Embimbiliya ka li tukula eteke Yesu a citiwa kuenda ka li tu sapuilavo okuti tu sukila oku linga ocipito ceteke a citiwa. Elivulu limue (Cyclopedia de McClintock e Strong) li lombolola okuti: “Ocipito Conatale ka ca tundile ku Suku kuenda ka ci sangiwa vo Testamento Yokaliye.”

 Nda tua kũlĩhĩsa ciwa, tu ka limbuka okuti ocipito Conatale ca tunda kovihilahila viatavo esanda. Embimbiliya li lekisa okuti nda tua fendela Yehova lonjila yimue ka ya sungulukile, eye o sumua.—Etundilo 32:5-7.

1.   Ocipito ceteke lioku citiwa kua Yesu: “Akristão vatete ka va endaile oku linga ocipito coku citiwa kua Yesu momo va kũlĩhĩle okuti ocituwa caco ca tunda kefendelo liesanda.”—Enciclopédia Delta Universal.

2.   Eteke 25 ya Cembanima: Ka kuli uvangi u lekisa okuti Yesu wa citiwa keteke liaco. Citava okuti asongui vatavo esanda va nõla eteke liaco oco li likuate lovipito viatavo esanda via enda oku lingiwa vokuenda kuotembo yonjovo.

3.   Olombanjaile kuenda ovipito: Elivulu limue lio kofeka yo Amerika li lombolola hati: “Ocipito ca va Roma cina va enda oku linga kosãi ya Cembanima, omanu veya oku ci pongolola vati, eteke Lionatale. Kocipito caco ku eciwa olombanjaile loku timĩha olovela.” Elivulu likuavo okuti, o Enciclopédia Britanica, lia lombolola okuti, “upange wosi kuenda olomĩlu ka via lingiwile vali” vokuenda Kuocipito caco.

4.   Ovinyi Vionatale: Ndomo o Enciclopédia da Religião, yi lombolola, omanu kofeka yo Europa va enda oku posuisa olonjo viavo “poku kapamo ovinyi vi wumbula” oco va linge ocipito caco loku lupuisa olondele.

5.   Ovisku kuenda o azevinyu: Kolofeka vialua ovikũla viaco, ovio omanu va siata oku posuisa lavio Ponatale. “Va Druida va enda oku tenda ovisku ndocikũla cimue coku tãha. O azevinyu okuti otembo yosi yi talala, va enda oku yi fendela ndohuminyo yimue yokuti Utanya u tua.”—The Encyclopedia Americana.

6.   Uti wonatale: “Ocituwa coku fendela oviti okuti ca enda oku lingiwa lomanu vana okuti ka va kuete etavo vokofeka yo Europa, camamako oku lingiwa ndaño muẽle ceci ovo va linga vakuetavo.” Ocituwa ca siata oku lingiwa koloneke vilo, “oku kapa uti umue wonatale poku iñilila ale vokati konjo vokuenda kuovipito vokati kunyamo.”—Encyclopædia Britannica