Oku Sandiliya Atambululo

Onoño yimue yi tukuiwa hati, Stan Guthrie wa popia hati: “Omanu va kuete ovisimĩlo via litepa viatiamẽla ku Yesu. Ci kale okuti tu kuete ekolelo ale sio, vosi yetu tua siata oku li pula ndoco: ‘Ulume waco helie?’”​—AUTHOR STAN GUTHRIE

OMANU va yongola oku kũlĩha ulandu watiamẽla komuenyo wa Yesu. Kua siata oku landisiwa alivulu alua a lombolola omuenyo waye. Olofilme vina vi lekisa ekalo lia Yesu, via livokiya calua. Pole, omanu handi va kuete apulilo alua atiamẽla kokuaye. Ovo va kuete ovisimĩlo via litepa viatiamẽla ku Yesu.

Kanyamo a pita, vakuavingungu viasapulo va pulisa omanu catiamẽla kepulilo eli: “Yesu wa kala helie?” Ovo va tambulula hati:

● “Citava okuti wa kala Rambei (ale ulongisi) haeye wa eca ongangu yiwa yoku lekisa ocikembe.”

● “Yesu wa kala omunu umue waño, pole, wa ambatele omuenyo uwa.”

● “Ka kuli uvangi u lekisa okuti Yesu wa kalako muẽle.”

● “Yesu wa kala Omõla a Suku, wa citiwa, noke wa fa, kuenje wa pinduiwa oco a tu yovole kakandu. Cilo o kasi lomuenyo, kuenda O keya vali voluali.”

● “Nda kolela okuti Yesu Kristu eye lika omõla a Suku, okuti wa kala vetimba kuenda vespiritu votembo yimuamue.”

● “Ulandu watiamẽla ku Yesu woku kemba omãla.”

Ocili okuti, ovisimĩlo viosi evi haviociliko. Anga hẽ kuli ono yimue ya koleliwa yeca atambululo asuapo kapulilo etu atiamẽla ku Yesu? Vakuakusandeka Utala ulo Wondavululi, va kolela okuti Embimbiliya Ondaka ya Suku, kuenda olio lika li tu sapuila ocili cosi catiamẽla ku Yesu. a​—2 Timoteo 3:⁠16.

Vocipama ci kuãimo, tu ka konomuisa atambululo Embimbiliya atiamẽla kapulilo amue omanu va siata oku linga atiamẽla ku Yesu. Eye muẽle wa popia hati, onjila yepopelo ya yulukila “wosi u kolela.” (Yoano 3:​16) Omo liaco, tu ku laleka oku konomuisa atambululo aco kuenda oku nõla nda o yongola oku lilongisa ovina vikuavo viatiamẽla ku Yesu kuenda ndomo o lekisa ekolelo kokuaye.

[Etosi pombuelo yemeẽa]