Longisa Omãla Vove

Epuluvi tu Sukila Oku Yevelela Lutate

OVE wa kũlĩha okuti nda o kasi kosikola ci kuete esilivilo oku yevelela lutate. Valua eci va kasi vohondo yelilongiso, va siata oku pekela, pole, oco o lilongise, o sukila oku yevelela lutate. Citava okuti wa siata oku enda kolohonge kuna o lilongisa Embimbiliya.

Nye o sima okuti oco ci pondola oku ku kuatisa oku yevelela lutate?— * Cimue ci pondola oku ku kuatisa, oku pekela selo. Handi vali, oku pekelapo kamue kekumbi ci kuatisavo. Tu kũlĩhĩsi eci tu lilongisa kulandu wumalẽhe umue wa kupukile ponjanela vekalasoko liuteke osimbu upostolo Paulu a kala oku linga ohundo. Tanga Vembimbiliya kelivulu Liovilinga kocipama 20, ocinimbu 7 toke 12, kuenda kũlĩhĩsa eci ca pitako.

Paulu wa kala oku nyula ekongelo liolupale luo Torasi ocipepi lokalunga. Embimbiliya li popia hati, Paulo wa “soka oku tundako hela” lowato. Omo liaco, “wa amisako ohundo yaye toke vokati kuteke.” Tu tanga ndoco: “Ponjinela pa tumala ukuenje umue, onduko yaye Eutuko. Eye wa lemiwa lotulo tua lua [osimbu] Paulu amisako ca lua ohundo yaye.” Nye ceya oku pita noke?—

Eutuko wa kupuka ponjanela oku upisa “kosapalalo yatatu.” Paulu la vakuavo va lupukilako. Eutuko wa kupukila posi kuenje wa fa! O pondola oku sokolola esumuo vosi yavo va yeva?— Embimbiliya li lombolola okuti Paulu wa kuata Eutuko kuenje wo yukamela. Noke Paulu lesanju wa popia hati: ‘Ko  ka yokoki, momo o kasi lomuenyo.’ Suku wa pindula Eutuko!

Nye tu lilongisa catiamẽla ku Suku vulandu wa Eutuko?— Catete ceci okuti, Yehova Isietu wo kilu o ka pindula ava va fa oku kongelamo amalẽhe. Yehova wa ku kapako kuenda oku sole calua okuti olonjali viove ci sule. Yesu eci a kala palo posi, wa situlula ovituwa via Isiaye, poku angata omãla kuenda oku va sumũlũisa. Eye wa pindulavo amalẽhe, oku kongelamo kafeko umue wa kuata 12 kanyamo.

Poku kũlĩha okuti Isiove wo kilu o ku sole calua o liyeva ndati?— Eci ci tu vetiya oku solavo Yehova kuenda oku pokola kondaka Yaye. Ove hẽ wa kũlĩha ndomo o lekisa ocisola Kokuaye?— Onjila yimue yoku ci linga, oku ci lekisa kolondaka vietu. Yesu wa popia hati: “Ame sole Isia.” Pole, Yesu ka popele lika okuti o sole Suku. Eye wa ci lekisavo kovilinga.

Yesu wa pokola ku Suku. Eye wa popia hati: “Ndingainga ño-o ovina viu sanjuisa.” Nda tua sanjuisavo Yehova kuenda Omõlaye Yesu, tu ka likolisilako oku yevelela lutate kapuluvi tu sukila oku ci linga.

[Etosi Pombuelo Yemẽla]

[Elomboluilo lielitalatu kemẽla 25]

TANGA VEMBIMBILIYA LIOVE

Ovilinga 20:7-12

Luka 8:49-56

Yoano 8:29; 14:31