Eci ulume lukãi waye va li sumbila, va litata locisola ndaño muẽle ceci ka va kuete ocisimĩlo cimuamue kondaka yimue. Elivulu losapi hati, Ten Lessons to Transform Your Marriage (Ovipama Ekũi Oco o Pongolole Olohuela Viove), catiamẽla kolohueli via lisumbila, li popia okuti: “Olohueli viaco ka vi kakatela lika omunu lomunu kocisimĩlo caye.” “Pole, ovo va sapela eci catiamẽla ketepiso li kasi pokati kavo. Ohueli lohueli, yi yevelela ovisimĩlo viukuavo lesumbilo kuenje va sanga onjila yi va kuatisa.”

CECI EMBIMBILIYA LI POPIA: “Ocisola . . . ka ci sandi ovina vialio muẽle.”—1 Va Korindo 13:4, 5.

“Oku sumbila ukãi wange ci lomboloka oku limbuka esilivilo eye a kuete loku yuvula oku linga ovina viu sumuisa ale cimue ci nyõla olohuela vietu.”—Micah.

Nda ka pali esumbilo, poku sapela vu livetela evelo, oku lipopia olondaka viukãlu kuenda vielaviso. Ndomo olonoño vimue via lombolola, evi ovio ovina via siata oku situlula okuti, olohuela pamue vi pua loku linyãla.

“Olondaka vĩvi, ale oku u popela vasende okuti, upopi umue ka wa sungulukile catiamẽla kukãi wove, vi nyõla ekolelo liaye kokuove kuenda olohuela viove.”—Brian.

TALAMA KUENDA SOKOLOLA

Vokuenda kuosemana yimosi, luluvala lutate kueci o popia leci o linga. Noke tambulula apulilo a kuãimo ndeci:

• ‘Olonjanja viñami nda vetela evelo ulume wange ale ukãi wange kuenda olonjanja viñami ndo pandiya?’

• ‘Volonjila vipi nda lekisa esumbilo kohueli yange?’

SAPELI POKATI

• Olondaka vipi lovilinga nda via kuatisa omunu lomunu oku liyeva okuti, wa sumbiwa?

• Olondaka vipi lovilinga nda via kokela omunu lomunu oku liyeva okuti ka sumbiwile?

OLONUMBI

• Soneha ovina vitatu ulume ale ukãi wove a sukila oku linga oco a liyeve okuti, wa sumbiwa. Omunu lomunu a sonehe ovina viaye kuenje a viece kukuavo noke likolisiliko oku kapako ovina ukuene a soneha.

• Soneha ulala wovina o sole kulume wove, ale kukãi wove. Noke li sapuili pokati ndomo wa siati oku sanjukila ovituwa viaco.

“Oku sumbila ulume wange ci lomboloka oku lekisa kovilinga okuti, ndo kapako kuenda ndi yongola okuti eye o kuata esanju. Ku sukila oku linga ovina vinene; olonjanja vimue poku linga ovina vimue vitito, ci lekisa okuti tu kuete esumbilo liocili.”—Megan.

Kesulilo, ka tu sukila lika oku litenda etu muẽle okuti tua sumbiwa, pole, oku limbuka nda omunu ukuavo o liyevite okuti wa sumbiwa

CECI EMBIMBILIYA LI POPIA: “Wali ohenda, ocikembe, umbombe, oku kala ukuambembua kuenda epandi.”—Va Kolosai 3:12.