Ndomo tu Lekisa Ocisola ku Vakuetu
Omo okuti tucitumbulukila culume watete, Adama, vosi yetu tuepata limuamue. Ndaño okuti vosi vepata va sukila oku lisola loku lisumbila, pole, koloneke vilo ka calelukile oku sanga ocisola caco. Eci hacoko Suku yetu ukuacisola a yongola.
NYE OVISONEHUA VI KOLA VI POPIA CATIAMẼLA KOCISOLA?
“Sola puãi u o lisungue love ndeci o lisole ove muẽle.”—OVISILA 19:18.”
“Soli ovanyãli vene.”—MATEO 5:44.
NYE CI LOMBOLOKA OKU SOLA VAKUETU?
Kũlĩhĩsa ndomo Suku a situlula ocisola vondaka yaye kukanda 1 Va Korindo 13:4-7:
“Ocisola ci pandikisa kuenda ci lingainga eci ciwa.”
Kũlĩhĩsa: O liyeva ndati eci vakuẽle va lekisa epandi, loku ku lingila eci ciwa kuenda ka va kapiko akulueya ove?
“Ocisola ka ci kuete onya.”
Kũlĩhĩsa: O liyeva ndati eci vakuẽle va lekisa onya kokuove?
“Ocisola ka ci sandi ovina vialio muẽle.”
Kũlĩhĩsa: O liyeva ndati eci vakuẽle va kapako ovisimilo viove okuti, ka va kakatela lika kovisimĩlo viavo?
Ocisola “ka ci patekela onyeño.”
Kũlĩhĩsa: Suku o yongola oku ecela omanu vana va likekembela lutima wosi. “Ka lemaela ño-o hũ. Ka tema tema olonjanja viosi.” (Osamo 103:9) Tu sanjuka calua eci umue tua lueyela a tu ecela. Omo liaco, tu sukila oku ecela vakuetu eci va tu lueyela.—Osamo 86:5.
Ocisola “ka ci yolela evi ka via sungulukile.”
Kũlĩhĩsa: Nda tu pita locitangi cimue, tu sumua eci vakuetu va sanjukila ohali yetu. Cimuamue haco okuti, ka tu sanjukavo eci vakuetu va lipita lovitangi, ndaño ceci va tu tata lãvi.
Oco tu kuatisiwe lasumũlũho a Suku, tu sukila oku sola omanu vosi, ci kaile okuti vakuafeka yiñi ale vakuetavo lia litepa. Onjila yimue yoku ci linga, poku va kuatisa kovina va sukila.
