Oco. Embimbiliya li pondola oku tu kuatisa oku yuvula oku livetela evelo. (Olosamo 86:5) Nda tua linga cimue ka ca sungulukile, pole, tu likekembela lutima wosi, Suku o tu ecela kuenda o tu kuatisa oku kavuluka. (Olosamo 86:5) Embimbiliya li lekisa okuti, ovisimĩlo vioku livetela evelo olonjanja vimue vi kuatisa momo vi tu vetiya oku linga apongoloko kuenda oku likolisilako oku yuvula oku linga eci ka ca sungulukile. (Olosamo 51:17; Olosapo 14:9) Embimbiliya li tu lungula oco tu yuvule oku livetela calua evelo, loku sima okuti ka tu kuete vali elavoko ale ka tu sesamẽla vali oku taviwa la Suku. Nda tu kuete ovisimĩlo viaco, ci tu kokela oku yuliwa “lesumuo lialua.”—2 Va Korindo 2:7.

•  Nye ci koka ovisimĩlo vioku livetela evelo?

•  Ndi liwekapo ndati oku livetela evelo?

•  Ovinimbu Viembimbiliya via tiamẽla koku livetela evelo kuenda kongecelo

 Tu pondola oku livetela evelo omo liasunga alua. Tu kuata ovisimĩlo viaco, nda tua lueyela umue tu sole ale oku yuvula oku linga cimue tua sima okuti tu kuete epondolo lioku ci linga. Olonjanja vimue, tu livetela evelo ndaño ka kuli esunga liaco. Ndeci, nda tua lisokiyila etu muẽle ovihandeleko via kãla calua, citava okuti tu kuata ovisimilo ka via sungulukile vioku livetela evelo olonjanja viosi ka tu tẽlisa ovihandeleko viaco. Eli olio esunga lieci Embimbiliya li tu vetiyila oku litumbikila ovina tu tẽla oku linga.—Ukundi 7:16.

 Ku ka tiamisile utima koku livetela eve, pole, tetulula ocitangi caco. Ndamupi?

•   Tava kakulueya ove. Likutilila ku Yehova a Suku oco a ku ecele. (Olosamo 38:18; Luka 11:4) Kolela okuti Suku o ka ku yevelela nda ove wa likekembela kuenda ku pitulula vali akulueya ove. (2 Asapulo 33:13; Olosamo 34:18) Eye o lete eci ci kasi vutima womunu okuti, laumue omunu o pondola oku ci mola. Eci Suku a limbuka okuti tu likolisilako oku siapo oku linga eci cĩvi, “eye wa kolelua haeye ukuesunga, ecela akandu etu.”—1 Yoano 1:9; Olosapo 28:13.

   Omo liaco, nda wa lueyela umue, o sukila oku tava kuenda oku pinga ongecelo komunu waco lutima wosi. Pole, ka ca lelukile! Ci sukila utõi kuenda umbombe. Pole, o sukila oku kapako ovina vivali vi kuete esilivilo: Ove o ka liyeva ciwa kuenda o ka tumbulula vali ombembua wa kuatele lomunu ukuavo.—Mat 3:8; 5:23, 24.

•   Sokolola kovisonehua via tiamẽla kohenda ya Suku. Ndeci, kũlĩhĩsa 1 Yoano 3:19, 20. Embimbiliya li lekisa okuti “ovitima vietu vi tu pisa,” omo liaco tu sukila oku lekisa utõi kuenda umbombe, oco tu limbuke ocisola ca Suku ka ci pongoloka. Handi vali, ocinimbu ci lekisavo okuti “Suku wa velapo, ovitima vietu vi sule.” Ndamupi? Eye wa kũlĩha ovina viosi viatiamẽla kokuetu kuenda wa kapoko ovisimĩlo lahonguo etu. Eye wa kũlĩhavo okuti tua citiwila vekandu kuenda utima wetu wa tiamẽla lika koku linga eci cĩvi. b (Olosamo 51:5) Eye o tava vana va likekembela lutima wosi akandu avo.—Olosamo 32:5.

•   Liwekapo oku sokolola ovina vĩvi wa linga kosimbu. Vembimbiliya mu sangiwa ovolandu alua alume kuenda akãi vana va linga ovina vĩvi pole, noke va pongolola ekalo liomuenyo wavo. Umue pokati kavo Saulu wo ko Tarsu, okuti noke weya oku kũlĩhĩwa okuti upostolo Paulu. Omo okuti wa kala u Fariseo, wa lambalala calua olondonge via Yesu. (Ovilinga 8:3; 9:1, 2, 11) Pole, noke yoku lilongisa okuti o kasi oku yaka la Suku kuenda Mesiya ale Kristu, wa likekembela, wa pongolola ekalo liomuenyo waye kuenje wa linga Ukristão ukuangangu yiwa. Omo liaco, Paulu wa likekembela lutima wosi, pole wa liwekapo oku tiamisila utima kovina a linga kosimbu. Omo lioku limbuka ohenda ya piãla ya Suku, Paulu wa linga ukundi umue ukuambili kuenda lalimue eteke a puile elavoko liomuenyo ko pui.—Va Filipoi 3:13, 14.

 Yeremiya 31:34: “Momo ngecela evĩho liavo, lakandu avo si a ivaluka vali.”

 Elomboloko: Nda Suku wa tu ecela, lalimue eteke a ka tu ivaluisa vali akulueya etu. Ohenda yaye ya piãla.