Oco, momo Suku o yongola okuti, omanu va liongolola oco vo fendele. Embimbiliya liti: “Tu likapiko pokati oco tu livetiyi locisola kuenda lovilinga viwa, ka tu ka liwekipo oku liongolola kolohongele vietu.”—Va Heveru 10:24, 25, etosi.

 Yesu wa lekisa okuti, olondonge viaye via laikele oku kala ocimunga cimue ca sokiyiwa ciwa eci a popia okuti: “Poku ci linga, vosi va ka limbuka okuti vulondonge viange, nda wa lisoli pokati.” (Yoano 13:35) Oco olondonge vi lekise ocisola caco, via sukilile oku liongolola la vamanjavo konepa yespiritu. Ovo va laikele oku sokiyiwa vakongelo kuenda oku liongolola olonjanja viosi oco va fendele. (1 Va Korindo 16:19) Vosi yavo, va ponduile oku kala ongongela ya vamanji.—1 Petulu 2:17.

Ku Sukiliwa Ovina Vikuavo Okuti Oku Tiamẽla Lika Ketavo Limue ci Sule

 Embimbiliya li popia okuti, omanu va sukila oku liongolola oco va fendele Suku. Pole, olio ka li longisa okuti, omunu umue o pondola oku sanjuisa Suku omo a tiamẽla ketavo limue. Oco li taviwe la Suku, etavo liomunu, li sukila oku u kuatisa komuenyo waye. Ndeci, Embimbiliya li popia hati: “Onjila yoku fendela ya lipua haiyo ya pua evĩho kovaso a Suku yetu haeye Isia, yeyi: oku tata olosiwe kuenda ovimbumba kohali yavo, loku li lava keliño lioluali.”—Tiago 1:27, etosi.