Tu pondola oku popia okuti, Embimbiliya esapulo limue lia Suku. Olio lia eciwa la Isietu wo kilu oco tu longisiwe. Tu konomuisi asapulo avali a likasi okuti tunde eci a eciwa pa pita ale 2.000 kanyamo. Asapulo aco a eciwa lungelo umue o tukuiwa hati Gabriele, una ‘o tãi kovaso a Suku.’ (Luka 1:19) Ovina vipi via koka ungelo oku eca asapulo aco a kuete esilivilo lia velapo?

Ungelo Gabriele wa eca esapulo liatete kunyamo wa 3 O.Y. Kocitumãlo kupi Gabriele a ecela esapulo liaco? Citava okuti kolomunda vio ko Yudea ocipepi lo Yerusalãi. Kocitumãlo caco kua kala ocitunda cimue ca Yehova o tukuiwa hati, Sakariya. Eye kumue lukãi waye Elisavete va kuka ale kuenda ka va kuete omãla. Onjanja ya Sakariya oku enda vonembele ya Suku vo Yerusalãi oco a vumbe ndocitunda. Osimbu Sakariya a kasi vonembele, vocipikipiki Gabriele o molẽha ocipepi lutala winsensu.

Ocili okuti, Sakariya o kuata usumba. Pole, ungelo u sapuila oco ka ka yokoke poku popia laye hati: “Ku ka kuate usumba, a Sakariya, momo olohutililo viove via yeviwa kuenda ukãi wove Elisavete o ka ku citila omõla ulume kuenje o ko luka Yoano.” Gabriele amisako hati: “Eye o ka kala ulume unene kovaso a Yehova” kuenda o ka “nena ku Yehova omanu va pongiyiwa.”—Luka 1:13-17.

Sakariya, ka tava kondaka yaco. Momo lie? Momo eye kumue lukãi waye va kuka ale. Omo liaco, Gabriele o sapuila Sakariya hati: “O linga ocitende, ku tẽla oku popia vali, toke keteke ovina evi vi lingiwa, omo kua kolelele olondaka viange.”—Luka 1:20.

Vepuluvi liaco, omanu va kasi posamua, va kala oku lipula esunga lieci Sakariya a kalela otembo yalua vonembele. Noke eye o tunda, pole ka vangula. Sakariya o pondola lika oku linga olondimbukiso lovaka aye. Kuenje va limbuka okuti eye wa mola ocinjonde cimue osimbu a kala vonembele.

Eci Sakariya a mala upange waye vonembele, o tiukila konjo yaye. Noke yotembo yimue, Elisavete o mina! Osimbu eye a talamela oku citiwa kuoñaña yaye, Elisavete o kala konjo vokuenda kuolosãi vitãlo ocipãla lomanu.

Noke Gabriele o molẽha onjanja yavali. O molẽha kulie? Kaliye o molẽha kufeko umue ka kuelele o tukuiwa hati, Maria. Ufeko waco wa kala konano yo Yerusalãi kimbo li tukuiwa hati Galilea, volupale luo Nasara. Nye ungelo o sapuila? U sapuila hati: “Wa sanga ohenda ku Suku. Kuenje tala! o ka mina kuenda o cita omõla ulume, u luka Yesu.” Noke Gabriele u sapuila vali hati: “Eye o ka kala unene kuenje o ka tukuiwa Omõla a Tõlo . . . kuenje o ka viala Ndosoma yonjo ya Yakoba otembo ka yi pui kuenda Usoma waye ka u sulila.”—Luka 1:30-33.

Sokolola esanju Gabriele a kuata, omo liesumũlũho lioku eca asapulo aco avali. Poku tanga ovina vikuavo viatiamẽla ku Yoano kuenda ku Yesu, o kuata elomboloko lieci asapulo aco a tunda kilu a kuetele esilivilo.