Sio. Embimbiliya li popia lonjila ya suapo okuti, Suku wa lulika omanu kuenda “olombuto” via litepa viovinyama kuenda ovikũla. a (Efetikilo 1:12, 21, 25, 27; Esituluilo 4:11) Embimbiliya li popiavo okuti omanu vosi va tunda kocitumbulukila ca Adama la Eva, olonjali vietu viatete. (Efetikilo 3:20; 4:1) Ulandu Wembimbiliya ka u tava kocisimĩlo cokuti Suku wa talavaya lovina via tukuluka ño oco a lulike oviendalomuenyo via litepa. Ocisimĩlo caco ca kũlĩhĩwa okuti ovina via tukuluka ño. Handi vali, Embimbiliya litava kakonomuiso violonoño liokuti kuli ovina via litepa vombuto yimuamue. b

•  Kovina vipi vamue vatava?

•  Embimbiliya litava hẽ kelongiso liokuti ovina via tuluka ño?

•  Uloño wovikũla kuenda wovinyama woku likisa ekalo, li situlula hẽ okuti elongiso liokuti ovina via tukuluka ño liocili?

 Omanu vana vatava okuti Suku wa talavaya lovina via tukuluka ño oco a lulike oviendalomuenyo via litepa, va kuete ovisimĩlo vialua via li yekala oco va lombolole ndomo ovina viaco viapita. Ndomo ca lekisiwa vo Enciclopedia Britanika, omanu vamue vatava okuti oviendalomuenyo via litepa, “vimue pokati kovina Suku a kuama oco a songuile oluali.”

 Handi vali vana va teyuila elongiso liaco vatava kovisimĩlo vikuãimo ndeci:

•   Ovina viosi vi kasi lomuenyo vi tunda ku va kukululu yavo vo kosimbu.

•   Ombuto yimue yi pondola oku licita kuenda oku linga ombuto yikuavo ya litepa.

•   Lonjila eyi, Suku eye o kasi oku songuila ovina viaco.

 Ocisimĩlo cokuti ovina via tukuluka ño ci eca elomboloko liokuti ulandu u sangiwa kelivulu liefetikilo ka wa suilepo. Pole, Yesu wa lombolola okuti ulandu u sangiwa kelivulu liefetikilo wa koleliwa. (Efetikilo 1:26, 27; 2:18-24; Mateo 19:4-6) Embimbiliya li popia okuti, osimbu Yesu keyile palo posi eye wa kala kilu kuenda wa kuatisa Suku oku lulika “ovina viosi.” (Yoano 1:3) Kuenje ocisimĩlo cokuti Suku wa talavaya lovina via tukuluka ño oco a lulike oviendalomuenyo via litepa, ka li taviwa Lembimbiliya.

 Embimbiliya ka lilombolola ovina via litepa vi pondola oku pita vokati “kombuto” yimue. Embimbiliya ka li patãlavo okuti ovikũla via litepa kuenda ovinyama via lulikiwa la Suku, vi pondola oku pita va pongoloko osimbu vilicita ale vilikisa lekalo vi kasi. Vamue va ci tukula okuti catukuluka ño, pole, oku likisa kuaco ka ku pondola oku tukuluka ombuto yo kaliye ale ekalo li kuavo liomuenyo.