Vokuenda kuotembo yimue, Yesu o kasi vo Perea “kesinya lia Yordão.” (Yoano 10:40) Cilo eye o linga ungende woku enda kombuelo, oku loña ko Yerusalãi.

Yesu ka kasi lika liaye. Olondonge viaye kumue lowiñi walua, oku kongelamo vakuakutambula elisimo kuenda vakuakandu, va kasivo oku linga ungende kumue laye. (Luka 14:25; 15:1) Va Fariseo la vakuavisonehua vana va lundila Yesu kovina a popia levi a kasi oku linga, haipo va kasi. Kaliye ovo va kuete ovina vialua vioku sokolola noke yoku yeva alusapo a Yesu atiamẽla komeme ya nyelile, komõla wa nyelile, kulume ohuasi kuenda wa Lasaru.—Luka 15:2; 16:14.

Citava okuti Yesu noke lioku yeva alundi lolondaka viesepu viovanyãli vaye, cilo o tiamisila utima kolondonge viaye. Eye o lombolola olondaka vimue a longisile ale ko Galilea.

Yesu o popia hati: “Ocili okuti ku iya ovilondokua. Pole, ngongo yomunu una o vi koka! . . . Lunguki. Nda manjove wa linga ekandu limue, u lemela kuenda nda wa likekembela, u ecela. Nda wa ku lueyela olonjanja epanduvali veteke kuenje wa tiuka olonjanja epanduvali loku popia hati, ‘Nda likekembela,’ u ecela.” (Luka 17:1-4) Olondaka evi via sulako, citava okuti via ivaluisa Petulu catiamẽla kepulilo a lingile lioku ecela olonjanja epanduvali.—Mateo 18:21.

Anga hẽ olondonge vi ka kapako olondaka via Yesu? Eci ovio vi popia vati: “Tu vokiyeko ekolelo,” kuenje eye o vi sapuila hati: “Nda wa kuateli ekolelo ndolumema wulemba, nda vu popia luti owu wo amoreira [a tekãva,] hati, ‘[Veyuka] palo kuenda [lituika] vokalunga!’ kuenje uti waco u pokola kokuene.” (Luka 17:5, 6) Omo liaco, nda wa kuati ekolelo litito, vu ka linga ovina vi komõhisa.

Yesu amisako oku longisa esilivilo lioku lekisa umbombe kuenda ocituwa ca sunguluka catiamẽla kokuavo muẽle. Eye o sapuila ovapostolo hati: “Helie pokati kene o kuete upika o kasi oku lima, ale oku lava ocunda okuti eci a tunda kepia u sapuila hati, ‘Enju kulo, tumãla komesa, lia’? Siti u sapuila hati, ‘Pongiya cimue oco ndi lie ondalelo yange kuenda wala evendalia loku ndi vumba toke eci ndi mala oku lia loku nyua, noke citava hẽ okuti o lia kuenda o nyua’? Eye ka lekisa hẽ olopandu kupika omo a linga ovina vo handeleka? Lenevo eci vu mala oku linga ovina viosi vo handeleki, popi hoti: ‘Tuapika vaño. Eci tua linga, oco ca tu sesamẽla oku linga.’”—Luka 17:7-10.

Afendeli vosi va Suku va sukila oku limbuka esilivilo lioku pitisa kovoso ovopange Aye. Handi vali, vosi va sukila oku limbuka okuti esumũlũho linene oku panga onepa kepata liafendeli va Suku.

Citava okuti, noke kua pitĩla omunga yimue ya tumiwa la Maria kuenda Marta. Ovo va mukãi va Lasaru okuti va tungile vimbo lio Betania yo ko Yudea. Omunga ya lombolola hati: “A Ñala, una ove o sole o vela.”—Yoano 11:1-3.

Ndaño Yesu wa yeva okuti ekamba liaye Lasaru o vela, eye ka sumua. Pole, o popia hati: “Oku vela oku, ka ku kuete ocimãho coku fa, puãi culamba wa Suku, okuti Mõla a Suku o muilako ulamba.” Eye o kala vali oloneke vivali kuenje o sapuila olondonge viaye hati: “Tu endi vali ko Yudea.” Olondonge vi pula viti: “A Rambei, siti va Yudea va yonguile oku ku sosola lovawe, handi wendako vali?”—Yoano 11:4, 7, 8.

Yesu o tambulula hati: “Ka kuli hẽ olowola 12 viutanya? Omunu nda enda lutanya ka lipunduka kocina cimue, momo o lete ocinyi coluali lulo. Nda omunu enda luteke o lipunduka, momo ocinyi  ka ci kasi vokuaye.” (Yoano 11:9, 10) Ci molẽha okuti Yesu wa yonguile oku popia okuti otembo Suku a sokiya yoku tẽlisa upange waye, handi ka ya pitĩlilepo. Omo liaco, o sukila oku talavaya ciwa lotembo yitito yo kambelapo.

Yesu amisako hati: “Lasaru ekamba lietu wa pekela, pole, ngendako oku ko pasula.” Olondonge vi sima okuti Lasaru wa kala ño oku pekela noke o pasuka. Kuenje olondonge viaye vi popia viti: “A Ñala, nda wa pekela, o kala ciwa.” Yesu o va sapuila ocili hati: “Lasaru wa fa . . . Pole, tuendi [toke apa a kasi].”—Yoano 11:11-15.

Tomasi wa kũlĩha okuti Yesu o pondola oku pondiwa vo Yudea. Lonjongole yoku u kuatisa o sapuila olondonge vikuavo hati: “Tu endivo, oco tu file kumue laye.”—Yoano 11:16.