Suku Wa Tu Muisa Ocisola Caye

“Ocali ci [ka] viala vuviali wesunga lina li fulila vomuenyo ko pui.”—VA ROM. 5:21.

1, 2. Olombanjaile vipi vivali tu sukila oku konomuisa, kuenda ombanjaile yipi ya velapo?

 NDOTOLO David J. Williams wo Kosikola ya Velapo ko Melbourne, kofeka yo Australia, wa soneha hati: “Kuviali wo ko Roma . . . ocihandeleko oco ca kala ombanjaile ya velapo komanu vana va vialekiwa kusoma, loku ivaluka okuti va sukila oku vi pokola lutate.” Ndaño okuti, ombanjaile yaco ya kuatele esilivilo, pole kuli ombanjaile yimue ya velapo calua. Ombanjaile yaco eliangiliyo lioku taviwa la Suku loku tendiwa ndukuesunga kovaso aye, kuenda elavoko lioku popeliwa, loku kuata omuenyo ko pui.

² Kua kala onumbi yimue yocihandeleko ya lekisa ndomo Suku a eca ombanjaile yaco. Kelivulu lia va Roma kocipama 5, upostolo Paulu ka tukuile olonumbi viaco ndocina cimue ca tĩla oku ci kuama. Pole, wa fetika lolondaka vi popia hati: “Eci tu kuete ekolelo tu tendiwa ndavakuesunga, oco tu kuete ombembua la Suku, Mitakati yaco Ñala yetu Yesu Kristu.” Vosi va tambula ombanjaile ya Suku va vetiyiwa oku lekisa ocisola kokuaye. Paulu wa lekisa ocisola kokuaye. Eye wa soneha hati: “Ocisola ca Suku ca sukumuhila vitima vietu lespiritu sandu.”—Va Rom. 5:1, 5.

3. Apulilo api a votuiwa?

³ Momo lie ca sukilile ombanjaile yaco? Suku wa eca ndati ombanjaile yaco lonjila  yimue ya sunguluka? Kuenda velie va nõliwa oco va kuatisiwe lombanjaile yaco? Tu konomuisi atambululo aco kuenda ndomo a situlula ocisola ca Suku.

Ocisola ca Suku ca Litepa Lekandu

4, 5. (a) Yehova wa lekisa ndati ocisola caye? (b) Ukũlĩhĩso upi u tu kuatisa oku kuata elomboloko lielivulu lia Va Roma 5:12?

⁴ Yehova omo liocisola caye ca piãla, wa tuma Omõlaye wongunga oco a kuatise omanu. Paulu wa popia hati: “Suku wa tu muisa ocisola caye okuti, osimbu tua kala vakuakandu oco Kristu a tu fila.” (Va Rom. 5:8) Sokolola ondaka ya popia hati: “Tua kala vakuakandu.” Omanu vosi va sukila oku kũlĩha ndomo va linga vakuakandu.

⁵ Paulu wa lombolola ondaka yaco hati: “Ndeci ekandu lia iñila voluali lomunu umuamue, kuenda okufa kueya lekandu, haico okufa kua sambukila omanu vosi, momo vosi va linga ekandu.” (Va Rom. 5:12) Etu tu kuete elomboloko liovina viaco, momo Suku wa ecelela okuti ku sonehiwa ulandu u lekisa ndomo omuenyo womunu wa fetika. Yehova wa lulika omanu vavali, Adama la Heva. Omo okuti Ululiki wavo wa lipua, ovo va lipuilevo. Suku wa va ĩhile ocihandeleko cimue kuenda wa va sapuilile okuti oku sinila ocihandeleko caco ci va kokela okufa. (Efet. 2:17) Pole, va nõlapo oku sinila olonumbi via sunguluka via Suku, kuenje va likala Ukuakueca ovihandeleko haeye Ombiali ya Velapo.—Esin. 32:4, 5.

6. (a) Momo lie ovitumbulukila via Adama via fila osimbu Suku ka ecele Ocihandeleko ca Mose kuenda noke liaco? (b) Nye ci sokisiwa luvei wo hemofilia?

⁶ Omo okuti Adama wa linga lika isia yomãla noke yekandu, wa sambuisa ekandu liaco kokuavo lovitangi viosi vieyililako. Ocili okuti omãla vaco ka va lueyele ocihandeleko ca Suku ndeci Adama a linga, kuenda ka va pisiwile lekandu liaco. Handi vali, ka va tambuile onumbi layimue yocihandeleko. (Efet. 2:17) Pole, ocitumbulukila ca Adama ca piñala ekandu. Kuenje, ekandu kuenda okufa via viala toke eci Suku a eca ocihandeleko ku va Isareli, cina ca situlula ciwa okuti va kala vakuakandu. (Tanga Va Roma 5:13, 14.) Onima yocipiñalo cekandu, yi sokisiwa lovovei amue o vepata a sambuka ndeci, uvei wo hemofilia ale o anemiya wo ko Mediterrâneo. Ove pamue wa tangele ale ulandu wa Alexis omõla a Czar Nicholas II kuenda Alexandra kofeka yo Russia, va piñalele uvei wo hemofilia. Ndaño okuti omãla vamue vapata aco ka va liyaki lovitangi vi tunda kuvei waco, pole va kasi luvei waco. Cimuamue haico catiamẽla kekandu. Lomue wa tẽla oku tateka ovitangi via tunda kekandu lia Adama. Omanu vosi va kasi locitangi caco. Olio lia koka olofa. Kuenda lia sambukila komãla vosi. Anga hẽ citava oku yula ocitangi caco?

Ceci Suku a Linga Vonduko ya Yesu Kristu

7, 8. Ndamupi ovilinga vialume vavali va lipua via kuata esulilo lia litepa?

⁷ Yehova wa linga eliangiliyo limue li kuatisa omanu oku yula ocipiñalo cekandu. Paulu wa lombolola okuti ca tẽlisiwa vonduko yulume umue wa lipua okuti Adama yavali. (1 Va Kor. 15:45) Pole, ekalo lialume ava vavali va lipua, lia kuata onima ya litepa. Onima yaco ye?—Tanga Va Roma 5:15, 16.

⁸ Paulu wa soneha hati: “Ocali ca eciwa halondandoko ka ca lisokele lokulueya kuaco.” Adama omo lioku lueya, wa pisiwa kuenje wa tambula eyambulo lioku fa. Pole, hayeko lika wa fa. Paulu wa amisako hati: “Valua va fila ekandu liomunu umuamue.” Eyambulo lia eciwa ku Adama, lia eciwavo kocitumbulukila cosi comanu ka va lipuile, oku kongelamo etu. Pole, tu lembelekiwa calua poku kũlĩha okuti ulume ukuavo wa lipua, okuti Yesu, wa nena onima ya litepa. Onima yaco ye? Etambululo liaco li sangiwa kolondaka via Paulu  eci a popia hati ‘omanu vosi va tendiwa ndavakuesunga lelavoko liomuenyo.’—Va Rom. 5:18.

9. Ndomo ca lekisiwa kelivulu lia va Roma 5:16, 18, nye Suku a linga oco a tende omunu ndukuesunga?

⁹ Kelimi lio Helasi nye ci lomboloka olondaka viokuti, “oku tendiwa ndusuesunga,” kuenda ‘oku va tenda ndavakuesunga’? Ulume umue ukuakupongolola Embimbiliya valimi akuavo, wa soneha hati: “Ondaka eyi upopi wocindekaise u kuatisa oku limbuka ondaka yimue yatiamẽla kesombiso. Ondaka eyi yi lekisa epongoloko omunu a linga kukamba waye la Suku, pole, ka yi lomboloka epongoloko liatiamẽla kekalo liosi liomunu . . . Upopi waco wocindekaise, u sokisa Suku ndonganji yi teyuila omunu umue ondingaĩvi wa sombisiwa kekanga liaye. Pole, Suku o yovola omunu waco kekandu kuenda oku u tenda okuti ukuesunga.”

10. Ocina cipi Yesu a linga ca ecelela omanu oku tendiwa okuti vakuesunga?

¹⁰ “Onganji yoluali luosi,” haeye ukuesunga, nda wa tẽla oku yovola ndati omunu umue ondingaĩvi? (Efet. 18:25) Catete, Suku wa tuma Omõlaye wongunga palo posi. Yesu wa tẽlisa ciwa ocipango ca Isiaye, ndaño layonjo, loku popiwa lãvi, kuenda oku sepuiwa. Eye wa pandikisa toke eci a fa poku valeliwa kuti. (Va Hev. 2:10) Yesu wa eca omuenyo waye wa lipua ndocisembi coku yovola ocitumbulukila ca Adama kekandu kuenda kolofa.—Mat. 20:28; Va Rom. 5:6-8.

11. Ocisembi ca eciwa ndati lonjila yimue ya lisoka?

¹¹ Paulu wa tukula ondaka yaco hati, ocilumba cimue ca lisoka ci “yovola omanu vosi.” (1 Tim. 2:6) Oku lisoka kuaco kupi? Adama wa nena ekambo lioku lipua kuenda olofa kocitumbulukila caye. Eci ci lekisa okuti omo Yesu a kala omunu wa lipua, wa laikele oku linga ono yovitumbulukila viomanu vana va ka lipua. a Ca kũlĩhĩwile okuti, omuenyo wa Yesu kuenda wa vana va ka linga ocitumbulukila caye ca lipua, wa sokiya ocilumba cimue ca lisoka la Adama kuenda ocitumbulukila caye ka ca li puile. Pole Embimbiliya ka li lombolola okuti kuli ocitumbulukila cimue ca Yesu ca linga onepa kocisembi. Elivulu lia Va Roma 5:15-19, li lekisa okuti oku fa ‘kuomunu umuamue’ ukuesunga kua nena eyovo. Ocili okuti, omuenyo wa lipua wa Yesu wa lisoka lomuenyo Adama a kuatele. Omo liaco, tu sukila lika oku tiamisila ovisimĩlo vietu ku Yesu Kristu. Omanu vosi va ka tambula eyovo lomuenyo omo ‘lielinga liesunga’ lia Yesu, lepokolo liaye kuenda epandi a lekisa toke kolofa. (2 Va Kor. 5:14, 15; 1 Pet. 3:18) Onima yaco yeya ndati?

Eyovo li Tunda Kocisembi

12, 13. Momo lie vana va tendiwa ndavakuesunga va sukilila ohenda ya Suku locisola caye?

¹² Yehova Suku wa tava ocilumba cocisembi  ca eciwa Lomõlaye. (Va Hev. 9:24; 10:10, 12) Olondonge via Yesu palo posi oku kongelamo ovapostolo vaye vakuekolelo, handi ka va lipuile. Ndaño va likolisilako oku yuvula oku linga ovina ka via sungulukile, pole, olonjanja vimue ka va siatele oku kuata onima yiwa. Momo lie? Momo va piñala ekandu. (Va Rom. 7:18-20) Pole, Suku wa linga eliangiliyo limue. Eye wa tava ocilumba cocisembi coku “yovola omanu vosi” kuenje wa ecelela okuti ci kuatisa afendeli vaye.

¹³ Eci ka ci lomboloka okuti Suku wa levalele ovapostolo kuenda omanu vakuavo vakuekolelo omo liupange uwa va linga. Eye wa va kuatisa locisembi omo liohenda kuenda ocisola caye ka ci pui. Suku wa nõlapo oku yovola ovapostolo kuenda omanu vakuavo keyambulo va sesamẽlele oco va tendiwe ndomanu va yovuiwa kohole va piñala. Paulu wa ci lombolola ndoco: ‘Wa popelui ocali omo wa kaili lekolelo. Ka wa ci lingili ene muẽle puãi ca tunda kocali ca Suku.’—Va Efe. 2:8.

14, 15. Esumũlũho lipi lia kapiwile ku vana Suku a tenda ndavakuesunga, pole nye va sukilile oku linga?

¹⁴ Sokolola ño ocali ca Tõlo coku ecela ekandu omunu a piñala kuenda akandu akuavo a linga! Ove ku tẽla oku tenda akandu omunu osimbu ka lingile Ukristão, pole omo liocisembi, Suku ecela akandu osi. Paulu wa soneha hati: “Ocali ceyilila akandu a lua ci nena oku tendiwa ndukuesunga.” (Va Rom. 5:16) Ovapostolo kuenda omanu vakuavo vana va tambula ocali caco, (coku tendiwa ndavakuesunga) va sukilile oku amamako oku vumba Suku yocili lekolelo. Onima yipi nda va tambula? “Ava va tambula ocali, ca supoka kuenda esunga lia eciwa ocali, va [ka] viala vomuenyo mekonda liomunu umuamue, Yesu Kristu.” Ocali cesunga, ci talavaya lonjila ya litepa. Onima yocali caco, omuenyo.—Va Rom. 5:17; tanga Luka 22:28-30.

¹⁵ Vana va tambula ocali caco, loku tendiwa ndavakuesunga, va linga omãla va Suku vespiritu. Omo okuti va ka piñala kumue la Kristu, va kuete elavoko lioku pinduiwa ndomãla vespiritu oco va ende kilu ‘oku viala ndolosoma,’ kumue la Yesu Kristu.—Tanga Va Roma 8:15-17, 23.

Ocisola ca Suku ca Lekisiwa ku Vakuavo

16. Vana va kuete elavoko lioku kala palo posi, va tambula ndati ocali?

¹⁶ Havosiko va kuete ekolelo haivo va vumba Suku Ndakristão vocili va lavoka oku “viala” la Kristu kilu. Valua va kuete elavoko lia lekisiwa Vembimbiliya ndeli liafendeli va Suku kosimbu. Ovo va lavoka oku kala otembo ka yi pui voluali luokaliye palo posi. Anga hẽ, citava okuti va tambula ocali ca Suku loku tendiwa ndavakuesunga lelavoko lioku kuata omuenyo palo posi? Ndomo Paulu a sonehela va Roma, omanu vaco va ka tambula muẽle!

17, 18. (a) Suku wa tendele ndati Avirahama omo liekolelo liaye? (b) Yehova wa tendele ndati Avirahama ndukuesunga?

¹⁷ Paulu wa tukula Avirahama ulume umue ukuekolelo, wa kala komuenyo eci handi Yehova ka ecele ovihandeleko ku va Isareli kuenda osimbu Kristu ka yuluile onjila yoku kuata omuenyo kilu. (Va Hev. 10:19, 20) Tu tanga ndoco: “Ohuminyo yina yeya ku Avirahama lo kombuto yaye yokuti o linga kapiñala koluali, ka yeyililile oku pokola kovihandeleko, puãi yeyilila esunga li tunda kekolelo.” (Va Rom. 4:13; Tia. 2:23, 24) Omo liaco, Suku wa tenda Avirahama ndukuekolelo.—Tanga Va Roma 4:20-22.

¹⁸ Eci ka ci lomboloka okuti osimbu Avirahama a kala oku vumba Yehova vokuenda kuanyamo alua, wa lipuile. Eye ka tendiwile ndukuesunga vonepa eyi. (Va Rom. 3:10, 23) Yehova omo liolondunge viaye via velapo, wa kapeleko calua ekolelo lia Avirahama kuenda ovilinga viaye viwa. Avirahama wa kuatele ekolelo kohuminyo ‘Yombuto’ ya laikele oku iyilila kocitumbulukila caye. Ombuto  yaco, Mesiya ale Kristu. (Efet. 15:6; 22:15-18) Vonduko ‘yocisembi ca eciwa la Yesu Kristu,’ Suku onganji ya velapo wa ecela akandu a lingiwa kosimbu. Omo liaco, Avirahama kuenda omanu vakuavo vakuekolelo vo kosimbu, va ka pinduiwa.—Tanga Roma 3:24, 25; Osa. 32:1, 2.

Kuata Ekalo Lia Sunguluka Cilo

19. Momo lie ocisimĩlo ca Suku catiamẽla ku Avirahama ci vetiyila omanu valua koloneke vilo?

¹⁹ Oku kũlĩha okuti Suku yocisola wa tendele Avirahama ndukuesunga, ci lembeleka Akristão vocili koloneke vilo. Yehova ko tendele ndukuesunga poku u waveka lespiritu oco a linge ‘kapiñala kumue la Kristu.’ Etendelo liocimunga caco ‘va tukuiwa oku linga olosandu,’ haivo va taviwa ‘ndomãla va Suku.’ (Va Rom. 1:7; 8:14, 17, 33) Pole, Avirahama wa tukuiwa hati, ‘ekamba lia Yehova’ osimbu handi ocilumba cocisembi ka ca eciwile. (Tia. 2:23; Isa. 41:8) Nye ci popiwa Kakristão vocili va kuete elavoko lioku kala Voluali Luokaliye palo posi?

20. Nye Suku a lavoka ku vana a tenda ndavakuesunga koloneke vilo, ndeci ca pita la Avirahama?

²⁰ Omanu vaco ka va tambuile “esunga lia eciwa ocali,” lelavoko lioku kuata omuenyo kilu, mekonda lieyovo liocisembi ca ‘Yesu Kristu, una wa pesela osonde yaye.’ (Va Rom. 3:24; 5:15, 17) Ovo va lekisa ekolelo ku Suku lo keliangiliyo liaye, kuenda va situlula ekolelo liaco kovilinga viavo viwa. Vimue pokati kovilinga viaco, oku “kunda usoma wa Suku, . . . [loku] longisa ovina via Ñala Yesu Kristu.” (Ovil. 28:31) Yehova o va tenda ndavakuesunga ndeci a linga la Avirahama. Ocali caco va tambula, ci lomboloka ukamba uwa la Suku, haico ca litepa ‘locali’ colombuavekua. Pole, va ci tambula lesanju lia piãla.

21. Esumũlũho lipi li tunda kocisola ca Yehova kuenda kesunga liaye?

²¹ Nda o kuete elavoko lioku kala otembo ka yi pui palo posi, o sukila oku ivaluka okuti, esumũlũho liaco ka lia eciwile omo liovilinga viombiali yimue yomunu. Pole, esumũlũho liaco li situlula ocipango ca lipua Combiali ya Velapo Voluali luosi. Yehova wa siata oku kuama olonjila vialua vioku tẽlisa ocipango caye. Olonjila viaco vi likuata lesunga liocili. Ovio vi situlula ocisola ca velapo ca Suku. Eli olio esunga lieci Paulu a popela hati: “Suku wa tu muisa ocisola caye okuti, osimbu tua kala vakuakandu oco Kristu a tu fila.”—Va Rom. 5:8.

[Atosi pombuelo yamẽla]

O ci Ivaluka?

• Ocitumbulukila ca Adama ca tambula ocipiñalo cipi, kuenda nye ceyililako?

• Ocilumba coku yovola omanu vosi ca eciwa ndati, kuenda ca lisokele ndati?

• Ombanjaile yoku tendiwa ndavakuesunga ya nena elavoko lipi kokuove?

[Apulilo Elilongiso]

[Elitalatu kemẽla 13]

Adama ulume una wa lipuile wa lueya. Yesu ulume wa lipua “wa liecela oku yovola omanu vosi”

[Elitalatu kemẽla 15]

Halondakakuovio viwa viokuti vonduko ya Yesu tu pondola oku tendiwa ndavakuesunga!