Embimbiliya li situlula okuti, ungelo umue ukuesino okuti noke weya oku tukuiwa Satana Eliapu, wa popia okuti, Suku ka kuete omoko yoku viala omanu. Eye wa popiavo okuti, omanu va ponduile oku kuata esanju nda ka va songuiwa loku vialiwa la Suku. Pole, olonjali vietu viatete, Adama la Eva, va kuama ongangu ya Satana kuenje va sinĩla Suku. —Efetikilo 3:1-6; Esituluilo 12:9.

Omo okuti Adama la Eva va likala Suku Ndombiali yavo, va pumba Ocumbo Celau onjo yavo kuenda elavoko lioku kala otembo ka yi pui luhayele wa lipua. (Efetikilo 3:17-19) Onjila va nõlapo, ya kokelavo ovitangi komãla vavo. Embimbiliya li popia okuti, omo Adama a lueya, “ekandu lia iñila voluali . . . kuenda oku fa omo liekandu.” (Va Roma 5:12) Ekandu lia siata oku koka ovitangi vikuavo ndeci: “Omunu poku kangisa ukuavo o lilinga eye muẽle cĩvi.” (Ukundi 8:9) Volondaka vikuavo, nda omanu va liviala ovo muẽle, otembo yosi va ka kuata ovitangi.

Ombiali yatete yomanu ya tukuiwa Vembimbiliya, Nimuroti. Eye wa sina kuenda wa lekisa okuti ka yonguile okuti Yehova o viala omanu. Tunde koloneke via Nimuroti, omanu vakuonene va siata oku talavaya lãvi lomoko yavo yoku viala. Ci soka 3.000 kanyamo a pita, Soma Salomone wa soneha ndoco: “Nda molavo . . . asuelẽla ava va kangisua ya, kuenje ka va kuete u o va lemba, vakuaku va kangisa va kasi lunene waco.” —Ukundi 4:1.

Koloneke vilo, haicovo olombiali viomanu via siata oku linga. Kunyamo 2009, elivulu limue liolo Nações Unidas lia popia okuti, omo okuti oku viala lãvi ku kasi oku livokiya, “kua siatavo oku koka ovitangi voluali koloneke vilo.”

Oluali lu sukila olombiali viwa kuenda onjila yiwa yoku viala. Eci oco Ululiki wetu a tu likuminya!

Suku wa tumbika Usoma umue ale uviali, u ka piñainya ovoviali osi omanu kuenje “u kala muẽle hũ oloneke ka vi pui.” (Daniele 2:44) Owu, owo Usoma omanu valua va siata oku pinga vohutililo. (Mateo 6:9, 10) Pole, Suku haeyeko o ka viala vusoma waco. Eye wa nõla umue okuti votembo yimue wa kalavo palo posi letimba ndeli liomanu oco a kale Ombiali. Helie Suku a nõla?