Embimbiliya li tukula lika onjanja yimosi catiamẽla koku litakula kelivulu Liovisila 19:28, ndoco: “Ko ka litakuli vetimba.” Suku wa eca ocihandeleko caco kepata lia va Isareli, kuenje ca va tepisile lomanu va lisunguile lavo, vana va enda oku litakula vetimba olonduko ale olondimbukiso violosuku viavo. (Esinumuĩlo 14:2) Ndaño okuti ocihandeleko ca eciwile ku va Isareli ka ci tiamisiwila Kakristão, ci kuete esilivilo oku kapako onumbi oku kua kunamẽla ocihandeleko caco.

Citava hẽ Okuti Akristão va litakula?

 Ovinimbu Viembimbiliya vi kuãimo, vi ka ku kuatisa oku sokolola ciwa catiamẽla kulandu owu:

•   “Akãi, ndi va yonguila okuti va liposuisa luwalo wa sunguluka.” (1 Timoteo 2:9, Embimbiliya li Kola) Onumbi yaco yi kapiwako ci kaile kakãi kuenda kalume. Tu sukila oku sumbila ovisimĩlo via vakuetu kuenda oku yuvula oku tiamisila utima kokuetu muẽle.

•   Vamue va litakula oco va situlule ekalo liavo, ale ocituwa cavo coku litumila, vakuavo va ci lingila oku lekisa okuti, va linga eci va yongola letimba liavo. Kuenje Embimbiliya li vetiya ndoco Kakristão: ‘Eci atimba ene ndocilumba ci kasi lomuenyo, ci kola, haico ci taviwa la Suku okuti, upange u kola luloño wene woku sokolola.’ (Va Roma 12:1) Talavaya ‘luloño wove woku sokolola’ oco o limbuke esunga lieci o litakuila. Nda o ci lingila omo lioku kuama ovina viokaliye, ale oku lekisa okuti wa tiamẽla kocimunga cimue, ivaluka okuti oku litakula ku kala otembo ka yi pui kuenda noke o ka livela. Oku kũlĩhĩsa lutate ovisimĩlo viove, ci ka ku kuatisa oku nõla onjila ya sunguluka.—Olosapo 4:7.

•   “Asokiyo omunu ukuambili, a nena muẽle onima yiwa, pole, vosi vakuanjanga va ka kala olohukũi.” (Olosapo 21:5) Oku nõlapo oku litakula, onjila yimue ya siata oku nõliwa lonjanga, pole, oyo yi pondola oku kokela ovitangi komunu vokuenda kuotembo yalua volonepa viatiamẽla koku kuela kuenda kovopange. Handi vali, oku liupa olondimbukiso wa litakula ca tĩla calua kuenda ci vala. Akonomuiso kuenda oku livokiya kuolosipitali viupa olondimbukiso vioku litakula, vi lekisa okuti, omanu valua va litakula noke veya oku livela.