Olondaka Viwa Kueci Ci Soka 500 Kalimi

VOKUENDA kuyaki wa pita kofeka yo Ruanda, ocimunga cimue comanu vakuakupongolola alivulu valimi akuavo, ca tila vofeka yavo loku sia ovokuasi avo. Pole, eci va tila vambata olokombutador viavo toke kocilombo comanu va tila kovaimbo avo. Momo lie vambatela olomakina viaco? Momo va yonguile oku amamako lupange wavo woku pongolola alivulu a lombolola ovina vi sangiwa Vembimbiliya velimi lio Kinyarwanda.

Ufeko umue Kombuelo yocifuka co Asia, wa enda oku talavaya lokombutador yaye oku pisa komẽle toke koñolosi, lekavo, lowuya, kuenda ekambo liolusu ya enda oku tetiwa olonjanja vialua loku tateka upange waye. Cipi ca kala ocimãho caye? Eye wa yonguile oku malusula upange waco votembo ya sokiyiwa.

Ocimunga eci comanu vakuakupongolola alivulu valimi akuavo, catiamẽla kowiñi umue u soka 2.300 komanu va lieca koku talavaya kovitumãlo vi soka 176 koluali luosi. Ovo va kuete oku pisa 20 kanyamo toke eci ci panda 90 kuenda va likolisilako oku talavaya oco va kuatise omanu oku tambula elembeleko Liembimbiliya kueci ci soka 500 kalimi.—Esituluilo 7:9.

Oku Kuatisa Omanu Vakualimi Alua

Kanyamo a sulako ndeti, upange Wolombangi via Yehova woku pongolola alivulu avo valimi akuavo, wa livokiya calua. Kunyamo wo 1985, Utala Wondavululi, wa kala oku sandekiwa kueci ci soka 23 kalimi kuenje kotembo yaco ca kala upange walua. Pole, cilo Utala Wondavululi u kasi oku pongoluiwa kueci ci soka 190 kalimi, loku sandekiwa vatendelo osi oco omanu koluali luosi va lilongise ulandu umuamue votembo yimuamue.

Kueci ci panda 50 kalimi, Utala Wondavululi owo lika u kasi oku sandekiwa otembo yosi. Momo lie? Momo ovisoko violomilu voluali, ka vi kuete lacimue ci va vetiya oku sandeka alivulu valimi akuavo ofeka. Pole, Olombangi via Yehova koluali luosi, va kasi oku kuatisa kupange waco lovokuasi avo oco Ondaka ya Suku kuenda alivulu akuavo a lombolola ovina vi sangiwa Vembimbiliya, a sandekiwe kolonepa viosi a sukiliwa.—2 Va Korindo 8:14.

Omanu va sole calua oku tanga Embimbiliya velimi liavo. Kofeka yo Nicaragua, cilo va kuete ale alivulu a sandekiwa velimi liavo lio Miskito li vanguiwa leci ci soka 200.000 komanu. Eteke limue, ukãi umue wa pinga Elivulu Liasapulo Embimbiliya a velimi lio Miskito, kuenje ocitunda cimue cetavo ca mola ndomo a tambula elivulu liaco. Eci a mola okuti elivulu liaco lia fina, wa yonguile oku litambula. Pole, ukãi ka tavele oku lieca kokuaye ndaño okuti ocitunda co likuminya oku wĩha 20 kolokilu vio kafe!

Kanyamo apita, kofeka yo Mexico kua sandekiwa alivulu alua a lombolola ovina vi sangiwa Vembimbiliya kueci ci pitahãla ekũi kalimi, oku kongelamo  elimi lio Maya, Nahuatl, kuenda Tzotzil. Vokuenda kuotembo yimue ka yi tẽla ekũi lianyamo, akongelo Olombangi via Yehova valimi ofeka yaco okuti a kala 72 oku kongelamo elimi liovindekaise, cilo a livokiya eci ci soka 1.200. Olombangi via Yehova kofeka yaco, va kasi oku waya esapulo Liembimbiliya vovitima viomanu, pole, va ecelela okuti Suku o kulisa ombuto yaco yocili condaka yaye.—1 Va Korindo 3:5-7.

Embimbiliya Limue Lia Sandekiwa Kueci ci Soka 80 Kalimi

Kanyamo a sulako ndeti, Olombangi via Yehova via siata oku likolisilako oku talavaya oco va sandeke embimbiliya Tradução do Novo Mundo das Escrituras Sagradas kueci ci soka 80 kalimi. Yipi onima yaco? Ombangi yimue ya Yehova kofeka yo Afrika do Sul, ya lombolola eci catiamẽla Kembimbiliya lia sandekiwa kelimi lio Tswana hati: “Embimbiliya eli, ocimãleho cimue ci komõhisa. Olio lika ndi kuatisa oku kuata elomboloko Liondaka ya Suku, kuenda oku yi sanjukila calua. Upopi waco wa leluka haiwo u sanjuisa calua oku u tanga.” Ulume umue kofeka yo Mosambike wa lombolola eci catiamẽla Kembimbiliya lia sandekiwa kelimi lio Tsonga hati: “Omunu ndaño o kuete alivulu osi a lombolola ovina vi sangiwa Vembimbiliya, pole, ka kuete Embimbiliya, ci kasi ndoku yeva ocikẽlu kuenda ociliakulo combela, pole, ombela yaco ka yi loki! Kaliye cilo, ombela yeya, momo tu kuete Embimbiliya Tradução do Novo Mundo kelimi lio Tsonga.”

Ocili okuti, omanu vana va kasi oku pongolola alivulu valimi akuavo loku sandeka olondaka viwa vi sangiwa Vembimbiliya, va kasi oku tẽlisa ocitumasuku cimue ca lomboluiwa kosimbu. Yesu Kristu eye wa popia ocitumasuku caco hati: “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.”—Mateo 24:14.

[Atosi pombuelo yamẽla]

[Okakasia kemẽla 31]

Omanu vamue va soka 2.300 va litumbika koku pongolola alivulu a lombolola ovina vi sangiwa Vembimbiliya kueci ci soka 500 kalimi

BENIN

ESLOVÊNIA

ETIOPIA

GRÃ-BRETANYA

[Etongolo kemẽla 31]

EMBIMBILIYA TRADUÇÃO DO NOVO MUNDO

ALIVULU AKUAVO

ATENDELO ALIMI

Lia sandekiwa liosi ale onepa yimue

80

2010

36

2000

13

1990

7

1970

1

1950

500

2010

200

1990

190

1980

165

1970

125

1960

88

1950