Apulilo Valingiwa la Vakuakutanga

Momo lie Mose a temẽlele lomãla va Arone, Eleasa la Itamare, noke yolofa via vamanjavo Nadava la Avihu, kuenda onyeño yaco yeya oku tulumũha ndati?—Ovis. 10:16-20.

Noke yoku tumbika upange wutunda vo tavernakulu, Yehova wa ponda omãla va Arone, Nadava la Avihu, omo lioku lumbila ondalu yaño kovaso Aye. (Ovis. 10:1, 2) Mose wa handeleka omãla va Arone va supapo, oco ka va ka lile olofa via vamanjavo. Noke ka pa pitile otembo yalua, Mose weya oku temẽla Eleasa la Itamare momo ka va li le ohombo yocilumba cekandu. (Ovis. 9:3) Momo lie Mose a temẽlele?

Ocihandeleko Yehova a ecele ku Mose, ca lekisile okuti, ocitunda cina ceca ocilumba cekandu, cenda kocitali combalaka yoku ñualehela la Yehova oku lia ocilumba caco. Oku ci linga ca tendiwile ndetambululo lioku ecela olohole viomanu vaco. Pole, nda osonde yocilumba caco ya tualiwa Vocitumãlo ci Kola, okuti vohondo yatete, ocilumba caco ka ci liwa. Oco, ci yokiwa londalu.—Ovis. 6:24-26, 30.

Citava okuti noke yocitangi ca pita keteke liaco, Mose wa limbukile okuti ci sukila oku kapako ovihandeleko viosi via Yehova. Eci a mola okuti ohombo yocilumba cekandu ya yokiwa, eye wa tema kuenje wa pulisa Eleasa la Itamare esunga lieci va yuvuila oku lia ocilumba, momo osonde yaco ka ya eciwile ku Yehova Vocitumãlo ci Kola.—Ovis. 10:17, 18.

Arone poku tambulula epulilo lia Mose, wa lekisa okuti ovitunda viaco via ci linga lonumbi yaye. Omo liolofa viomãla vaye vavali, wa simĩle okuti keteke liaco, ka kua kaile vali ocitunda ci pondola oku lia lutima wa yela kocilumba cekandu. Ale wa simĩle okuti oku lia kocilumba caco, ci wengula onyeño ya Yehova, ndaño ka va kuatele eko kekandu lia Nadava la Avihu.—Ovis. 10:19.

Arone pamue wa kala oku sokolola okuti omãla vaye eci va linga upange wavo watete wutunda, va sukilile oku ci linga lutate oco va sanjuise Yehova ndaño muẽle kovina vitito. Pole, omo okuti Nadava la Avihu va sepula onduko ya Yehova, ungelo Waye wa va yambula. Omo liaco, Arone wa simĩle okuti, vakuepata liocitunda cimue mua sangiwa ekandu, ka citava okuti va lia vali kocilumba ci kola.

Mose wa tava kocisimĩlo ca huvaye, momo esapulo liaco li malusula hati: “Eci Mose a ci yeva oco co sungulukila.” (Ovis. 10:20) Eci ci lekisa okuti, Yehova wa sanjukililevo etambululo lia Arone.