Ululiki wetu, wa tumbika ovihandeleko vi songuila olohuela eci handi ka kua kaile ombiali yimue ya kapa ovihandeleko viatiamẽla kolohuela. Elivulu liatete Liembimbiliya, li popia ndoco: “Ulume o sia isiaye la inaye hã ha litokeka lukãi waye, kuenje va linga etimba limuamue.” (Efetikilo 2:24) Kelimi lio Heveru ondaka ‘ukãi’ ndomo ya lomboluiwa vondisionaliu yimue, “yi lomboloka omunu o kuete ovimatamata viuyali via litepa lovimatamata viulume.” Yesu wa lombolola okuti “ulume lukãi,” ovo lika va pondola oku tokekisa olohuela.—Mateo 19:4.

 Suku wa yonguile okuti, olohuela vi amamako otembo ka yi pui, okuti pokati kulume lukãi pa kala elitokeko locisola. Ulume lukãi va lulikiwila oku likuatisa pokati, oco va tẽlise olonjongole viavo, konepa yespiritu, loku tẽlisa onjongole yoku lipekela okuti va cita omãla.