Yesu ka tumĩle olondonge viaye oku cita omãla ndaño oku vi vetiya oco vi yuvule oku cita. Kuenda lomue pokati kolondonge viaye wa eca ocihandeleko caco. Handi vali, Embimbiliya ka li pisa oku yuvula oku cita omãla valua. Ca tiamẽla kondaka yaco, onumbi yi sangiwa kelivulu lia Va Roma 14:12, yi popia hati: “Omunu omunu o lilombolola ku Suku.”

 Olohueli vi kuete elianjo lioku linõlela oku cita omãla ale sio. Ovio vi kuetevo elianjo lioku nõla etendelo liomãla va yongola oku kuata kuenda otembo va fetika oku cita omãla vaco. Nda ulume lukãi waye va nõlapo oku nyua ovihemba vi tateka oku mina, ocikele caco cavo. Lomue o kuete omoko yoku va pisa.—Va Roma 14:4, 10-13.