Umalẽhe umue o tukuiwa hati María Isabel, o kasi volupale luo San Bernardo, vofeka yo Chile, ko Amerika do Sul, o kuete ombili yalua kupange woku kunda. Eye kumue lolonjali viaye vatiamẽla kepata lio Mapuche. Epata liaco, li kuete onjongole yoku kuatisa ekongelo liokaliye kelimi lio Mapuche, li tukuiwa hati, Mapudungun.

Eci kua lingiwa esapulo liokuti Ocipito Conjivaluko yolofa via Kristu ci ka lingiwavo vekongelo lio Mapudungun, kua pangiwa eci ci soka 2.000 kovikanda vielaleko, oco vi eciwe komanu va vangula elimi liaco. Kuenje, ca vetiya manji María Isabel, oku sokolola lutate. Nye a sukilile oku linga oco a kuatise kupange waco? Eye wa ivaluka ovolandu a vamanji vamue amalẽhe okuti, va kuata esanju poku kundila vana va tangela kosikola yimuamue, kuenda alongisi vavo. Noke, wa sapela lolonjali viaye catiamẽla kondaka yaco, kuenje, via tava okuti, manji María Isabel o sokolola ndomo a pondola oku eca ovikanda vielaleko kosikola. Esokiyo lipi a linga?

Catete, wa pinga kasongui vo kosikola nda citava oku kapa ukanda umue welaleko puvelo wosikola. Asongui vaco, va tava epingilo liaye. Eteke limue komẽle, usongui wavelapo wosikola yaco, wa linga esapulo liatiamẽla kukanda waco welaleko!

Noke, manji María Isabel wa pinga oco a nyule olondonge viosi. Noke yoku taviwa lalongisi vosi, wa pula kolondonge nda pokati kavo pali vamue va vatiamẽla kepata lio Mapuche. Kuenje, wa popia hati: “Nda simĩle okuti pokati kolondonge viaco pali lika eci ci soka 10, ale 15 vatiamẽla kepata lio Mapuche. Pole, nda limbuka okuti, kua kala olondonge vialua viatiamẽla kepata liaco. Kuenje, nda eca eci ci soka 150 kovikanda vielaleko!”

Eci ukãi umue a mola ukanda welaleko wa kapiwa puvelo wosikola, wa pula oco a sange umue a sapela laye catiamẽla kelaleko liaco. Ukãi waco wa komoha calua eci a limbuka okuti, wa tambuluiwa lumalẽhe umue o kuete lika ekũi lianyamo! Noke, manji María Isabel wa popia hati: “Ukãi waco wa simĩle okuti o tambuluiwa lukulu.” Eci manji María Isabel a eca kukãi waco ukanda welaleko, loku u lomboluila ulandu waco lonjila yimue ya leluka, wa pinga kukãi waco nda citava oku u wĩha onumbi yonjo yaye okuti, eye kumue lolonjali viaye va linga esokiyo lioku nyula ukãi waco oco va sapele laye catiamẽla Kusoma wa Suku. Cisoka 20 ya vamanji va kasi vekongelo lielimi lio Mapudungun, va komoha calua eci va limbuka okuti, ukãi waco wa nena 26 komanu vakuepata lio Mapuche okuti, veya Kocipito Conjivaluko yolofa via Yesu. Cilo ocimunga caco ca linga ekongelo!

Nda ove umalẽhe ale ukulu, momo lie ku lalekela vana u lilongisila kosikola yimuamue, ale vana o talavaya lavo kupange umuamue, oco va ende Kocipito Conjivaluko, koku yevelela ohundo yimue yowiñi, ale oku enda kohongele yofeka? Momo lie ku sandiliyila ovolandu valivulu etu a lekisa ndomo o pondola oku ci linga? Likutilila ku Yehova oco espiritu sandu liaye li ku kuatise oku lekisa utõi woku sapela lomanu catiamẽla kokuaye. (Luka 11:13) Nda wa ci linga, o kuata esanju lialua, omo lioku tẽlisa esokiyo wa linga.