KUNYAMO wa 49 K.K., Petulu la Tiago kuenda Yoano​—okuti va kala ‘olongunji viekongelo,’​—va ecele ocikele cimue ku Paulu la Barnaba. Eci va kundila olondaka viwa kolofeka vikuavo, va kapeleko Akristão vana va kala olohukũi. (Va Gal. 2:9, 10) Va tẽlisa ndati ocikele caco?

Vukanda Paulu a soneha, wa lombolola ndomo va tẽlisa ocikele caco. Eye wa sonehẽla Akristão va kala ko Korindo hati: ‘Catiamẽla kolombanjaile vioku kuatisa omanu, ene lingi ndeci nda lombolola ale kakongelo o ko Galatia. Eteke liatete kosemana, omunu lomunu a seleke ombanjaile a yongola oku eca okuti, eci ndiya, ka va vetiya vali oku kongola. Kuenje, eci ndi pitĩla, ndi tuma ko Yerusalãi ava va kuete ukanda wene wuvangi, oco va ka tuale ombanjaile yene.’​—1 Va Kor. 16:1-3.

Vukanda wavali Paulu a sonehela vamanji ko Korindo, wa tukula esilivilo lioku eca olombajaile. Ovo va ci linga ‘poku eca ekuatiso ku vakuavo.’​—2 Va Kor. 8:12-15.

Kunyamo wa 56 K.K., eci Paulu a sonehela Akristão ko Roma, vosi yavo va ecele ale olombanjaile viavo. Eye wa popia hati: ‘Cilo ngenda ko Yerusalãi oku ka kuatisa omanu. Momo vamanji ko Makedonia kuenda ko Akaia, va sima okuti, ca sunguluka oku kongola olombongo vioku kuatisa olosuke vi kasi pokati kafendeli va Suku ko Yerusalãi.’ (Va Rom. 15:25, 26) Eci Paulu a tẽlisa ocikele caye, wa tiukila ko Yerusalãi kuna a kuatiwa, kuenje, wa sapuila Felix Ombiali yo ko Roma hati: “Ndeya oku nenela ofeka yange ombango yolosuke kuenda olombanjaile.”​—Ovil. 24:17.

Ocituwa Akristão vo kocita catete va lekisa tu ci limbukila volondaka Paulu a sapuila vamanji ko Makedonia. Eye wa popia hati: ‘Va tu pinga lolupili oco va ece olombanjaile.’ Ovapostolo va vetiya vamanji ko Korindo oco vakuame ongangu yaco. Paulu wa popia hati: ‘Omunu lomunu a ece eci a yongola, pole, ha locikukũiko pamue omo a kisikiwa, momo Suku o sole u eca lesanju.’ Nye ca vetiya vamanji oku eca olombanjaile viavo? Ovo ka va ci lingile omo ‘liutima woku eca olombanjaile, momo omunu o panduiwa nda eca lutima wosi eci a kuete. Kuenda Suku ka kisika oku eca eci omunu ka kuete.’ (2 Va Kor. 8:4; 9:7, 12) Omo liaco, tu lekisi ocituwa coku eca olombanjaile. Yehova Suku, o sumũlũisa vana va kuete ocituwa coku eca olombanjaile viavo.​—Olosap. 10:22.

Ndeci ca kala kotembo yupostolo Paulu, koloneke vilo, omanu valua va siata ‘oku soleka’ olombongo vimue oco va vi kape vokasia ya sonehiwa hati: “Olombanjaile Vioku Kuatisa Kupange Woku Kunda Voluali Luosi.” (1 Va Kor. 16:2) Olosãi viosi, vamanji va sangiwa kolonepa viosi violuali, va siata oku tuma olombanjaile viavo ko Betele Yolombangi Via Yehova yi sangiwa vofeka yavo. Ci tava okuti, o ka tuala ombanjaile yove ko Betele vofeka o kasi. Oco o kũlĩhe onumbi Yolombangi Via Yehova, sapela la vamanji va talavaya ko Betele vofeka yene. Onumbi yaco, yi sangiwa vo www.isa4310.com.

CECI UTIMA WETU U TU VETIYA OKU ECA OVINA TU KUETE

Pokati Kolombangi Via Yehova, pali vamanji valua okuti, olohukũi, vakuavo va siata oku liyaka lovitangi vioku sanga olombongo. Poku eca olombanjaile vioku kuatisa kupange woku kunda Usoma, tu sukila oku yuvula ocisimĩlo cokuti, olombanjaile vietu ka vi kuete esilivilo. Eci Yesu a mõla ukãi ocimbumba haeye ohukũi wa kapa ombanjaile yaye vokasia yo vonembele, ko pembuile. Eye, wa popia hati: “Ndu sapuili siti, Ocili ocimbumba eci, haico osuke, ca imbamo calua, vosi vakuavo ci sule. Momo ava vosi kukuasi wavo wa lua, vopako ño [eci va eca], eye puãi [ndaño wa kala ohukũi, pole,] wa imbamo cosi a kala laco, haico eteku liaye.” (Luka 21:1-4) Ndaño ukãi wa tukuiwa ndeti wa eca ombanjaile yimue yitito, pole, wa yeca lutima waye wosi, momo wa eca ovina viosi a kuatele.

Vamanji vosi va sukila oku linga esokiyo lioku eca olombanjaile viavo vekongelo. Eci Akristão vo ko Yudea va sukilile ekuatiso, vamanji vo ko Korindo va eca ekuatiso liavo. Poku ci linga, va tambula onumbi yiwa kupostolo Paulu, eci a va sonehela ndoco: “Poku eca olombanjaile vioku kuatisa omanu va Suku, lingi ndeci nda lomboluila kakongelo o ko Galatia. Eteke liatete kosemana, omunu lomunu pokati kene, a seleke cimue a pondola oku eca, okuti eci ndi pitĩla, ka vu kongola vali olombongo.”​—1 Va Kor. 16:1, 2, NW.

Omanu vamue va siata oku seleka olombongo vioku tetulula ovitangi viavo. Olombangi Via Yehova via siatavo oku seleka olombongo vioku kuatisa kefendelo liocili. Omo liaco, vamanji voluali luosi, va siata oku eca olombanjaile viavo oco vi kuatise kupange woku kunda Usoma wa Suku. Olosãi viosi, omunu lomunu o pongiya olombongo a yongola oku eca. Omanu vamue okuti Halombangiko Via Yehova, va siatavo oku eca olombanjaile vioku kuatisa kupange woku kunda. Omo liaco, va sanjukila oku eca lutima wosi ovina va kuete.

Vamanji va kasi Kolofiliale, noke yoku tambula olombanjaile viaco, va siata oku tuma ovikanda violopandu kakongelo.

Ovo va sanjukila oku tambula olombanjaile vi eciwa la vamanji vakongelo oco vi kuatise kupange woku kunda olondaka viwa Viusoma wa Suku. Olombanjaile viaco, vi kuatisa olomisionaliu vi kasi kolofeka vialua, kuenda via siata oku kuatisavo koku landa olomakina vioku panga alivulu oco a tumiwe kakongelo. Handi vali, vi kuatisa olomitavaso vi nyula akongelo vovaimbo, kuenda vofeka, oco vi pamise ekolelo lia vamanji. (Va Rom. 1:11, 12) Vamanji va litumbika kupange wakundi votembo yosi, va siatavo oku kuatisiwa lolombanjaile viaco.

Kocita catete, omanu vana va enda oku eca olombanjaile viavo oco vi kuatise kefendelo liocili, va tambula asumũlũho alua, omo lioku sivaya Yehova lovina va kuete. Nda tua eca ekuatiso kupange woku kunda u kasi oku lingiwa voluali luosi koloneke vilo, tu tambulavo asumũlũho alua. Omo liaco, tu amamiko oku lekisa onjongole yoku eca lutima wosi ovina tu kuete.

Nda umue o yongola oku eca olombanjaile vioku kuatisa kupange woku kunda u kasi oku lingiwa voluali luosi, citava oku vi tuma ko: