• O nõliwa la Suku. “Nda kapa osoma yange . . . hu iha olofeka ha vi lingi ocipiñalo cove, lasukiyo oluali ha a lingi ocitumalo cove.” —Osamo 2:6, 8.

• O kala kapiñala ka Soma Daviti. “Omõla wa tu citilua, omõla ulume wa tu ĩhĩwa . . . Okuamamako kuviali waye loku kuombembua ka ku fulila, kocalo ca Daviti kuenda kusoma waye, oku u kolisa.” —Isaya 9:6, 7.

• O citiwila vo Beteleme. “A Beteleme . . . kokuove ku nundila u o linga ombiali . . . O linga unene toke kasulilo okilu lieve.” —Mika 5:2, 4.

• O yuvuiwa lomanu loku pondiwa. “Wa pembuiwa . . . , kuenje ka tuo tendele. . . . Eye wa totiwila olombole okulueya kuetu, wa tonyuiwĩla evĩho lietu.” —Isaya 53:3, 5.

• O pinduiwa kuava va fa loku kemanyiwa. “Ku njanduluka okuti ngenda ño konjembo. Ku tava okuti u wove ukuesunga o kala ño veyambo. . . . Kondio yove ku kasi esanju ka li pui.” —Osamo 16:10, 11.

Kulandu wosi womanu, omunu o pondola lika oku tẽlisa ovina via tukuiwa ndeti okuti, eye o sesamẽla oku Viala, Yesu Kristu. Ungelo umue wa sapuila Maria, ina ya Yesu hati: “Suku o ko wĩha ocalo ca isiaye Daviti, . . . kuenda Usoma waye ka u sulila.” —Luka 1:31-33.

Yesu lalimue eteke a kaile ombiali palo posi. Pole, o ka viala omanu oku upisa kilu Ndosoma Yusoma wa Suku. Nye cu lingisa oku kala Ombiali ya velapo? Kũlĩhĩsa ovina eye a linga eci a kala palo posi.

•   Yesu wa tata ciwa omanu. Yesu wa kuatisa omanu vosi ndeci: Alume, akãi, amalẽhe, akulu, ci kaile olohuasi ale olohukũi. (Mateo 9:36; Marko 10:16) Eci umue ukuavilundu o livondela hati: “Nda wa panga, ñayise,” Yesu wa vetiyiwa lohenda kuenje wo sakula. —Marko 1:40-42.

• Yesu wa tu longisa ndomo tu sanjuisa Suku. Eye hati: “Ka vu tẽla oku vumba Suku kuenda Ovokuasi.” Eye wa tu vetiya oku tata vakuetu ndomo tu yongola oku tatiwa. Kuenje onumbi yaco yeya oku tukuiwa hati, Ocihandeleko Covituwa Viwa. Handi vali, eye wa lekisa okuti, Suku wa kapako ovina tu linga, onjila ndomo tu sima kuenda ndomo tu liyevite. Omo liaco, oco tu sanjuise Suku, tu sukila oku kuata utate lovisimĩlo vietu. (Mateo 5:28; 6:24; 7:12) Yesu wa longisa okuti, oco tu kuate esanju liocili, tu sukila oku kũlĩha eci Suku a yongola okuti tu ci linga kuenda oku ci kapako. —Luka 11:28.

• Yesu wa longisa eci ci lomboloka ocisola. Olondaka via Yesu lovilinga viaye, via kuata unene woku vetiya ovitima violonjeveleli viaye. “Owiñi wa komõha oku longisa kuaye, momo eye wa va longisa ndomunu o vangula lunene.” (Mateo 7:28, 29) Eye wa va longisa ndoco: “Soli ovanyãli vene.” Handi, eye wa likutililako vamue pokati ka vana vo ponda hati: “A Tate, va ecela, momo ka va kũlĩhĩle eci va kasi oku linga.” —Mateo 5:44; Luka 23:34..

Yesu eye o sesamẽla oku kala Ombiali ya velapo yoluali luosi momo eye ukuahenda kuenda wa kapako omanu. Pole, otembo yipi a ka fetika oku viala?