YEHOVA eye Suku ukuacali. (Tiago 1:17) Etu tu pondola oku limbuka ocali caye kovina viosi a lulika. Eye wa yukisa ilu lolombungululu kuenda wa yukisa ongongo lovikũla via posoka.—Osamo 65:12, 13; 147:7, 8; 148:3, 4.

Usonehi Wosamo 104 wa vetiyiwa oku pandula Yehova omo liovina viosi a lulika, kuenje wa soneha ocisungo cimue coku eca olopandu kokuaye. Anga hẽ, eci o tanga elivulu liosamo ku vetiyiwavo oku eca olopandu ndeci ukualosamo a linga? Eye wa popia hati: “Njimbila Yehova ovisungo osimbu ñasi lomuenyo. Njimbila Suku yange ovisungo viesivayo osimbu ndi fuima.” (Osamo 104:33) Anga hẽ, haico o yongola oku lingavo?

Yehova o yongola okuti tu setukula ocali caye. Kuenda eye o tu ĩha ovina vialua vi tu vetiya oku eca olopandu. Eye wa vetiya Upostolo Paulu oku soneha ndoco: “Lungula vana okuti olohuasi violuali lulo oco ka va ka lipande, okuti ka va tiamisila elavoko liavo kukuasi u pua pua, te ku Suku, una o tu ĩha ĩha ovina viosi tu sanjukila. Va sapuila okuti va linga ovina viwa, oco va linge olohuasi viovilinga viwa, vakuacali, loku kuatisa, kuenda oku lisolekela ukuasi wa sevetiwa ciwa kovaso yoloneke, okuti va kakatela komuenyo wocili.”—1 Timoteo 6:17-19.

Vukanda wavali Paulu a sonehela va Korindo, wa lombolola okuti tu sukila oku kuatisa vakuetu lutima wosi, okuti ka tu ci lingi locikukũi ale oku kisikiwa. Eye wa popia hati: “Omunu lomunu a linge ndeci a sokiya vutima waye, halocikukũiko pamue oku kisikiwa, momo Suku o sole u eca lesanju.” (2 Va Korindo 9:7) Velie tu kuatisa eci tu kala vakuacali? Paulu wa popia okuti tu kuatisa vakuetu poku va ĩha eci va sukila, pole, tu li kuatisavo etu muẽle momo Yehova o tu sumũlũisa.—2 Va Korindo 9:11-14.

Paulu wa tukula ocali ca piãla ca Suku eci a popia hati: “Pandu pandu ku Suku omo liocali caye ca piãla.” (2 Va Korindo 9:15) ‘Vocali’ ca Yehova mua kongela ovina viosi viwa eye a tu ĩha vonduko ya Yesu Kristu. Ka ci tẽliwa oku lombolola esilivilo liolombanjaile viaco viosi.

Tu lekisa ndati olopandu kovina viosi Yehova kuenda Yesu va tu lingila ale, kuenda evi va ka tu lingila kovaso yoloneke? Tu pondola oku ci linga poku eca otembo yetu, ongusu yetu, kuenda ovikuata tu kuete oco tu fendele Yehova kuenda oku kuatisa vakuetu oku lilongisa eci catiamẽla kokuaye. Vosi yetu tu pondola oku ci linga, cikale okuti tu kuete calua ale tu kuete citito.—1 Asapulo 22:14; 29:3-5; Luka 21:1-4.