Kuata Ukamba La Suku

‘O Kuatela Ongeva Upange Wovaka Ove’

POKU mola ndomo umue ngandietu a tala ohali kuenje o fa, ci sumuisa calua. Pole, oku limbuka okuti Ululiki wetu Yehova Suku, wa kũlĩha evalo lietu, ci tu lembeleka. Eye ndopo lunene waye o ka tumbulula omuenyo womanu va fa. Kũlĩhĩsa elavoko volondaka via Yovi via sonehiwa kelivulu lia Yovi 14:13-15.

Sokolola ciwa. Yovi ndaño wa kala ukuekolelo, wa pita lovitangi vialua, wa pesela ukuasi waye, omãla vaye vosi va fa, kuenda wa kuatiwa luvei umue ũvi. Lusuke wa vilikiya ku Suku hati: “Nda wa tavele oku mbundisa vonjembo!” (Ocinimbu 13) Yovi wa tendele Onjembo ndepuluko. Eye wa sokisa oku kala vonjembo ndukuasi wa selekiwa la Suku, muna nda a puluka kovitangi kuenda kevalo. *

Anga hẽ Yovi o ka amamako oku kala Vonjembo? Omo wa kũlĩhĩle okuti ka ka kalamo otembo yosi wa amamako oku likutilila hati: “Nda wa tavele oku nukuila eteke loku njivaluka!” Yovi wa kũlĩhĩle okuti otembo a laikele oku kala Vonjembo yitito, kuenda Yehova ko wivala. Eye wa sokisa otembo yoku talamẽla Vonjembo ndoku linga ‘upange wutolongo.’ Nda wa talamẽla oloneke viñami? Eye wa popia hati, “toke mbilikiyiwa.” (Ocinimbu 14) Eci ci lekisa oku tunda Vonjembo, ci lomboloka oku pinduiwa kolofa!

Momo lie Yovi a kuatela elavoko liokuti o ka tiuka? Momo wa kũlihile ndomo Ululiki wetu ukuacisola a tenda afendeli Vaye vakuekolelo vana va fa. Yovi wa popia hati: “Nda wa mbilikiya, lame nda nda ku kumbulula. Nda oco, ove nda wa kuatela upange wovaka ove ongeva.” (Ocinimbu 15) Yovi wa kũlĩhĩle okuti eye upange wovaka a Suku. Ukuakueca Omuenyo una wa lulika Yovi vimo lia inaye, o kuete unene woku tumbulula omuenyo waye noke yolofa.—Yovi 10:8, 9; 31:15.

Olondaka via Yovi, vi tu longisa ovina vialua viatiamẽla ku Yehova. Ndeci ca pita la Yovi, eye o kuetele ocikembe vana va tava oku songuiwa laye, haivo va limbuka okuti ovo upange wovaka aye, kuenda va soliwe la Suku. (Isaya 64:8) Yehova o tenda ekolelo liafendeli vaye ndocina ci kuete esilivilo lialua. Eye o kuatela “ongeva” omanu vosi vakuekolelo vana va fa. Onoño yimue ya kũlĩha elimi lio Heveru, wa popia ndoco: “Olondaka evi, vi lekisa onjongole ya piãla.” Ocili okuti, Yehova ka kuetele lika ongeva afendeli vaye, eye o kuetevo onjongole yoku va ĩha vali omuenyo.

Tu eca olopandu omo okuti elivulu lia Yovi— limue pokati kalivulu a sonehiwa tete Vembimbiliya— li lekisa onjongole ya Yehova yoku pindula ava va fa. * Eye o yongola okuti ove o lisanga vali lakamba vove vana va fa. Oku sokolola ulandu owu, ci kuatisa oku pandikisa levalo lioku fisa. Momo lie ku lilongisila ovina vialua viatiamẽla kocisola ca Suku, loku ecelela okuti eye o pongolola ekalo liove oco o mole oku tẽlisiwa kuocipango Caye?

[Atosi pombuelo yamẽla]