Wa Siata Oku Eca Ndati Alungulo?

Anga hẽ onjanja yimue va ku pingile oco o lungule vakuene? Va ku lingile ale apulilo amue ndeci: ‘Nye ndi sukila oku linga, oco ndi tetulule ocitangi cange? Citava hẽ okuti, ngenda kocipito va ndi laleka? Citava hẽ oku iñila kupange owu? Ndi pondola hẽ oku linga ukamba lomunu umue ndi sole oco a linge ohueli yange?’

Eci omanu vamue va pulisa ondaka yimue, pamue va ci linga ​—lutima wa sunguluka, oco o va ĩhe olonumbi viatiamẽla kovina vimue ndeci: Kakamba, kepata, kuenda koku vumba Yehova. Pi o sukila oku sandiliya etambululo eca kokuavo? Wa siata oku eca ndati alungulo ku vakuene? Ci kale okuti apulilo va ku linga a kuete esilivilo, ale sio, Embimbiliya kelivulu Liolosapo 15:28, NW, li tu lungula ndoco: “Ondingesunga tete, yi sokolola eci yi tambulula.” Omo liaco, tu konomuisi ndomo tu kapako olonumbi vitãlo Viembimbiliya vi kuãimo, okuti vi pondola oku tu kuatisa oku eca alungulo awa ku vakuetu.

1 Limbuka Nda Ocitangi Caco Cocili.

“Nda umue o kumbulula osimbu ka yevele ciwa, wa linga uveke kuenje cu kutisa osõi.” ​—OLOSAP. 18:13.

Oco tu ece elungulo lia sunguluka komunu umue, tu sukila oku limbuka ekalo liomunu waco, kuenda ovisimĩlo viaye. Kũlĩhĩsa ocindekaise eci: Nda omunu umue wa ku vilikiya votelefone hati, o yongola oku iya konjo yove, pole, ka lete onjila yaco, nye o sukila oku linga oco u kuatise? Anga hẽ u sapuila onjila yenda konjo yove osimbu kuo pulisile pocitumãlo a kasi? Sio! Ocindekaise eci, ci tu longisa okuti, oco tu ece alungulo awa, tu sukila oku limbuka ovisimĩlo viomunu waco, kuenda ekalo liaye. Anga hẽ onumbi ndi sukila oku eca, yi pondola oku kuatisa omunu waco, ale sio? Nda ka tua kũlĩhĩle ciwa ocitangi comunu, pamue tu eca elungulo li pondola oku u yapuisa.​—Luka 6:39.

Kũlĩhĩsa Nda Omunu Waco wa Linga Ale Akonomuiso. Tu sukila oku kuatisa lutate omunu o sandiliya alungulo poku u pulisa ndoco: “Onumbi yipi Yembimbiliya o yongola oku kapako?” “Onima yipi, ale ovitangi vipi o pondola oku kuata omo lionjila wa nõla?” “Anga hẽ wa linga ale akonomuiso amue, osimbu kua pingile ekuatiso?” “Ekuatiso lipi wa tambula ku vamanji, kakulu vekongelo, kolonjali viove, kuenda ku manji o kasi oku ku longisa Embimbiliya?”

Atambululo omunu a eca, a pondola oku tu kuatisa oku limbuka ndomo a kasi oku likolisilako oco a kuatisiwe. Poku eca elungulo, tu sukila oku kũlĩhĩsa oco ka tu ka pitulule ovina via popiwa la vakuetu. Tu sukilavo oku kũlĩhĩsa nda omunu waco wa siata oku sandiliya alungulo kalongisi vana va ‘suya lika vatũi omanu.’​—2 Tim. 4:3.

  2 Yuvula Oku Tambulula Lonjanga.

“Omunu a kuate ocituwa coku yevelela lonjanga, pole, a livale koku popia.” ​—TIA. 1:19, NW.

Citava okuti, tu tambulula lonjanga omo liovisimĩlo viwa tu kuete. Anga hẽ ca sunguluka oku tambulula lonjanga osimbu ka tua konomuisile ciwa ondaka yaco? Elivulu Liolosapo 29:20, NW, li popia ndoco: “O lete omunu ukuakupopia lonjanga? Keveke kuli elavoko lia velapo, okuti, kokuaye ci sule.”

Kũlĩhĩsa lutate oco alungulo ove a likuate lolondunge via Suku. Lipula ndoco: ‘Poku eca alungulo nda siata hẽ oku lekisa ‘ovituwa violuali’? (1 Va Kor. 2:12, 13) Ivaluka okuti, ovisimĩlo viove pamue ka vi kuatisa omunu. Onjanja yimue, eci Yesu a sapuila olondonge viaye hati, wa laikele oku talisiwa ohali, upostolo Petulu wo lungula ndoco: “A Ñala, [likuatela ohenda]! Suku ka ka ci tave! Eci ka ci keya kokuove.” Etambululo lia Petulu li tu longisa nye? Li tu longisa okuti, nda ka tua kuatele utate poku eca alungulo, tu lekisa okuti, tu kuete ‘ovisimĩlo viomanu, kuenda ka tu kuete olondunge via Suku.’ (Mat. 16:21-23) Omo liaco, osimbu ka tua fetikile oku vangula, tu sukila oku sokolola lutate ovina tu yongola oku popia! Ku tava hẽ okuti olondunge via Suku via velapo, kuenda ka vi sokisiwa levi vietu?​—Yovi 38:1-4; Olosap. 11:2.

3 Kapako Lumbombe Ondaka ya Suku.

“Si lingi cimue locipango cange, puãi mopia ovina evi ndomo Isia a ndongisa.” ​—YOA. 8:28.

Citava okuti o pula ndoco: “Nda nda kaile ove, nda nda linga ndoco. . . ”? Nda wa limbuka okuti omunu waco wa eca etambululo lia leluka, o sukila oku kuama ongangu ya Yesu yoku lekisa umbombe kuenda eliketiso. Ndaño okuti Yesu wa kuata olondunge via velapo ka vi sokisiwa levi viomanu, pole, wa popia hati: “Sia popele ño ocipango cange, Isia wa numa eye wa ñundika eci mopia leci mbangula.” (Yoa. 12:49, 50) Yesu wa longisa omanu, kuenda wa eca lika alungulo atiamẽla kocipango ca Isiaye.

Kelivulu lia Luka 22:49, tu tangako okuti, olondonge via pula Yesu, nda via sukilile oku yaka oco ka ka kuatiwe. Kuenje, eci Yesu a kuatiwa, umue pokati kavo wopa osipata yaye. Ulandu ukuavo u sangiwa kelivulu lia Mateo 26:52-54, u lekisa okuti, vepuluvi liaco, Yesu wa lungula ondonge oco yi kuate elomboloko liatiamẽla kocipango ca Yehova. Omo okuti Yesu wa kũlĩhĩle olonumbi vi sangiwa kelivulu Liefetikilo 9:6, Kosamo 22, kuenda kelivulu lia Isaya 53, wa eca elungulo lia popela olondonge kuenda wa sanjuisa Yehova.

  4 Konomuisa Alivulu a Sandekiwa Lukuenje wa Lunguka.

“Helie ukuenje wa kolelua haeye wa lunguka okuti cime caye wo kundika vakuanjo yaye vosi oku va iha okulia kuavo kotembo ya tukuiwa?” ​—MAT. 24:45.

Yesu wa eca kukuenje wa kolelua ocikundi coku tekula omanu lokulia kuespiritu. Anga hẽ poku eca alungulu lolonumbi viatiamẽla kondaka yimue yi kuete esilivilo, wa siata oku konomuisa valivulu a sandekiwa lukuenje wa kolelua?

Tu kuete ovimãleho vialua vi tu kuatisa oku linga akonomuiso ndeci: Elivulu lio Índice das Publicações da Torre de Vigia, kuenda o Watchtower Library (Alivulu a Sangiwa Vokombutador.)  a Nda ka tu konomuisa olonumbi vi sangiwa vovimãleho viaco, tu lueya! Momo, tu sangamo atosi alua a tukula ovipama vi lekisa ndomo tu eca alungulo komunu umue o sukila ekuatiso. Anga hẽ o kuete uloño woku kuatisa omanu oku konomuisa olonumbi Viembimbiliya oco va tẽle oku lombolola Ondaka ya Suku? Ndeci omapa yi kuatisa omunu oku limbuka apa a sangiwa, loku u songuila kocitumãla a loña, oku konomuisa alivulu a sandekiwa lukuenje wa lunguka, ci kuatisa omunu oku endela vonjila yenda komuenyo ko pui.

Akulu valua vekongelo, va siata oku pindisa akundi poku linga akonomuiso velivulu lio Índice das Publicações da Torre de Vigia, kuenda Valivulu a Sangiwa Vokombutador, oco va kuatise vamanji oku kuata elomboloko Liovisonehua. Ovina viaco, ka vi kuatisa lika akundi oku tetulula ovitangi viavo, pole, vi kuatisavo oku kuata uloño woku konomuisa oco vope esilivilo kokulia kuespiritu Yehova a siata oku tu angiliyila. Poku ci linga, ci va kuatisa “oku tepisa pokati keci ciwa leci cĩvi, omo olondunge viavo via [pindisiwa].”​—Va Hev. 5:14.

5 Ku ka Ecelele Okuti va Kuene va Ku Nõlelako Onjila o yongola oku kuama.

‘Omunu lomunu ambata ocitele caye muẽle.’ ​—VA GAL. 6:5.

Omunu lomunu eye o kuete omoko yoku nõla elungulo lolonumbi a yongola oku kuama. Yehova wa tu ĩha elianjo lioku nõla, nda tu pokola kolonumbi viaye, ale sio. (Esin. 30:19, 20) Kuli ovitangi vimue okuti, poku vi tetulula, tu sukila oku kapako olonumbi Viembimbiliya, kuenje, omunu una o sandiliya ekuatiso, eye o nõla onjila a yongola oku kuama. Ci kale okuti tu eca alungulo kakulu, ale kamalẽhe, tu sukila oku lipula ndoco: ‘Anga hẽ ndi kuete omoko yoku tetulula ocitangi eci?’ Kuli ovitangi vimue okuti, akulu vekongelo ovo lika va kuete omoko yoku vi tetulula. Pole, nda umalẽhe umue o kuete ocitangi, olonjali viaye, ovio vi kuete omoko yoku ci tetulula.

[Atosi pombuelo yamẽla]

[Okakasia/​Lelitalatu kemẽla 8]

Esokiyo Lioku Linga Efendelo Liepata

Poku sokiya elilongiso, momo lie ku lingila ekonomuiso oco o sange atambululo kapulilo amue omanu va siata oku linga kokuove? Ovipama vipi lolonumbi Viembimbiliya o sukila oku konomuisa oco o tambulule omunu umue o yongola ekuatiso? Sokolola ndeci okuti, manji umue o ku sapuila hati, o yongola oku namulãla lomunu umue oco a linge ohueli yaye. Osimbu kua ecele etambululo, tete konomuisa velivulu lio Índice das Publicações kuenda Valivulu a kasi vokombutador, oco o sange ondaka yaco. Poku konomuisa velivulu lio Índice, sandiliya kemẽla ku sangiwa okasapi ka popia hati: “Oku Namulãla” ale “Olohuela.” Kũlĩhĩsavo olosapi vikuavo vi kuete elitokeko lolondaka via tukuiwa. Eci o sanga okasapi kaco, o ka limbuka okuti, vemẽhi liaco mu sangiwa ondaka ya linga hati: “Talavo.” Kovaso yondaka yaco, ku sangiwa otulosapi tukuavo tu pondola oku ku kuatisa oku sanga ovipama o yongola oku konomuisa oco o kuatise omunu umue.

[Okakasia kemẽla 9]

Tu eca olopandu ku Yehova omo a siata oku tu ĩha alungulo a velapo lekuatiso liocisoko caye. Kelivulu Liukundi 12:11 NW, tu tangako ndoco: “Olondaka via​—vakualondunge vi kasi ndolosongo, kuenda ndolopeleko via valeliwa longusu okuti, vi kuatisa ava va sandiliya oku linga esombiso—​lia eciwa lungumbo umuamue.” Ndeci omunu a toma lombueti yi kuete ‘osongo’ ovinyama vi kasi kokanga oco ka vi ka yapuke vonjila, cimuamue haico ci pita lalungulo a eciwa locisola okuti, a songuila omunu vonjila ya suñama. Ndeci ‘olopeleko’ via valeliwa longusu kavaya oco a litokeke ciwa, cimuamue haico ci pita lalungulo a eciwa locisola okuti, a pamisa ekolelo liomunu. Vakualondunge eci va sanga “esombiso” li tunda ku Yehova ‘ungombo wavo wa velapo,’ va kuata esanju lialua.

Tu pondola oku yeva ondaka Yungombo eci a tu ĩha alungulo. Oku kuatisiwa lalungulo a velapo, ci nena asumũlũho alua! Omo liaco, nda tua tiamisila alungulo etu kolonumbi Viembimbiliya, tu kuatisa olonjeveleli oku endela vonjila yomuenyo ko pui.