Yesu wa popela omanu vakuekolelo poku eca omuenyo waye ndocisembi. (Mateo 20:28) Omo liaco, Embimbiliya li tukula Yesu okuti ‘Upopeli woluali.’ (1 Yoano 4:14) Olio li popiavo okuti: “Handi vali, ka kuli epopelo komunu ukuavo, momo ka kuli onduko yikuavo vemẽhi lilu okuti, ya eciwa pokati komanu oco tu popeliwe layo.”—Ovilinga 4:12.

 Yesu wa fila vosi va kolela kokuaye. (Va Heveru 2:9; Yoano 3:16) Noke, “Suku wo pindula kuava va fa” kuenje wa tiukila kilu letimba liespiritu. (Ovilinga 3:15) Eci ca ecelela okuti, Yesu “o tẽla oku popela olumue vana va likutilila ku Suku vonduko yaye. Eye o tẽla oku va popela, momo eye olonjanja viosi o kasi lomuenyo oco a pinge ku Suku okuti o va kuatisa.”—Va Heveru 7:25.

Momo lie tu sukilila oku ecelela okuti Yesu o linga kapitiya ketu?

 Momo vosi tuakuakandu. (Va Roma 3:23) Ekandu li kasi ndocimbaka cimue pokati ketu la Suku kuenda ekandu liaco, lituala kolofa. (Va Roma 6:23) Pole, Yesu o kasi “ndonganji” ku vana va kolela kocisembi caye. (1 Yoano 2:1, etosi) Yesu o linga kapitiya kavo, poku pinga ku Suku oco a yeve olohutililo viavo kuenda oku ecela akandu avo. Eye o ci linga pocakati cocisembi caye. (Mateo 1:21; Va Roma 8:34) Suku o yevelela apingilo aco omo a likuata locipango Caye. Suku wa tuma Yesu palo posi, “oco oluali lu popeliwe pocakati caye.”—Yoano 3:17.

Anga hẽ tu sukila lika oku kolela ku Yesu oco tu popeliwe?

 Sio. Ocili okuti, tu sukila oku kolela ku Yesu oco tu popeliwe, pole, hacoko lika. (Ovilinga 16:30, 31) Embimbiliya li popia okuti: “Cimuamue haico okuti, ndeci etimba ka li kuete efuimo lia fa, haicovo okuti, ekolelo ka li kuete ovilinga lia fa.” (Tiago 2:26) Oco tu popeliwe tu sukila:

•   Oku lilongisa catiamẽla ku Yesu kuenda ku Isiaye, Yehova.—Yoano 17:3.

•   Oku kolela kokuavo.—Yoano 12:44; 14:1.

•   Oku lekisa ekolelo lietu poku pokola kovihandeleko viavo. (Luka 6:46; 1 Yoano 2:17) Yesu wa longisa okuti havosiko vo tukula vati a “Ñala” va popeliwa, ‘te lika vana va linga ocipango ca Isiaye o kasi kovailu.’—Mateo 7:21.

•   Oku amamako oku lekisa ekolelo ndaño lovitangi. Yesu wa ci lekisa ciwa eci a popia hati: “Una o pandikisa toke kesulilo, o ka popeliwa.”—Mateo 24:13.