Tu Sukila Oku Yovuiwa!

VOCIMA cimue cukuasi ocipepi lolupale luo Pittsburg ko Pensilvania, kofeka yo Amerika, mue yukile ovava alua. Alume ecea va sakatela vocitunu okuti koku longa ca kuatele 73 kolometulu. Pole mua kala okahondo kamue ka mua iñilile ovava. Eci pa pita oloneke vitatu alume vaco va tunda vocitunu luhayele kuenda lomue wa li lemeha. Helie wa va yovola?

Lekuatiso liomapa kuenda okamakina kamue ka tukuiwa hati Sistema de Posicionamento Global, olonjovoli via tẽla oku kũlĩhĩsa apa alume vaco va kala, kuenda va fẽla okacitunu kuenje, va iñisamo ociyenjo. Alume vaco, va naliwamo umosi umosi toke eci vosi yavo va tunda. Ovo, va sanjukile calua, kuenda va eca olopandu omo lioku yovuiwa.

Valua pokati ketu ka tua la sakatela vocitunu ndaño oku kala kohele omo liocisalu cimue ndeci ca pita lalume ava ecea. Pole vosi yetu tu sukila oku yovuiwa kovovei, koku kuka kuenda kolofa. Yovi wa soneha hati: “Omunu wa citiwa lukãi ukualoneke viñamiñami, haiye we yuka lohali. O telẽha kuenje uvuka. O tila ndulembo, ka tumãla.” (Yovi 14:​1, 2) Tunde eci olondaka viaco via tukuiwa pa pita ale 3.500 kanyamo, pole vi kasi oku amamako oku tẽlisiwa. Oco hẽ, helie pokati ketu o tẽla oku puluka kolofa? Ndaño tu kuete uhayele uwa kuenda tua siata oku tata ciwa omuenyo wetu, lopo tu sukila oku yovuiwa kohali, koku kuka kuenda kolofa.

Olonoño via siata oku seteka oku vokiya otembo komuenyo womanu. Ocisoko cimue ca popia hati ci kuete “ocimãho coku malako olofa” kuenda “ci yongola oku kuatisa omanu oco ka va ka fe vali.” Pole, ndaño luloño wa longa, olonoño ka vi tẽla oku vokiya alima komuenyo, ndeci Mose a popia, okuti omunu eci a tẽlisa 70 ale 80 kanyamo, o fa. Tunde eci a tukula olondaka viaco pa pita ale 3.500 kanyamo.​—⁠Osamo 90:⁠10.

Ci kale okuti o tava kolondaka via Yovi viatiamẽla komuenyo kuenda kolofa ale sio, ocili ceci okuti, vokuenda kuotembo, ove o ka fa, kuenje o siapo akamba, epata, onjo yove kuenda ovina vikuavo ndoku tila kulembo. Soma Salomone wa soneha hati: “Ava va kasi lomuenyo va kũliha okuti va laika oku fa, puãi ava va fa lacimue va kũlĩha, ndaño onima yimue ka va kuete vali, momo onjivaluko yavo ya nyõleha.”​—⁠Ukundi 9:⁠5.

Embimbiliya li lekisa okuti okufa “kua viala,” omanu ndeci ombiali yimue yĩvi yi viala ofeka. Omo liaco, omanu va sukila oku yovuiwa kolofa, unyali wa sulako. (Va Roma 5:14; 1 Va  Korindo 15:​26) Vana va kuete upange woku yovola omanu va pita lovisalu, ndaño va lipongiya calua, ka va tẽla oku eca komanu eyovo lia suapo. Ululiki womanu, Yehova Suku, wa linga ale esokiyo lioku tu yovola.

[Elitalatu kemẽla 3]

Ofoto ya eciwa la Gene J. Puskar-Pool/Getty Images