Nye ci Lomboloka Espiritu Sandu?

OTEMBO yimue Yesu wa pulile olondonge viaye hati: “Pokati kene isia yi pi o kasi lomõla, nda o pinga olusi o wiha onyõha, olusi haluoko? Pamue nda o pinga esaila, o wiha enyenya?” (Luka 11:11, 12) Omãla voko Galilea va solale calua oku lia asaila kuenda olõsi. Omo liaco, va nõlelepo oku pinga kolonjali viavo ovina va sukila.

Yesu wa popia hati, tu sukila oku amamako oku pinga espiritu sandu, ndeci omõla o kasi lonjala a pinga okulia. (Luka 11:9, 13) Oku kuata elomboloko liespiritu sandu, ci tu kuatisa oku kũlĩha esilivilo lialio vomuenyo wetu. Omo liaco, tu kũlĩhĩsi eci Embimbiliya li longisa catiamẽla kespiritu sandu.

‘Unene wa Tõlo’

Ovisonehua vi lombolola okuti espiritu sandu, ongusu ya Suku yina a siata oku talavaya layo poku tẽlisa ocipango caye. Eci ungelo Gabriele a sapuila Maria okuti oka cita omõla ndaño okuti ka kũlĩhĩle ulume, wa popia hati: “Espiritu sandu o ku wila, lunene wa Tõlo u ku tuvika. Oco omõla o citiwa o tukuiwa O kola, Eye Mõla a Suku.” (Luka 1:35) Olondaka viungelo Gabriele vi lekisa okuti pokati kespiritu sandu “lunene wa Tõlo,” pali elitokeko.

Ovisimĩlo viaco vi sangiwavo vovinimbu vikuavo Viembimbiliya. Uprofeto Mika wa popia hati: “Nde yuka ongusu. Ñasi lespiritu lia Yehova.” (Mika 3:8) Yesu wa likuminyile olondonge viaye hati: “Eci espiritu sandu o wili, oco vu kuata unene.” (Ovilinga 1:8) Upostolo Paulu wa lombololavo catiamẽla ‘kunene wespiritu sandu.’—Va Roma 15:13, 19.

Nye ci popiwa catiamẽla kovina tua konomuisa ndeti? Pokati kespiritu sandu kuenda unene wa Suku, pali elitokeko. Yehova wa siata oku lekisila unene waye vespiritu sandu. Omo liaco, espiritu sandu li lomboloka ongusu ya Suku. Hunenekuowo wa velapo! Ka tu pondola oku kuata elomboloko liunene wa sukiliwile poku lulika oluali. Vonduko yuprofeto Isaya, Yehova wa tu imba onumbi yoku sokolola kondaka eyi hati: “Petuili ovaso kilu, vanji; helie wa vi lulika? U o vi tundisa lumosi lumosi vohoka yavio poku vi tukula olonduko, eye wa vi lulika. Kuenje omo unene waye wa piãla longusu yaye ya lua cimue oco lalumue lu kambapo.”—Isaya 40:26.

Embimbiliya li lekisa okuti oluali kuenda ovina viosi vi kasimo, via lulikiwa ‘lunene’ ale longusu ya Suku. Ocili okuti, unene Waye walua calua kuenda ekalo lietu voluali, liatiamẽla kunene waco.—Tala vokakasia losapi hati, “Ovilinga Viespiritu Sandu.”

Yehova o pondola oku talavaya lunene waye kolonepa viosi, ndeci a linga poku lulika oluali. Pole, o pondolavo oku kuatisa  lawo omanu vaye. Vembimbiliya muli ovolandu alua a lekisa ndomo ongusu ya Suku ya siata oku kuatisa omanu vaye.

“Espiritu Lia Yehova Lia Mbuila”

Upange wa Yesu woku kunda, u lekisa ndomo espiritu sandu lia Suku li pondola oku kuatisa omanu vaye. Yesu wa sapuila omanu voko Nasara hati, “espiritu lia Yehova lia mbuila.” (Luka 4:18) Lekuatiso ‘liunene wespiritu,’ nye Yesu a linga? (Luka 4:14) Eye wa sakula ovovei osi, wa tulumula akimba okalunga, wa tekula omanu valua lolombolo vitito kuenda olosi, wa pindula ava va fa. Upostolo Petulu wa tukula Yesu hati, ‘ulume una Suku a  imbila uvangi mekonda liovonene lovikomo kuenda ovilimbu Suku a linga laye.’—Ovilinga 2:22.

Koloneke vilo, espiritu sandu ka lia siatele vali oku linga ovikomo viaco. Pole, li pondola oku tu lingila ovina vialua. Yehova wa siata oku eca espiritu sandu kafendeli vaye ndeci Yesu a likuminyile kolondonge viaye. (Luka 11:13) Omo liaco, upostolo Paulu wa popia hati: “Nela ovina viosi vu Kristu u o ñolaisa.” (Va Filipoi 4:13) Anga hẽ, espiritu sandu li pondolavo oku ku kuatisa? Ocipama ci kuãimo, cika tambulula epulilo liaco.

[Okakasia kemẽla 5]

Esunga lieci espiritu sandu hamunuko

Embimbiliya li sokisa espiritu sandu ndovava. Catiamẽla kasumũlũho Suku a likuminya komanu eye, wa popia hati: “Njitila ovava kongongo ya kukuta; mitisa olondui vekango. Sukumuĩla espiritu liange kombuto yove kuenda esumũlũho liange komãla vove.”—Isaya 44:3.

Eci Suku a eca espiritu komanu vaye, ve “yuka espiritu sandu.” Yesu, Yoano Upapatisi, Petulu, Paulu, Barnaba, kuenda olondonge vina via kala keteke lio Pendekoste kunyamo wo 33 N.K.Y., va tukuiwa okuti ‘veyuka espiritu sandu.’—Luka 1:15; 4:1; Ovilinga 4:8; 9:17; 11:22, 24; 13:9.

Kũlĩhĩsa ndoco: Anga hẽ, omunu o pondola ‘oku yuka’ omanu vakuavo? Ove hẽ, o pondola oku popia hati, omunu wa ‘yukisa’ omanu vocimunga cimue? Ondaka eyi ka yi kuete elomboloko. Embimbiliya li lombolola omanu va yukisua olondunge, ukũlĩhĩso, pole, ka li lombolola okuti omunu umue weyuka omunu ukuavo.—Etundilo 28:3; 1 Olosoma 7:14; Luka 2:40; Va Kolosai 1:9.

Kelimi lio Helasi ondaka “espiritu” yi tukuiwa hati, pneuʹma. Ondaka yaco yi lombolokavo unene umue ka u letiwe. Ndomo ca lomboluiwa lo Dicionariu Vine’s Expository Dictionary of New Testament Word, ondaka pneuʹma yi lomboloka “ofela ... efuimo, capiãla enene espiritu okuti ka li letiwe kuenda ka li kuatiwa, momo li kasi ndofela.”

Omo liaco, espiritu sandu, hamunuko. a

[Atosi pombuelo yamẽla]

[Ono Yelitalatu kemẽla 5]

Photodisc/SuperStock