Esapulo 67: Yehosafata wa Lekisile Ekolelo ku Yehova
OVE hẽ wa kũlĩha alume ava kuenda eci va kasi loku linga? Ovo va limãleha oku enda kuyaki. Alume vakuavo va kasi loku imba. Pamue ove o pondola oku lipula ndoco: ‘Oco hẽ momo lie alume vaco va kuetele olosipata lolonjelia vioku yaka?’ Tu konomuisi esunga liaco.
Yehosafata wa kala osoma yuviali wapata avali a va Isareli. Eye wa kala kotembo yimuamue ya Soma Ahava la Isevele va vialele kapata ekũi liusoma woko nano. Eye wa kala osoma yimue yiwa ndeci ca kala isiaye Asa. Vokuenda kuanyamo alua omanu vana va tiamẽlele kuviali wokombuelo wapata avali, va kala lombembua kuenda omuenyo uwa.
Pole, kueya oku pita ocina cimue ca vetiya omanu oku kuata usumba. Olomunga vimue vieya ku Yehosafata loku popia hati: ‘Olohoka via va Moavi la va Amoni lava voko Munda Seire, va kasi lokuiya oku liyaka love.’ Valua va Isareli va liongoluila ko Yerusalãi oku pinga ekuatiso ku Yehova. Ovo va enda ko nembele kuenje Yehosafata wa fetika oku likutilila hati: ‘A Yehova a Suku yetu, ka tua kũlĩhihe eci tu linga. Ka tu kuete ongusu yoku liyaka lolohoka evi viakahandangala. Tua imba ovaso kokuove oco o tu kuatise.’
Yehova wa yeva kohutililo yaco kuenje wa tuma umue ukuenje waye oku sapuila omanu hati: ‘Ko ka saluki, momo haneko vu ka yaka, te Suku. Kuendiko, ka talameli ño ha vu moli ndomo Yehova u popeli.’
Eci kuaca omẽle, Yehosafata wa sapuila omanu hati: ‘Koleli Yehova.’ Noke wa kapa olonjimbi kovaso yolohoka. Kuenje va fetika oku enda loku imba ovisungo ku Yehova. Ove hẽ wa kũlĩha eci ceya oku pita eci ovo va pitila ocipepi lovanyali vavo? Yehova wa lingisa okuti ovanyali vavo va liponda ovo muẽle pokati. Eci va Isareli va petula ovaso, va mola ovanyali vavo okuti vosi yavo va fa.
Ocili okuti, Yehosafata poku kolela ku Yehova wa lekisa olondunge viocili. Etu tu pondolavo oku lekisa olondunge viocili poku kolela ku Yehova.
1 Olosoma 22:41-53; 2 Asapulo 20:1-30.
Apulilo
- Helie wa kala Yehosafata? Kuenda eye wa kala kotembo yipi?
- Momo lie va Isareli va kuatela usumba? Kuenda nye valua pokati kavo va linga?
- Yehova wa tambuluile ndati ohutililo ya Yehosafata?
- Nye Yehova a linga eci handi ovo ka va endele kuyaki?
- Nye tu lilongisila ku Yehosafata?
Apulilo akuavo
- Tanga 2 Asapulo 20:1-30.
Ocituwa cipi Yehosafata a lekisile okuti oco afendeli va Suku va sukila oku setukula eci va liyaka lovitangi? (2 Asa. 20:12; Osa. 25:15; 62:1)
Tunde kosimbu Yehova o kuete ono yoku pitiya ondaka yaye komanu. Koloneke vilo hẽ ono yipi eye a siata oku pitiyila ondaka yaye komanu? (2 Asa. 20:14, 15; Mat. 24:45-47; Yoa. 15:15)
Eci Suku aka nena “ovita vieteke linene lia Suku Tõlo” ekalo lietu lika sokisiwa ndati leli lia Yehosafata? (2 Asa. 20:15, 17; 32:8; Esit. 16:14, 16)
Akundi va velapo kuenda olomisionariu via siata ndati oku setukula epata lia va Lewi poku kundila ondaka Yusoma koluali luosi? (2 Asa. 20:19; Va Rom. 10:13-15; 2 Tim. 4:2)
