ئاللاغا بويسۇنغانلار بەرىكەتلەرگە ئېرىشىدۇ
مۇسا پەيغەمبەر: «خۇدايىڭلار يەھۋانىڭ ئەمرلىرىگە ئەمەل قىلساڭلار، بەرىكەت تاپىسىلەر»،— دەپ ئېيتقان (تەكرار قانۇن 10:13؛ 11:27). نېمە ئۈچۈن پەرۋەردىگارغا بويسۇنىمىز؟ ئۇنىڭ جازاسىدىن قېچىش ئۈچۈنمۇ؟ ياق. ئۇنىڭ ئېسىل پەزىلەتلىرى بىزنى جەلپ قىلغاچ، ئۇنىڭغا بويسۇنىمىز. بىز خۇدانى سۆيگەچ، ئۇنىڭ كۆڭلىنى رەنجىتىدىغان ئىشلاردىن نېرى تۇرىمىز. «خۇدانى سۆيۈش ئۇنىڭ ئەمرلىرىگە بويسۇنۇش دېمەكتۇر».—1-يۇھاننا 5:3.
ئەمما، ھازىر خۇداغا بويسۇنۇپ، ئېرىشىدىغان بەرىكەتلەردىن ئىككىسىنى كۆرۈپ چىقايلى.
1. ئاللاغا بويسۇنۇش دانا قىلىدۇ
«ساڭا پايدىلىق بولغاننى ئۆگەتكۈچىمەن، سېنى مېڭىشىڭ كېرەك بولغان يولدا يېتەكلىگۈچىمەن».—يەشايا 48:17.
پەرۋەردىگار يەھۋا بىزنى ياخشى بىلىدۇ ۋە بىزگە كېرەكلىك يول-يورۇقنى بېرىدۇ. بىز دانا قارارلارنى چىقىرىشنى خالىساق، مۇقەددەس يازمىلاردىن ئاللانىڭ بىزدىن نېمىلەرنى تەلەپ قىلىدىغانلىقىنى ئۆگىنىشىمىز ۋە شۇ بىلىملەرگە ماس ھايات كەچۈرۈشىمىز كېرەك.
2. ياراتقۇچىغا بويسۇنۇش بەختلىك قىلىدۇ
«خۇدانىڭ سۆزىنى ئاڭلاپ، ئۇنىڭغا ئەمەل قىلغانلار بەختلىكتۇر!».—لۇقا 11:28.
بۈگۈنكى كۈندە مىليونلىغان ئىنسانلار ئاللانىڭ سۆزىگە ئىتائەت قىلىپ، ھەقىقىي خۇشاللىقتىن بەھرىمەن بولۇۋاتىدۇ. ئىسپانىيەدىكى بىر كىشىنىڭ مىسالىنى كۆرۈپ چىقايلى. ئۇ قېنى قىزىق ئادەم ئىدى ۋە باشقىلارغا، ھەتتا ئايالىغىمۇ قوپال مۇئامىلە قىلغان. ئۇ بىر كۈنى مۇسا پەيغەمبەر يازغان كىتابتىن ياقۇپ پەيغەمبەرنىڭ كەمتەر ئوغلى يۈسۈپ ھەققىدە ئوقۇپ قالدى. يۈسۈپ قۇللۇققا سېتىلغان ۋە ناھەق زىندانغا تاشلانغان ئىدى. شۇنداقتىمۇ، ئۇ كەمتەر، تىنچلىقپەرۋەر ۋە كەچۈرۈمچان بولغان (يارىتىلىش 37—45-بابلار). يۇقىرىدا تىلغا ئېلىنغان كىشى مۇنداق دەيدۇ: «يۈسۈپنىڭ مىسالى ھەققىدە چوڭقۇر ئويلىنىش مېنى كەمتەرلىك ۋە ئۆزىنى تۇتۇۋېلىشقا ئوخشاش خىسلەتلەرنى يېتىلدۈرۈشكە ئۈندىدى. مانا، ئەمدى خۇشال-خۇرام ھايات كەچۈرۈۋاتىمەن».
مۇقەددەس يازمىلاردا يەنە باشقىلارغا قانداق مۇئامىلە قىلىش ھەققىدە نۇرغۇن مەسلىھەتلەر بار. بۇ توغرۇلۇق كېلەركى ماقالىدە كۆرۈپ چىقىمىز.
بۇلارغىمۇ قىزىقىشىڭىز مۇمكىن
بەختلىك تۇرمۇشقا ئېرىشىشنىڭ ئاچقۇچى — ھەقىقىي ئىمان-ئېتىقاد!
كىشىلىك تۇرمۇشنى ياخشىلاشقا ياردەم بېرىدىغان مەسلىھەتلەر
مۇقەددەس كىتابتا نىكاھ مەسىلىسىنى ھەل قىلىش ، غەزەپنى كونترول قىلىش ، زەھەرلىك چېكىملىك چېكىشنى يېڭىش ، ئىرقىي كەمسىتىشنى يېڭىش ، زوراۋانلىقتىن ۋاز كېچىش ۋە باشقىلارغا ياردەم بېرەلەيدىغان دانا نەسىھەتلەر بار.
