Longisa Omãla Vove

Yeremiya ka Liwekelepo

OVE HẼ, eteke limue wa yevele ale esumuo loku sokolola oku liwekapo oku linga upange umue?— a Valua va siata oku ci linga. Umalẽhe Yeremiya wa yevele esumuo. Pole, ka ecelele okuti ovina omanu va kala oku popia levi va linga viu vetiya oku siapo upange waye. Tu konomuisi ndomo Suku a solele calua Yeremiya ndaño okuti wa yonguile oku siapo upange waye.

Osimbu Yeremiya ka citiwile, Yehova Suku yocili, wo nõla oco a linge uprofeto woku lungula omanu catiamẽla kovina vĩvi va kala oku lingila Suku. Ove hẽ, wa kũlĩha eci Yeremiya a sapuila Yehova?—Eye wa popia hati: “Ame hameko, okupopia si ci tẽla momo ndimõla.”

Nye ove o sima okuti oco Yehova a tambulula Yeremiya? Eye locisola pole, lutõi wo sapuila hati: “Ku ka popie huti, Ame ndimõla, momo wenda kuava vosi hu tuma, kuenda cosi hu sapuila [oco] o popia. Ku ka va kuatele ohele.” Momo lie? Yehova wo sapuila hati: “Ame ñasi love oku ku kuatisa.”—Yeremiya 1:4-8.

Pole, ndomo tua ci popia kefetikilo, Yeremiya weya oku sumua. Momo wa enda oku sepuiwa omo lioku vumba Suku. Eye wa popia hati: “Eteke liosi nda yoliwa epembe, vosi va nondalaño.” Omo liaco, wa yonguile oku siapo upange waco. Noke wamisako hati: “Siu tukula vali. Si imbi vali owanji vonduko [ya Yehova].” Anga hẽ, Yeremiya wa liwekelepo muẽle oku linga upange waco?

Eye wa popia hati: ‘Vutima wange ondaka ya Yehova ya soka ndondalu yi taima ya yikiwila vakepa ange. Nda kava loku likandangiya oku yi sapula.’ (Yeremiya 20:7-9) Ndaño okuti olonjanja vimue Yeremiya wa enda oku kuata usumba, ocisola a kuatela Yehova co vetiya oku amamako oku linga upange waye. Kũlĩhĩsa ndomo Yeremiya a teyuiliwa omo lioku yuvula oku liwekapo.

Yehova wa sapuila Yeremiya oco a lungule omanu okuti, nda ka va pongolokele kovituwa viavo vĩvi, o Yerusalãi yi nyõliwa. Eci Yeremiya a pitiya elungulo liaco, omanu va tema kuenje va popia hati: “Omunu u wa sesamẽla  okufa.” Pole, Yeremiya wa va livondela oco va ‘pokole kondaka ya Yehova.’ Eye wa popia hati: ‘Limbuki okuti, nda vu njipa, u kasi oku pesela osonde yomunu wa pua eko, momo Yehova eye wa numa kokuene oku vu sapuili olondaka evi viosi.’ Ove hẽ, wa kũlĩha eci ceya oku pita noke?—

Embimbiliya li popia hati: “Olombuale kuenda omanu vosi va popia lovitunda kuenda lovaprofeto vati, omunu u ka sesamẽlẽle okufa, momo wa tu popela vonduko ya Yehova Suku yetu.” Omo okuti, Yeremiya ka silepo upange waye omo liusumba, Yehova wo teyuila. Kaliye tu konomuisi eci ca pita la Uriya, uprofeto ukuavo wa Yehova una wa siapo oku linga upange waye.

Embimbiliya li popia hati: ‘Uriya wa imbile owanji wocitumasuku coku pisa o Yerusalãi lolondaka ndevi via Yeremiya.’ Pole, eci Soma Yehoyakimi a ci yeva loku tema, wa kũlĩha eci Uriya a linga?—Eye wa kuata usumba, kuenje wa liwekapo oku linga ocipango ca Suku, noke wa tilila Kegito. Omo liaco, soma wa tuma asualali vaye oku u kuata kuenda oku u nena kokuaye. Eci vo nena kokuaye, wa kũlĩha eci soma o linga?—Wo ponda losipata.—Yeremiya 26:8-24.

Momo lie ove o popela okuti, Yehova wa teyuila Yeremiya, pole, ka teyuilile Uriya?—Ocili okuti, Yeremiya wa kuatelevo usumba ndeci ca pita la Uriya. Pole, Yeremiya ka liwekelepo oku vumba Yehova loku tila. Ongangu yipi ove o sima okuti oyo tu lilongisa ku Yeremiya?— Ulandu wa Yeremiya u tu longisa okuti olonjanja vimue ka ca lelukile oku linga ocipango ca Suku, pole, tu sukila oku amamako oku kolela kokuaye kuenda oku pokola kolonumbi viaye.

[Atosi pombuelo yamẽla]

[Okakasia kemẽla 25]

Apulilo:

❍ Upange upi Suku a ecele ku Yeremiya?

❍ Momo lie Yeremiya ka simĩlile oku liwekapo?

❍ Momo lie Yehova a teyuilila Yeremiya, pole, ka teyuilile Uriya?

❍ Nye ove o lilongisa kulandu wa Yeremiya?