OCIPAMA 01
Embimbiliya li Pondola Oku ku Kuatisa Ndati?
Ocili okuti, vosi yetu tu kuete apulilo atiamẽla komuenyo, kohali, kolofa kuenda kovina vio kovaso yoloneke. Tua siatavo oku kuata esakalalo liovina vieteke leteke ndomo tu pondola oku kuata olombongo vioku litekula lavio kuenda oku kuata esanju vepata. Omanu valua va limbuka okuti, Embimbiliya ka li eci lika atambululo kapulilo a velapo omuenyo, pole, li ecavo olonumbi vi kuatisa komuenyo weteke leteke. O sima hẽ okuti Embimbiliya li pondola oku kuatisa omanu vosi wa kũlĩha?
1. Api amue pokati kapulilo Embimbiliya li tambulula?
Embimbiliya li tambulula apulilo amue a velapo ndeci: Omuenyo wa fetika ndati? Cipi ocimãho comuenyo? Momo lie omanu va talela ohali? Nye ci pita eci omunu umue a fa? Nda okuti omanu vosi va yongola ombembua, momo lie uyaki wa luila? Nye ci ka pita longongo kovaso yoloneke? Embimbiliya li tu vetiya oku sanda atambululo atiamẽla kapulilo aco kuenda omanu valua va siata oku sanga atambululo aco a suapo.
2. Embimbiliya li tu kuatisa ndati oku sanjukila omuenyo weteke leteke?
Embimbiliya li tu ĩha alungulo awa. Ndeci, olio li longisa ndomo apata a pondola oku kuata esanju liocili. Li ecavo alungulo atiamẽla konjila ndomo tu liyaka lasakalalo kuenda ndomo tu sanjukila upange wetu. Ove o ka lilongisa eci Embimbiliya li popia catiamẽla kolosapi evi, ca piãla enene osimbu tu konomuisila kumosi ulandu waco. Ove o pondola oku pitĩla petosi lioku tava okuti “Ovisonehua viosi vi Kola [okuti viosi vi kasi Vembimbiliya] . . . vi silivila.”—2 Timoteo 3:16.
Ombrochura yilo ka yi piñainya Embimbiliya. Pole, oyo yi ku vetiya oku konomuisa lutate Embimbiliya. Omo liaco, tu ku vetiya oku tanga ovisonehua via tukuiwa vovipama viaco kuenda vi sokisa leci o kasi oku lilongisa.
LILONGISA ONDONGOSI
Kũlĩhĩsa ndomo Embimbiliya lia kuatisa omanu, ndomo o pondola oku sanjukila oku li tanga kuenda esunga lieci ca sungulukila oku sanda ekuatiso oco o kuate elomboloko lialio.
3. Embimbiliya li pondola oku tu songuila
Embimbiliya li kasi ndocinyi cimue. Olio li pondola oku tu kuatisa oku nõla onjila ya sunguluka loku tu sapuila ovina vi ka pita kovaso yoloneke.
Tanga Olosamo 119:105, noke konomuisa apulilo a kuãimo:
-
Usonehi wolosamo evi wa tendele ndati Embimbiliya?
-
Ove o tenda ndati Embimbiliya?
4. Embimbiliya li pondola oku tambulula apulilo etu
Ukãi umue wa limbuka okuti, Embimbiliya lia eca atambululo kapulilo a enda oku u sakalaisa vokuenda kuanyamo alua. Tala OVIDEO, noke konomuisa apulilo a kuãimo.
-
Ndomo ca lekisiwa vovideo, apulilo api ukãi waco a kuatele?
-
Eye wa kuatisiwa ndati lelilongiso Liembimbiliya?
Embimbiliya li tu vetiya oku linga apulilo. Tanga Mateo 7:7, noke konomuisa epulilo li kuãimo:
-
Apulilo api o kuete okuti Embimbiliya li pondola oku a tambulula?
5. Ove o pondola oku sanjukila oku tanga Embimbiliya
Omanu valua va sanjukila oku tanga Embimbiliya kuenda va kuatisiwa poku ci linga. Tala OVIDEO, noke konomuisa apulilo a kuãimo.
-
Ndomo ca lekisiwa vovideo, amalẽhe va liyeva ndati catiamẽla koku tanga?
-
Momo lie kaliye va kuetele ovisimĩlo via litepa viatiamẽla koku tanga Embimbiliya?
Embimbiliya li popia okuti, olio li tu ĩha olonumbi vi tu lembeleka kuenda elavoko. Tanga Va Roma 15:4, noke konomuisa epulilo li kuãimo:
-
O sanjukila hẽ ohuminyo Yembimbiliya yatiamẽla kelembeleko kuenda kelavoko?
6. Omanu vakuavo va pondola oku tu kuatisa oku kuata elomboloko Liembimbiliya
Omanu valua va limbuka okuti, oku konomuisa Embimbiliya lomanu vakuavo ci kuatisa vali okuti, oku li tanga lika liavo ci sule. Tanga Ovilinga 8:26-31, noke konomuisa epulilo li kuãimo:
-
Tu pondola oku kuata ndati elomboloko Liembimbiliya?—Tala Ovinimbu 30, 31.
Ulume umue u Etiopia wa sukilile ekuatiso oco a kuate elomboloko Liovisonehua. Omanu valua koloneke vilo, va sangavo ekuatiso liaco poku sapela catiamẽla Kembimbiliya la vakuavo
OMANU VAMUE VA POPIA VATI: “Oku lilongisa Embimbiliya oku pesela otembo.”
-
Nye o pondola oku popia? Momo lie?
NYE WA LILONGISA?
Embimbiliya li eca olonumbi viomuenyo weteke leteke, atambululo kapulilo a kuete esilivilo lia velapo, li eca komanu elembeleko kuenda elavoko.
Oku Pitulula
-
Alungulo api tu pondola oku sanga Vembimbiliya?
-
Api amue pokati kapulilo Embimbiliya li pondola oku tambulula?
-
Ovina vipi o yongola oku lilongisa Vembimbiliya?
OCO O KŨLĨHE OVINA VIKUAVO
Konomuisa ndomo olonumbi Viembimbiliya vi pondola oku tu kuatisa koloneke vilo.
“Alongiso Embimbiliya—a Kuete Esilivilo Otembo Yosi” (Utala Wondavululi No. 1 2018)
Tala ndomo Embimbiliya lia kuatisa ulume umue wa liyaka lovisimĩlo ka via sungulukile tunde vutila.
Konomuisa olonumbi Viembimbiliya viatiamẽla komuenyo wepata.
“12 Kalumbu Oco Epata li Kuate Esanju” (Omasuli! No. 2 2018)
Lilongisa ndomo Embimbiliya li lombolola ciwa ocisimĩlo cimue ka ca sungulukile omanu va kuete catiamẽla komunu o kasi oku viala oluali.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
