KOLOHUELI
1: Ohuminyo
CI LOMBOLOKA NYE?
Eci ulume lukãi va likuminya volohuela, va tenda omunga yaco ndocina cimue ci kala otembo yosi. Eci ci koka oku kolapo pokati kavo. Ovo va kolela okuti, omunu lomunu pokati kavo o ka sumbila ohuminyo a linga lukuavo ndaño lovitangi.
Olohueli vimue vi amamako oku kala kumosi omo lioku kisikiwa lepata kuenda lomanu vakuavo. Pole, ca sunguluka nda ulume lukãi va linga ohuminyo ya kunamẽla kocisola kuenda kesumbilo va likuetele pokati.
CECI EMBIMBILIYA LI POPIA: “Ulume ka ka siepo ukãi waye.”—1 Va Korindo 7:11.
“Nda volohuela viove wa linga ohuminyo, ku ka kuata onyeño yalua lonjanga ale oku lekisa ocikumbiti okuti ku ecela lonjanga. O ka tenda ovitangi ndocilondokua cimue, pole, ka ci ka kala ndesunga lioku malako olohuela viove.”—Micah.
MOMO LIE CI KUETELE ESILIVILO?
Eci kuiya ovitangi, olohueli vina ka via lingile ohuminyo, ocina catete vi sima ceci okuti, ‘mbi ka tua lulikiwile oco tu kale kumosi’ kuenje va sanda onjila yoku nyõla olohuela.
“Omanu valua eci va likuela, va sokolola konjila yikuavo okuti, ‘oku linyãla.’ Pole, nda omunu o kuela ale lovisimĩlo vioku linyãla, olohuela ka vi fetika lohuminyo ya kolapo.”—Jean.
NYE O PONDOLA OKU LINGA?
TALAMA KUENDA SOKOLOLA
Nda vu kasi oku lihoyisa . . .
-
Anga hẽ ove o livela omo lioku kuela lulume wove ale lukãi wove?
-
O li sokolola hẽ okuti wa kuela lomunu ukuavo?
-
Anga hẽ o popia ovina ndeci: “Kokuange ca pua,” ale “ndi sandiliya omunu ukuavo wa ndi kapako”?
Nda wa tambulula okuti, oco kepulilo limue ale avali a lingiwa, o sukila oku tõlisa ohuminyo wa linga volohuela viove.
SAPELI POKATI
-
Anga hẽ ohuminyo yetu ya hongua okuti kosimbu ci sule? Nda wa tambulula okuti oco, sandi esunga liaco.
-
Nye tu sukila oku linga oco tu pamise ohuminyo yolohuela vietu?
OLONUMBI
-
Olonjanja vimue tumisa esapulo limue liocisola kulume wove ale kukãi wove.
-
Kapa elitalatu liaye komesa yoseketa yove yupange. Eyi onjila yimue yoku lekisa okuti, wa sumbila ohuminyo wa linga.
-
Telefonalela ulume wove ale ukãi wove vokuenda kueteke. Ci linga nda o kasi oku talavaya, ale o kasi ocipãla laye.
CECI EMBIMBILIYA LI POPIA: “Ca tokekisa Suku, lomue ka ka ci tepe.”—Mateo 19:6.
