Suku o yongola okuti ove u kũlĩha ciwa, o linga ekamba liaye, u sola kuenda u vumba lutima wove wosi. (Mateo 22:37, 38; Tiago 4:8) O pondola oku kũlĩha ndomo o linga ocipango ca Suku poku lilongisa eci catiamẽla komuenyo wa Yesu kuenda kalongiso aye. (Yoano 7:16, 17) Yesu ka vanguile lika catiamẽla kocipango ca Suku, pole, wa ci kapeleko komuenyo waye. Yesu wa popele okuti ocimãho comuenyo waye haku lingako ‘ocipango caye, pole, oku linga ocipango cu wo tuma.’—Yoano 6:38.

Anga hẽ oco ndi kũlĩhe cipi ocipango ca Suku catiamẽla komuenyo wange, ndi sukila ondimbukiso yimue yilikasi, ocinjonde, ale oku kovongiwa?

 Sio, momo Vembimbiliya mu sangiwa esapulo Suku a eca komanu. Mu sangiwavo ovina o sukila oco ‘o loñolohe loku liangiliyila upange wosi uwa.’ (2 Timoteo 3:16, 17) Suku o yongola okuti ove o talavaya Lembimbiliya kuenda ‘uloño wove woku sokolola’ oco o lilongise ocipango caye catiamẽla kokuove.—Va Roma 12:1, 2; Va Efeso 5:17.

Anga hẽ ndi tẽla oku linga ocipango ca Suku?

 O tẽla oku ci linga, momo Embimbiliya li popia hati: “Ovihandeleko [via Suku] ka vi lemi.” (1 Yoano 5:3) Eci ka ci lekisa okuti oku pokola kolonumbi via Suku olonjanja viosi ca leluka. Pole, esumũlũho li tunda koku pokola kolonumbi viaco lia velapo okuti alikolisilo o linga ci sule. Yesu wa popia hati: “Va sumũlũha vana va yeva ondaka ya Suku kuenje va yi kapako!”—Luka 11:28.