1, 2. Momo lie o simĩla okuti ohutililo ombanjaile yimue yilikasi, kuenda momo lie tu sukilila oku kũlĩha eci Embimbiliya li longisa catiamẽla kohutililo?

ONGONGO yitito calua oku yi sokisa loluali luosi. Eci Yehova a vandekela palo posi, omanu vo kolofeka viosi kokuaye va kasi ndetosi liovava vociyenjo. (Osamo 115:15; Isaya 40:15) Ndaño okuti ka tu sokisiwa loluali, pole, Osamo 145:18, 19 yi popia hati: “Yehova o kasi ocipepi la vosi vo vilikiya, okuti vo vilikiya ocili. O muisa vosi vo sumbila evi va yongola. O yeva uteto wavo, o va popela.” Tu kuete esumũlũho limue li komõhisa! Yehova ululiki wetu, o yongola okuti tu kuata ukamba laye, kuenda o yongolavo oku yevelela olohutililo vietu. Ohutililo esumũlũho, kuenda ombanjaile yimue yilikasi Yehova a eca komunu lomunu pokati ketu.

² Pole, Yehova o tu yevelela lika nda tua sapela laye lonjila yi taviwa laye. Tu pondola oku ci linga ndati? Tu konomuisi eci Embimbiliya li popia catiamẽla kohutililo.

3. Momo lie o sukilila oku likutilila ku Yehova?

³ Yehova o yongola okuti ove o likutilila, ale o sapela laye. Tua ci kũlĩha ndati? Tanga ukanda wa Va Filipoi 4:6, 7. Sokolola eci catiamẽla kelaleko liaco. Ombiali yoluali luosi ya ku kapako calua, kuenje yi yongola okuti, o sapela layo catiamẽla kovisimĩlo viove, kuenda kovitangi viove.

4. Oku likutilila ku Yehova olonjanja viosi ci pamisa ndati ukamba wove laye?

 ⁴ Ohutililo yi tu kuatisa oku kuata ukamba la Yehova. Nda akamba va sapela olonjanja viosi catiamẽla kovisimĩlo viavo, kasakalalo, kuenda kovina vikuavo, ukamba wavo wamamako oku pamisiwa. Cimuamue haico ci pita letu poku likutilila ku Yehova. Lekuatiso Liembimbiliya, eye wa siata oku ku situluila ovisimĩlo viaye, kuenda oku sapuila ovina a ka linga kovaso yoloneke. O pondolavo oku situlula ovisimĩlo viove poku sapela laye olonjanja viosi. Osimbu amamako oku ci linga, ukamba wove la Yehova u pamisiwa calua.—Tiago 4:8.

5. Tua kũlĩha ndati okuti Yehova ka yevelela olohutililo viosi?

⁵ Anga hẽ Yehova o yevelela olohutililo viosi? Sio, ka yevelela. Kotembo yuprofeto Isaya, Yehova wa sapuilile va Isareli hati: “[Eci] vu likutilila olohutililo via lua siu yevi,  momo ovaka ene a kusuka ngẽ osonde.” (Isaya 1:15) Omo liaco, nda ka tua lavuluile, tu pondola oku linga ovina vi tepa ukamba wetu la Yehova, kuenje ka yevelela vali olohutililo vietu.

6. Momo lie ekolelo li kuetele esilivilo? O lekisa ndati okuti o kuete ekolelo?

⁶ Nda tu yongola okuti Yehova o yevelela olohutililo vietu, tu sukila oku kolela kokuaye. (Marko 11:24) Upostolo Paulu wa lombolola ndoco: “Oku sanjuisa Suku ka ku tẽliwa te lekolelo, momo wosi amela ku Suku loku u fendela o sukila oku kolela okuti eye o kasi lomuenyo kuenda eca onima kuava vo sanda lutima wosi.” (Va Heveru 11:6) Ka tu sukila lika oku popia okuti tu kuete ekolelo. Pole, tu sukila oku lekisa ekolelo lietu poku pokola ku Yehova oloneke viosi.—Tanga Tiago 2:26.

7. (a) Momo lie tu sukilila oku lekisa umbombe kuenda esumbilo poku li kutilila ku Yehova? (b) Tu lekisa ndati okuti tu kasi oku vangula ocili poku likutilila?

⁷ Tu sukila oku lekisa umbombe lesumbilo poku likutilila ku Yehova. Momo lie? Nda tu yongola oku sapela losoma yimue ale lombiali yimue, tu ci linga lesumbilo. Omo okuti Yehova eye Suku Ukuonene wa velapo, ka tu sukila hẽ oku lekisa esumbilo lia velapo lumbombe poku sapela laye? (Efetikilo 17:1; Osamo 138:6) Tu sukilavo oku kala vakuacili kuenda oku likutilila lutima wetu wosi okuti, ka tu pitolola olondaka vimuamue.—Mateo 6:7, 8.

8. Eci tu likutilila catiamẽla kocina cimue, nye tu sukila oku linga?

⁸ Eci tu likutilila catiamẽla kocina cimue, tu sukila oku likolisilako oku linga ovina vi likuata leci tu kasi oku pinga vohutililo. Nda tu likutilila ku Yehova oco a tu ĩhe ovina tu sukila oloneke viosi, ka tu ka kuati owesi loku kevelela okuti Yehova o tu ĩha ovina viosi, osimbu okuti tu tẽla oku linga upange  waco. Tu sukila oku likolisilako oku talavaya kuenda oku tava ovopange osi tu tẽla oku linga. (Mateo 6:11; 2 Va Tesalonike 3:10) Nda tua likutilila ku Yehova oco a tu kuatise oku yuvula oku linga ocina cimue ka ca sungulukile, tu sukila oku yuvula ovina vi pondola oku tu yonja. (Va Kolosai 3:5) Tu konomuisi apulilo amue a siata oku lingiwa atiamẽla kohutililo.

9. Kulie tu sukila oku likutilila? Elivulu lia Yoano 14:6, li tu longisa nye catiamẽla kohutililo?

⁹ Kulie tu sukila oku likutilila? Yesu wa longisa olondonge viaye oku likutilila ndoco: “A Isietu o kasi kilu.” (Mateo 6:9) Eye wa popiavo hati: “Ame ndinjila, haime ndicili, haime ndimuenyo. Lomue iya ku Isia, te lame.” (Yoano 14:6) Omo liaco, tu sukila oku likutilila lika ku Yehova vonduko ya Yesu. Oku likutilila vonduko ya Yesu ci lomboloka nye? Oco Yehova a tave olohutililo vietu, tu sukila oku lekisa esumbilo kocikele cilikasi a eca ku Yesu. Ndomo tua lilongisa, Yesu weyile palo posi oco a tu yovole kekandu kuenda kolofa. (Yoano 3:16; Va Roma 5:12) Yehova wa nõla Yesu oco a kale Ocitunda Cinene kuenda Onganji.—Yoano 5:22; Va Heveru 6:20.

10. Anga hẽ kuli onjila yimue yilikasi yi lekisa ndomo tu kala poku likutilila? Ci lombolola.

¹⁰ Anga hẽ kuli onjila yimue yilikasi yi lekisa ndomo tu kala poku likutilila? Sio, momo Yehova ka pingi kokuetu okuti poku likutilila tu kekama kolongolo, tu tumala ale tu talama. Embimbiliya li tu longisa okuti tu pondola oku sapela laye lonjila yimue yi lekisa esumbilo. (1 Asapulo 17:16; Nehemiya 8:6; Daniele 6:10; Marko 11:25) Ndomo tu kala poku likutilila ku Yehova, hacoko ci kuete esilivilo lia velapo. Pole, ca velapo oku sapela laye lonjila yimue ya sunguluka. Poku likutilila tu pondola oku vangula lolukandi, ale tu vanguila vutima povitumãlo viosi tu kasi, ci kale vokuenda kueteke ale kuteke. Eci tu likutilila  ku Yehova tu pondola oku kolela okuti, o tu yevelela, ndaño ceci okuti lomue o tu yevelela.—Nehemiya 2:1-6.

11. Ovina vipi tu pondola oku sapuila ku Yehova vohutililo?

¹¹ Nye tu sukila oku pinga vohutililo? Vohutililo yetu tu pondola oku pinga ovina viosi vi taviwa la Yehova. Embimbiliya li popia hati: “Nda tu pinga ovina viosi vi likuata locipango caye, eye o tu yeva.” (1 Yoano 5:14) Tu pondola hẽ oku likutilila catiamẽla kovina vietu muẽle? Tu pondola. Oku likutilila ku Yehova ku sokisiwa loku sapela lekamba lietu. Tu pondola oku sapuila ku Yehova ovisimĩlo viosi vi kasi vutima wetu. (Osamo 62:8) Tu pondolavo oku likutilila kokuaye oco espiritu sandu liaye li tu kuatise oku linga ovina via sunguluka. (Luka 11:13) Handi vali, tu pondola oku pinga ku Yehova oco a tu ĩhe olondunge vioku nõla onjila ya sunguluka, kuenda oku likutilila oco a tu pamise poku liyaka lovitangi. (Tiago 1:5) Tu sukila oku pinga ku Yehova ongecelo yakandu etu. (Va Efeso 1:3, 7) Tu sukilavo oku kongela vohutililo yetu omanu vakuavo, epata lietu, kuenda vamanji vekongelo.—Ovilinga 12:5; Va Kolosai 4:12.

12. Nye ci kuete esilivilo lia velapo volohutililo vietu?

¹² Nye ci kuete esilivilo lia velapo volohutililo vietu? Yehova kuenda ocipango caye. Tu sukila oku eca olopandu kokuaye lutima wosi omo liovina viosi a siata oku tu lingila. (1 Asapulo 29:10-13) Tua kũlĩha ovina viaco, momo eci Yesu a kala palo posi wa longisa olondonge viaye ndomo via sukilile oku likutilila. (Tanga Mateo 6:9-13.) Eye wa popia hati, tete via sukilile oku tukula onduko ya Suku vohutililo oco yi sumbiwe, kuenda oku yi tenda okuti yi kola. Noke, Yesu wa lekisa okuti, tu sukila oku kongela vohutililo yetu oku iya Kusoma wa Suku, oco ocipango caye ci lingiwe palo posi. Yesu wa popia hati, noke yoku tukula vohutililo ovina vi kuete esilivilo lia velapo, oco lika tu pondola oku tukula ovina tu  sukila. Nda poku likutilila tete tu tukula Yehova kuenda ocipango caye, tu lekisa okuti, ovina viaco ovio vi kuete esilivilo lia velapo kokuetu.

13. Otembo yiñami tu sukila oku pesila kolohutililo vietu?

¹³ Otembo yiñami tu sukila oku pesila kolohutililo vietu? Embimbiliya ka li tukula otembo yaco. Tu pondola oku linga ohutililo vokuenda kuotembo yitito, ale vokuenda kuotembo yalua. Osimbu ka tua fetikile okulia, tu pondola oku linga ohutililo vokuenda kuotembo yitito. Pole, tu pondolavo oku likutilila vokuenda kuotembo yalua, eci tu sapela la Yehova catiamẽla kasakalalo etu, ale poku eca olopandu kokuaye. (1 Samuele 1:12, 15) Ka tu yongola oku linga ohutililo vokuenda kuotembo yalua  oco tu komõhise omanu vakuavo, ndeci omanu vamue va enda oku linga koloneke via Yesu. (Luka 20:46, 47) Yehova ka komõha lolohutililo viaco. Ca velapo kokuaye oku likutilila lutima wetu wosi.

14. Olonjanja viñami tu sukila oku likutilila, kuenda ovina viaco vi tu longisa nye catiamẽla ku Yehova?

¹⁴ Olonjanja viñami tu sukila oku likutilila? Yehova o tu laleka oco tu sapele laye olonjanja viosi. Embimbiliya li popia hati, tu sukila oku ‘likutilila olonjanja viosi,’ oku ‘pandikisa lolohutililo,’ kuenda oku amamako oku ‘likutilila.’ (Mateo 26:41; Va Roma 12:12; 1 Va Tesalonike 5:17) Yehova wa siata oku tu yevelela olonjanja viosi. Tu pondola oku eca olopandu kokuaye oloneke viosi omo liocisola, kuenda ocali caye. Tu pondolavo oku pinga kokuaye olonumbi,  ongusu kuenda elembeleko. Nda tua lekisa esilivilo kesumũlũho tu kuete lioku likutilila ku Yehova, tu pondola oku sapela laye olonjanja viosi.

15. Momo lie tu sukilila oku popia tuti “amene” kesulilo liohutililo?

¹⁵ Momo lie kesulilo liohutililo tua siatela oku popia tuti “amene”? Ondaka “amene,” yi lomboloka okuti, “tua tava” ale “ci lingiwe.” Poku ci linga tu lekisa okuti, tu kuete elomboloko liovina tua tukula vohutililo, kuenda tua ci linga lutima wosi. (Osamo 41:13) Embimbiliya li tu longisa okuti, ciwa nda tu popia tuti “amene” kesulilo liohutililo yimue yi lingiwila powiñi, ci kale okuti tu ci popela kutima ale lolukandi, oco tu lekise okuti tu tava kovina via popiwa.—1 Asapulo 16:36; 1 Va Korindo 14:16.

16. Anga hẽ Yehova o tambulula olohutililo vietu? Ci lombolola.

¹⁶ Anga hẽ Yehova wa siata oku tambulula olohutililo vietu? Wa siata oku vi tambulula. Embimbiliya liu tukula hati, ‘Ukuakuyeva olohutililo.’ (Osamo 65:2) Yehova wa siata oku yeva loku tambulula olohutililo vi lingiwa lomanu valua, kuenda o ci linga volonjila via litepa.

17. Yehova wa siata oku tambulula ndati olohutililo vietu lekuatiso liovangelo kuenda liafendeli vaye va kasi palo posi?

¹⁷ Yehova wa siata oku tambulula olohutililo vietu lekuatiso liovangelo kuenda liafendeli vaye va kasi palo posi. (Va Heveru 1:13, 14) Kuli ovolandu alua a lekisa okuti, omanu vamue va likutilila oco va pinge ekuatiso lioku kuata elomboloko Liembimbiliya. Noke vokuenda kuotembo yitito va nyuliwa Lombangi yimue ya Yehova. Embimbiliya li lekisa okuti ovangelo va kasi oku kuatisa kupange woku kunda “olondaka viwa” voluali luosi. (Tanga Esituluilo 14:6.) Valua pokati ketu tua siata oku likutilila ku Yehova catiamẽla kovitangi vietu ale kovina tu sukila, kuenda tua siata oku  tambula ekuatiso tu sukila li tunda ku vamanji.—Olosapo 12:25; Tiago 2:16.

18. Yehova o tambulula ndati olohutililo vietu lekuatiso liespiritu sandu kuenda Embimbiliya?

¹⁸ Yehova o tambulula olohutililo vietu lekuatiso liespiritu sandu. Eci tu likutilila oco a tu kuatise poku liyaka locitangi cimue, citava okuti o tu kuatisa lespiritu sandu liaye oco a tu ĩhe olonumbi kuenda ongusu. (2 Va Korindo 4:7) Yehova wa siatavo oku tambulula olohutililo vietu lekuatiso Liembimbiliya, oco li tu kuatise oku nõla onjila ya sunguluka. Eci tu tanga Embimbiliya tu pondola oku sanga ovinimbu vi tu kuatisa. Yehova o pondolavo oku vetiya manji umue oku eca etambululo kohongele oco a popie ovina tu sukila, ale ukulu umue wekongelo oco a tangele kumosi letu ocinimbu cimue Cembimbiliya.—Va Galatia 6:1.

19. Momo lie olonjanja vimue tu simĩla okuti Yehova ka tambulula olohutililo vietu?

¹⁹ Pamue tu lipula ndoco: ‘Momo lie Yehova ka tambuluila olohutililo viange toke cilo?’ Ivaluka okuti, eye wa kũlĩha otembo yoku tambulula olohutililo vietu kuenda ndomo a vi tambulula. Eye wa kũlĩhavo ovina tu sukila. Citava okuti pamue tua siata oku likutilila vokuenda kuotembo yalua oco tu lekise okuti tu yongola ovina tua pinga kokuaye, kuenda tua kolela kokuaye. (Luka 11:5-10) Olonjanja vimue Yehova o tambulula olohutililo vietu lonjila yimue ka tua lavokaile. Citava okuti tu likutilila eci catiamẽla kocitangi cimue, ndaño okuti ka maliko ocitangi caco, pole o tu ĩha ongusu oco tu pandikise.—Tanga Va Filipoi 4:13.

20. Momo lie tu sukilila oku likutilila ku Yehova olonjanja viosi?

²⁰ Tu kuete esumũlũho lia velapo lioku likutilila ku Yehova! Tua kolela okuti eye o pondola oku tu yevelela. (Osamo 145:18) Nda tua likutilila olonjanja viosi ku Yehova lutima wosi, ukamba wetu laye u pamisiwa.