1, 2. Nye cu ku vetiya oku sola Yehova Suku?

OVE hẽ o sole Suku? Nda wa li tumbika ale kokuaye, citava okuti o popia hati ndi sole Yehova Suku! Tu kuete esunga lioku sola Yehova, momo Eye wa tu sola tete. Embimbiliya li popia hati: “Etu tu [sole Yehova] momo eye wa lianga oku tu sola.”​—1 Yoano 4:19.

² Yehova eye wa lianga oku tu sola. Eye wa tu ĩha ongongo okuti ocitumãlo cimue ca posoka, kuenda ovina viosi tu sukila. (Mateo 5:43-48) Wa tu ĩhavo Embimbiliya, muna tu sanga olonumbi vi tu kuatisa konepa yespiritu. Handi vali, eye o yevelela olohutililo vietu kuenda wa likuminya oku tu ĩha espiritu sandu oco li tu kuatise. (Osamo 65:2; Luka 11:13) Ca velapo vali ceci okuti, Eye wa tuma Omõlaye Ndocisembi oco a tu yovole kekandu kuenda kolofa. Yehova wa siata oku lekisa ocisola kokuetu!​—Tanga Yoano 3:16; Va Roma 5:8.

3. (a) Oco tu kale vocisola ca Suku nye tu sukila oku linga? (b) Epulilo lipi tu sukila oku konomuisa, kuenda pi tu pondola oku sanga etambululo liaco?

³ Yehova o yongola okuti tu kala vocisola caye  otembo ka yi pui. Pole, etu tu kuete elianjo lioku nõla nda tu kuatisiwa locisola caco, ale sio. Ondaka Yaye yi tu vetiya hati: “Kali vocisola ca Suku . . . [cu] neneli omuenyo ko pui.” (Yuda 21) Ondaka “kali,” yi lomboloka oku likolisilako oku kala vocisola ca Suku. Tu sukila oku lekisa okuti tua tava kocisola caye. Omo liaco, tu sukila oku li pula ndoco, ‘Ndi lekisa hẽ ndati ocisola ku Suku?’ Etambululo liaco li sangiwa volondaka viupostolo Yoano wa popia hati: “Okusola Suku kua lomboloka oku pokola kovihandeleko viaye. Ovihandeleko viaye ka vi lemi.” (1 Yoano 5:3) Nda tu yongola  oku sola Suku ndeci eye a tu sole, tu sukila oku konomuisa lutate elomboloko liolondaka evi.

4, 5. (a) Ondaka “okusola Suku” yi lomboloka nye? (b) Lombolola ndomo wa fetika oku kuatela ocisola Yehova.

⁴ Nye upostolo Yoano a yonguile oku popia londaka​—“okusola Suku”? Ondaka eyi ka yi tiamisiwila kocisola Suku a tu kuetele, pole yi lomboloka ocisola etu tu sukila oku kuatela Suku. Anga hẽ ivaluka otembo wa fetika oku sola Yehova?

⁵ Sokolola ndomo ekolelo liove lia fetika oku kula poku lilongisa olohuminyo via Yehova. Ndaño kua kuatele ukamba la Suku omo lioku citiwila vekandu, cilo wa fetika oku kuata elomboloko liokuti Yehova, vonduko ya Kristu, wa tu ĩha elavoko liomuenyo ko pui kuenda oku piñala ovina Adama a pumba. (Mateo 20:28; Va Roma 5:12, 18) Ove wa fetika oku kuatela ocisola Yehova omo lioku tuma Omõlaye oku tu fila. Utima wove wa vetiyiwa oku sola Suku omo liocisola a lekisa kokuove.​—Tanga 1 Yoano 4:9, 10.

6. Ocisola cocili ci lekisiwa ndati, kuenda cu ku vetiya oku linga nye?

⁶ Onjongole yaco, ya kala ño efetikilo lioku kuatela ocisola Yehova. Momo, ocisola ka ci lekisiwa lika lolondaka. Ocisola tu kuetele Suku ka ci lomboloka lika oku popia hati, “Ndi sole Yehova.” Momo ocisola ci lekisiwa lovituwa ndeci ekolelo li limbukiwila kovilinga. (Tiago 2:26) Ocisola ci lekisiwa lovilinga, ci sanjuisa omunu tu sole. Omo liaco, eci wa fetika oku sola Yehova lutima wove wosi, wa vetiyiwa oku linga eci ci sanjuisa Isietu wokilu. Anga hẽ wa papatisiwa ale? Nda wa papatisiwa ale, ocisola oco ca ku vetiya  oku nõla onjila ya velapo yomuenyo. Poku ci linga, wa lekisa onjongole yoku li tumbika ku Yehova oco o linge ocipango caye. (Tanga Va Roma 14:7, 8.) Voku tẽlisa ohuminyo yaco wa linga la Yehova, mua kongela olondaka viupostolo Yoano tuka tanga vocinimbu ci kuãimo.

7. Vipi ovihandeleko vimue via Suku, kuenda nye ca kongela voku vi kapako?

⁷ Yoano wa lekisa okuti oku sola Suku kua lomboloka “oku pokola kovihandeleko viaye.” Pi tu pondola oku sanga ovihandeleko via Suku? Ovihandeleko via Yehova vi sangiwa Vondaka yaye, Embimbiliya. Olio li pisa ovina vimue ndeci, uholua, evĩho liukahonga, oku fendela oviteka, oku nyana kuenda uhembi. (1 Va Korindo 5:11; 6:18; 10:14; Va Efeso 4:28; Va Kolosai 3:9) Eci ci lekisa okuti voku pokola ovihandeleko via Suku mua kongela oku kapako olonumbi Viembimbiliya.

8, 9. Tu sanjuisa ndati Yehova kovina vina okuti Embimbiliya ka li lekisa onumbi yaco? Tukula ocindekaise cimue.

⁸ Oco tu sanjuise Yehova, ka tu sukila lika oku pokola kolonumbi vina via tumbikiwa. Yehova ka tumbikile ovihandeleko viaye oco a lavulule omuenyo wetu. Citava okuti tu liyaka lovitangi vimue okuti Vembimbiliya ka mu sangiwa onumbi yaco. Kapuluvi aco, tu pondola oku kũlĩha ndati onjila yi sanjuisa Yehova? Poku tanga Embimbiliya, tu lilongisa eci Yehova a sole leci a suvuka, momo olio li situlula ciwa ovisimĩlo via Suku. (Tanga Osamo 97:10; Olosapo 6:16-19) Tu ka kũlĩha ovituwa kuenda ovilinga  eye a sole. Osimbu tu amamako oku kũlĩha olonjila via Yehova, kuenda ovituwa, ovilinga vietu vi ka vetiyiwa lovisimĩlo viaye. Eci tu liyaka locitangi cimue okuti Embimbiliya ka li lekisa onumbi yaco, tu sukila oku kũlĩhĩsa cipi “ocipango ca [Yehova.]”​—Va Efeso 5:17.

⁹ Embimbiliya ka li lekisa onumbi layimue yatiamẽla koku tala ovipama vio Televisãu vi lekisa ungangala levĩho liukahonga. Anga hẽ tu sukila onumbi yimue yatiamẽla koku tala ovina viaco? Etu tua kũlĩha ndomo Yehova a tenda ovina viaco. Ondaka yaye, yi tu sapuila hati: Yehova “utima waye u suvuka u o sole ungangala.” (Osamo 11:5) Oyo yi tu sapuilavo hati: ‘Suku o tetuluila vakuevĩho liukahonga.’ (Va Heveru 13:4) Tu pondola oku kũlĩha ocipango ca Yehova poku sokolola olonumbi viaco loku yuvula oku tala ovina Eye a suvuka. Nda tua yuvula oku tala olomapalo vina ka via sungulukile, tu ka sanjuisa Yehova. *

10, 11. Momo lie tua nõlelapo oku pokola ku Yehova, kuenda tu lekisa ndati epokolo kokuaye?

¹⁰ Esunga lipi tu kuete lioku pokola kovihandeleko via Suku? Momo lie tu sukilila oku ambata omuenyo umue u li tava lovisimĩlo via Suku? Etu ka tu pokola lika kovihandeleko via Suku oco tu puluke kekangiso kuenda kovitangi vi tunda kekandu. (Va Galatia 6:7) Momo eci tu pokola ku Yehova tu kasi oku lekisa ocisola kokuaye. Tu sukila oku likolisilako oku linga eci Yehova a sole ndeci omõla a likolisilako oku linga eci ci sanjuisa isiaye. (Osamo 5:12) Yehova eye Isietu,  kuenda etu tu u sole. Tu sanjuka calua oku limbuka okuti tu kasi oku ambata omuenyo u tu kuatisa oku “tambula ohenda [ya] Yehova.”​—Olosapo 12:2.

¹¹ Epokolo lietu haliocikukũiko, momo ka tu pokola lika nda tua panga. * Etu ka tu pokola lika kolonumbi via tu sungulukila ale vina via leluka. Pole, epokolo lietu “li tunda ocili kovitima.” (Va Roma 6:17) Tu pondola oku kuata ocisimĩlo ndeci cukualosamo wa soneha hati: “[Ndi] sole ovihandeleko viove, kuenje ndi vi sanjukila.” (Osamo 119:47) Etu tu sole oku pokola ku Yehova, momo tua limbuka okuti oku u fendela lutima wetu wosi oco ci nena esanju. (Esinumuĩlo 12:32) Tu yongola okuti Yehova o tu sapuila Olondaka ndevi a sapuila Noha. Catiamẽla kekolelo lepokolo eye a lekisa ku Suku, Embimbiliya li popia hati: ‘Noha wa linga cosi co sapuila Suku’ vokuenda kuanyamo alua.​—Efetikilo 6:22.

12. Kapuluvi api epokolo lietu li pondola oku sanjuisa Yehova?

¹² Eci tu pokola lutima wetu wosi, Yehova o liyeva ndati? Ondaka yaye yi lekisa okuti tu pondola oku “sanjuisa utima” waye. (Olosapo 27:11) Anga hẽ epokolo lietu li sanjuisa muẽle Ombiali yoluali luosi? Ocili okuti tu pondola oku sanjuisa Yehova, momo Eye wa tu lulika lelianjo lioku nõla pokati keci ciwa leci cĩvi! Etu tu nola nda tu pokola ku Suku ale sio. (Esinumuĩlo 30:15, 16, 19, 20) Etu tu sanjuisa calua Yehova eci tu pokola kokuaye lutima wetu wosi omo liocisola  tu u kuetele. (Olosapo 11:20) Poku ci linga, tu kasi oku nõla onjila ya velapo komuenyo.

13, 14. Momo lie tu popela okuti “ovihandeleko via Suku ka vi lemi,” kuenda eci ci sokisiwa la nye?

¹³ Catiamẽla kolonumbi via Yehova, upostolo Yoano o tu sapuila hati: “Ovihandeleko viaye ka vi lemi.” Kelimi Liohelasi ondaka “ka vi lemi” yi sangiwa kelivulu lia 1 Yoano 5:3, yatiamẽla ‘kocilemo.’ * Embimbiliya limue li lombolola okuti: “Ovihandeleko viaye ka vi tu kangisa.” (New English Translation) Eci ci lekisa okuti, olonumbi via Yehova ka vi pitahãla epondolo lietu. Omo liaco, vosi yetu ndaño ka tua lipuile, tu tẽla oku pokola kokuavio.

¹⁴ Sokolola okuti ekamba liove li yongola oku iluka. Kuenje o pinga kokuove oco u kuatiseko oku ambata ovikuata viaye. Vimue pokati kovikuata viaco via lela, vikuavo via lema. Kuenje ekamba liove, li nõla ovitele vimue oco o vi ambate. Anga hẽ ekamba liove nda lia ku kisika oku ambata ovitele vina ku tẽla oku ambata? Sio. Eye ka ecelela okuti ove ambata ocilemo caco lika liove. Cimuamue haico Suku yetu ukuacisola a linga, eye ka tu ĩha ovihandeleko vina ka tu tẽla oku pokola. (Esinumuĩlo 30:11-14) Eye lalimue eteke a ka tu kisika oku ambata ovilemo viaco. Yehova “wa  kũlĩha ovatimba etu, ivaluka okuti tuneketela.”​—Osamo 103:14.

15. Momo lie tua kolelela okuti ovihandeleko via Yehova via tumbikiwila oku tu kuatisa?

¹⁵ Ovihandeleko via Yehova ka vi lemi, ovio via tumbikiwila oku tu kuatisa. (Tanga Isaya 48:17.) Mose wa popia la va Isareli hati: “Yehova wa tu sapuila oku linga ovisila evi viosi loku sumbila Yehova Suku yetu okuti tu kala ciwa oloneke viosi kuenje eye o tu muisa omuenyo ndeci tu kasi etaili.” (Esinumuĩlo 6:24) Tu sukila oku kolela okuti Yehova wa tu ĩha ovihandeleko viaye, oco vi tu kuatise oku kala otembo ka yi pui. Eye ka tu ĩha olonumbi ka tu tẽla oku vi pokola. Yehova, eye Suku yukũlĩhĩso wa velapo. (Va Roma 11:33) Eye wa kũlĩha eci ca velapo komuenyo wetu. Ocisola oco ocituwa ca velapo ca Yehova. (1 Yoano 4:8) Ocituwa caco, oco ociseveto covihandeleko viosi via eciwa kafendeli vaye.

16. Ndaño ka tua lipuile kuenda tu liyaka lovitangi vialua, momo lie tu sukilila oku lekisa epokolo?

¹⁶ Eci ka ci lomboloka okuti oku pokola ku Suku ca leluka. Tu sukila oku tamalãla loluali lulo lua vĩha “lu kasi povaka eliapu.” (1 Yoano 5:19) Tu sukilavo oku liyaka letimba lietu ka lia lipuile, momo li tu vetiya oku lueya olonumbi via Suku. (Va Roma 7:21-25) Pole, ocisola tu kuetele Suku ci tu kuatisa oku yula ovitangi viaco. Yehova o sumũlũisa vana va lekisa ocisola kokuaye. Eye, eca espiritu sandu liaye “komanu vosi va pokola kokuaye.” (Ovilinga 5:32) Espiritu liaco, li tu kuatisa oku ima apako awa, okuti ovituwa viwa vina vi tu vetiya oku pokola.​—Va Galatia 5:22, 23.

17, 18. (a) Nye tu ka konomuisa velivulu lilo, kuenda ci ka tu kuatisa ndati oku kuata olondunge? (b) Nye tu ka konomuisa vocipama ci kuãimo?

 ¹⁷ Velivulu lilo, tu ka konomuisa olonumbi via Yehova lovihandeleko vimue viomuenyo, kuenda evi viatiamẽla kocipango caye. Osimbu tu amamako oku ci linga, tuka kuata olondunge. Tu sukila oku ivaluka okuti Yehova ka tu kisika oku pokola kovihandeleko viaye, pole o yongola okuti tu pokola kokuaye lutima wetu wosi. Ka tu ka ivaliko okuti Yehova o tu vetiya oku kuata ovituwa vi nena asumũlũho cilo, kuenda omuenyo ko pui kovaso yoloneke. Tu ka konomuisavo ndomo epokolo li lekisiwa lutima wosi, li tu kuatisa oku lekisa ocisola ku Yehova.

¹⁸ Yehova wa tu lulika lolondunge vi tu kuatisa oku tepisa eci ciwa leci cĩvi. Oco utima wetu u koleliwe, tu sukila oku pindisa olondunge vietu ndomo tu ka ci konomuisa vocipama ci kuãimo.