sapuila ovina vimue eye a kala oku lilongisa okuti kokuange, viosi via kala viokaliye omo okuti, sia kulilile vetavo lalimue. Nda fetika oku endaenda kolohongele Violombangi Via Yehova loku lilongisa lavo Embimbiliya.

Oku lilongisa Embimbiliya, ca ñuatisa oku kuata elomboloko liovina vialua viocili haivio vi vetiya. Ndeci, nda lilongisa okuti, tu kasi kotembo yina Embimbiliya li tukula hati: ‘oloneke via sulako.’ (2 Timoteo 3:1-5) Nda lilongisavo okuti, ndopo Suku o ka kundula olondingaĩvi mulo vongongo kuenda o ka eca komanu vawa epuluvi lioku kala otembo ka yi pui Vocumbo Celau. (Olosamo 37:29) Nda vetiyiwa oku yelisa omuenyo wange, oco ndi kale pokati komanu vaco vawa.

Nda fetika oku sapuilako akamba vange catiamẽla kocili nda kala oku lilongisa. Valua va ndi sepula, pole, eci ca linga ndesumũlũho. Ovituwa ovo va lekisa via situlula okuti, ovo ka va kaile akamba vange vocili. Nda limbuka okuti, ocitangi cange coku nyua ovina vi koluisa, ca tundile kakamba. Ovo va enda oku pita osemana yosi okuti, ka va nyui, pole, va lavoka esulilo liosemana oco va li koluise.

Nda piñainya akamba vaco lakamba Olombangi Via Yehova. Oku kala pokati kavo, ca enda oku ndi pamisa calua omo okuti, va kala omanu va sole Yehova lutima wosi kuenda va enda oku likolisilako oku ambata omuenyo ndomo u litava lolonumbi viaye. Kamue kamue, nda tẽla oku siapo ocituwa coku nyua.

NDOMO NDA KUATISIWA: Ndi pandula calua Yehova omo okuti, si sukila vali ovinyua vi koluisa oco ndi kuate esanju. Sia kũlĩhĩle eci nda ceya oku pita lame nda nda amameleko lomuenyo waco. Pole, nda kolela okuti, cilo ñasi ciwa.

Vokuenda kuanyamo epanduvali a sulako, ndi kuete asumũlũho oku talavaya kofiliale Yolombangi Via Yehova ko Eslovenia. Oku kũlĩha Yehova loku u vumba, ca eca ocimãho komuenyo wange.