Ceci Omanu va Popia Catiamẽla Koku Likutilila ku Suku
“Eci ndi likutilila, ndi liyeva ndu okuti Suku o kasi konele yange, oku kuata eka liange loku ndi songuila eci ndi sima okuti, nda nyẽlela.”—MARÍA.
“Ukãi wange wa fa luvei wo kanser noke yoku vela 13 kanyamo. Nda ivaluka oku likutilila ku Suku eteke leteke kuenda nda limbuka okuti eye wa njevelela muẽle eci nda yeva evalo. Kuenje nda kuata ombembua.”—RAÚL.
“Ohutililo ombanjaile yimue Suku a eca komanu.”—ARNE.
Catiamẽla ku María, la Raúl, la Arne kuenda omanu vakuavo, ohutililo ombanjaile yimue yilikasi. Ovo va liyeva okuti, pocakati cohutililo, va pondola oku vangula la Suku, oku u pandula kuenda oku sanda ekuatiso liaye. Ovo va kolela okuti, eci Embimbiliya li popia catiamẽla koku likutilila ku Suku ocili, olio hati: “Eli olio ekolelo tu kuete kokuaye okuti, nda tu pinga ovina viosi vi likuata locipango caye, eye o tu yeva.”—1 Yoano 5:14.
Pole, omanu valua ka va tava kueci Embimbiliya li popia catiamẽla kohutililo. Steve o lombolola ocisimĩlo caye catiamẽla koku likutilila. Eye hati: “Eci nda kuatele 17 kanyamo, akamba vange vatatu va fa kovilunga vivali via litepa. Umue wa fa kocilunga cimue lekãlu, vakuavo vavali va fila vokalunga.” Nye Steve a linga? Eye wamisako hati: “Nda likutilila ku Suku oku sandiliya atambululo oco ndi kũlĩhe esunga lieci ovina viaco via pitila, pole, sia kuatele etambululo. Kuenje nda lipula ndoco, ‘Momo lie ndi likutililila?’ Olohutililo ka vi tambuluiwa, via siata oku kokela omanu valua oku lipula nda va sukila muẽle oku likutilila.
Kuli asunga akuavo eci omanu vamue va simila okuti olohutililo ka vi va kuatisa. Vamue va popia okuti, omo Suku wa kũlĩha ovina viosi, eye wa kũlĩha ale asukila etu ale ovitangi vietu kuenje ka tu sukila oku u lomboluila vali ovina viaco.
Vamue va sima okuti, Suku ka yongola oku yevelela olohutililo viavo, omo liovina vĩvi va linga kosimbu. Jenny wa popia hati: “Ocitangi cange ceci okuti, ndi liyeva okuti si kuete esilivilo. Nda linga ovina okuti cilo ndi livela, omo liaco nda kolela okuti si sesamẽla oku yeviwa la Suku.”
Nye ove o sima catiamẽla koku likutilila? Nda wa kuatele ale asakalalo aco, ale atatahãi amuamue atiamẽla kohutililo, o pondola oku lembelekiwa poku kũlĩha okuti Embimbiliya lieca atambululo a suapo. Tu pondola oku kolela kueci Embimbiliya li popia catiamẽla koku likutilila; * olio li ku kuatisa oku sanga atambululo kapulilo a kuãimo:
-
Anga hẽ Suku o yevelela olohutililo vietu?
-
Momo lie olohutililo vimue ka vi tambuluiwa?
-
O pondola oku likutilila ndati kuenda oku yeviwa?
-
Olohutililo vi ku kuatisa ndati?
^ tini. 9 Vembimbiliya mu sangiwa olohutililo vialua viafendeli va Suku, oku kongelamo olohutililo via Yesu Kristu. Vovisonehua vio Heveru okuti, via siata oku tukuiwa Otestamentu Yale, mu sangiwa eci ci pitahãla 150 kolohutililo.
Ove o ka ci Sola
APULILO ATAMBULUIWA LEMBIMBILIYA
Momo Lie o Likutililila? Anga Suku o Ndi Yevelela?
Ci kale okuti Suku o ku yevelela ale sio, cosi ca tamba ño kokuove.
AMALẼHE VA PULA
Ci Kuete hẽ Esilivilo Oku Likutilila?
“Anga hẽ ohutililo ocina cimueño ci tu kokela oku liyeva ciwa ale kuli ocina ci kuavo?”
UTALA WONDAVULULI
Ove hẽ o Sukila Oku Likutilila?
Suku o pondola oku tambulula olohutililo pole, ka lingi ovikomo.
