49-دەرس
بەخت-سائادەتلىك ئائىلە. 1-قىسىم
يېڭى توي قىلغانلار توي كۈنى ھېس قىلغان شاد-خۇراملىقنىڭ مەڭگۈ داۋام قىلىشىنى ئۈمىد قىلىدۇ. بۇ ھەرگىزمۇ قۇرۇق خام-خىيال ئەمەس! تۇرمۇش قۇرغىنىغا نۇرغۇن يىللار بولغان، مۇقەددەس كىتابنىڭ نەسىھىتىنى ئەمەلىي قوللىنىشقا تىرىشقان مەسىھ ئەگەشكۈچىلىرى بۇنىڭ مۇمكىنلىكىنى بىلىدۇ.
1. مۇقەددەس كىتابتا ئەرلەر ئۈچۈن قانداق نەسىھەتلەر بار؟
ياراتقۇچى يەھۋا ئەر كىشىنى ئائىلىنىڭ بېشى قىلىپ تەيىنلىگەن (ئەفەسلىكلەر 5:23-نى ئوقۇڭ). ئۇ ئەر كىشىنىڭ ئۆز ئائىلىسىگە پايدىلىق قارار چىقىرىشىنى تەلەپ قىلىدۇ. مۇقەددەس كىتاب ئەرلەرگە، ئاياللىرىڭلارنى داۋاملىق سۆيۈڭلار دەپ نەسىھەت بېرىدۇ (ئەفەسلىكلەر 5:25). بۇ نېمىنى بىلدۈرىدۇ؟ كۆيۈمچان ئەر مەيلى ئۆيدە ياكى ئاممىۋىي سورۇنلاردا بولسۇن، ئۆز ئايالىغا مېھرىبانلىق بىلەن مۇئامىلە قىلىدۇ. ئۇ ئايالىنى زىيان-زەخمەتتىن قوغدايدۇ ۋە پۈتۈن كۈچى بىلەن جىسمانىي ۋە ھېسسىي جەھەتتىكى ئېھتىياجلىرىنى قامدايدۇ (1-تىموتىي 5:8). ئەڭ مۇھىمى، ئۇ ئايالىنىڭ يەھۋا بىلەن يېقىن دوستلۇق ئورنىتىشىغا ياردەم بېرىدۇ (مەتتا 4:4). مەسىلەن، ئۇ ئايالى بىلەن بىرگە دۇئا قىلالايدۇ ۋە مۇقەددەس كىتابنى ئوقالايدۇ. ئەر ئۆز ئايالىغا مېھرىبانلىق بىلەن كۆڭۈل بۆلگەندە، ئۇ ئۆزىنىڭ يەھۋا بىلەن بولغان دوستلىقىنى ساقلىيالايدۇ.—1-پېترۇس 3:7-نى ئوقۇڭ.
2. مۇقەددەس كىتابتا ئاياللار ئۈچۈن قانداق نەسىھەتلەر بار؟
خۇدا سۆزىدە ئاياللار ئەرلىرىنى چوڭقۇر ھۆرمەتلىسۇن دېيىلگەن (ئەفەسلىكلەر 5:33). ئايال كىشى بۇنى قانداق قىلالايدۇ؟ ئۇ ئېرىنىڭ ياخشى پەزىلەتلىرى، شۇنىڭدەك ئۆزىگە ۋە بالىلىرىغا غەمخورلۇق قىلىش ئۈچۈن كۆرسەتكەن تىرىشچانلىقى توغرۇلۇق چوڭقۇر ئويلىنىپ كۆرسە بولىدۇ. ھەتتا ئېرى ئۆزى بىلەن ئوخشاش دىندا بولمىسىمۇ، ئۇ ئېرىنىڭ چىقارغان قارارلىرىنى قوللاش، ئۇنىڭغا مۇلايىملىق بىلەن سۆزلەش ۋە ئۇ ھەققىدە باشقىلارغا ياخشى گەپ-سۆزلەرنى ئېيتىش ئارقىلىق ھۆرمەت كۆرسىتەلەيدۇ.
3. ئەر-خوتۇن نىكاھىنى قانداق مۇستەھكەملىيەلەيدۇ؟
مۇقەددەس كىتاب ئەر-خوتۇنلار ھەققىدە مۇنداق دەيدۇ: «ئىككىسى بىر تەن بولىدۇ» (مەتتا 19:5). دېمەك، ئۇلار سۆيگۈ-مۇھەببەت رىشتىسىنى ئاجىزلاشتۇرىدىغان خاھىشلارغا قارشى كۈرەش قىلىشى كېرەك. ئۇلار دائىم بىللە ۋاقىت ئۆتكۈزۈش ۋە مېھىر-مۇھەببەت بىلەن ئۆزئارا ئوچۇق-ئاشكارە پىكىر ئالماشتۇرۇش ئارقىلىق شۇنداق قىلىدۇ. ئۇلار يەھۋادىن باشقا ھېچكىم ياكى ھېچنېمىنىڭ ئۆز جۈپتىدىن مۇھىم بولۇشىغا يول قويمايدۇ. ئۇلار بولۇپمۇ ئۆز جۈپتىدىن باشقا كىشىلەر بىلەن يېقىن مۇناسىۋەتتە بولۇپ كېتىشتىن ئېھتىيات قىلىدۇ.
چوڭقۇرراق قېزىڭ
مۇقەددەس كىتابتىكى قايسى پرىنسىپلار نىكاھىڭىزنى مۇستەھكەم قىلالايدىغانلىقىنى كۆرۈپ چىقىڭ.
4. ئەرلەر، ئايالىڭلارنى سۆيۈڭلار ۋە ئۇلارغا غەمخورلۇق قىلىڭلار
مۇقەددەس كىتابتا ئەرلەرنىڭ ئۆز ئاياللىرىنى ئۆز تېنىنى سۆيگەندەك سۆيۈشى كېرەكلىكى ئېيتىلغان (ئەفەسلىكلەر 5:28، 29). بۇ نېمىنى بىلدۈرىدۇ؟ فىلىمنى كۆرۈڭ، كېيىن تۆۋەندىكى سوئال ئۈستىدە ئويلىنىپ كۆرۈڭ.
-
ئەرلەر ئۆز ئايالىنى سۆيىدىغانلىقى ۋە ئۇنىڭغا كۆڭۈل بۆلىدىغانلىقىنى قايسى بەزى يوللار بىلەن ئىپادىلىيەلەيدۇ؟
كولوسىلىقلار 3:12-نى ئوقۇڭ، كېيىن تۆۋەندىكى سوئالغا جاۋاب بېرىڭ:
-
ئەر كىشى بۇ پەزىلەتلەرنى نىكاھىدا قانداق كۆرسىتەلەيدۇ؟
5. ئاياللار، ئېرىڭلارنى سۆيۈڭلار ۋە ھۆرمەتلەڭلار
ئېرى يەھۋاغا خىزمەت قىلسۇن-قىلمىسۇن، مۇقەددەس كىتاب ئاياللارنى ئېرىگە ھۆرمەت كۆرسىتىشكە دەۋەت قىلىدۇ. 1-پېترۇس 3:1، 2-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
-
ئەگەر ئېرىڭىز يەھۋا گۇۋاھچىسى بولمىسا، شەك-شۈبھىسىزكى ئۇنىڭ يەھۋاغا خىزمەت قىلىشىنى بەكمۇ ئۈمىد قىلىسىز. سىزنىڭچە، ئۇنىڭغا ياردەم بېرىشنىڭ ئەڭ ئۈنۈملۈك يولى قانداق؟ توختىماي ئۇنىڭغا ۋەز قىلىشمۇ ياكى مېھرىبانلىق بىلەن ئۇنىڭغا ياخشى مۇئامىلە قىلىپ، ھۆرمەت كۆرسىتىشمۇ؟ نېمە ئۈچۈن؟
ئەر-ئاياللار بىرلىكتە ياخشى قارارلارنى چىقىرالايدۇ. ئەمما، بەزى چاغلاردا ئايالى ئېرىنىڭ قارارىغا قوشۇلماسلىقى مۇمكىن. شۇنداق ۋەزىيەتتە، ئۇ ئېغىر-بېسىق بولۇپ، ھۆرمەت بىلەن ئۆز ئوي-پىكرىنى ئېيتسا بولىدۇ. ئەمما، ئۇ چوقۇم يەھۋانىڭ ئەر كىشىگە ئائىلە ئۈچۈن ئەڭ پايدىلىق قارارنى چىقىرىش مەسئۇلىيىتىنى تاپشۇرغانلىقىنى ئېتىراپ قىلىشى كېرەك. ئۇ چوقۇم ئېرىنىڭ چىقارغان قارارىنى پۈتۈنلەي قوللاپ-قۇۋۋەتلىشى كېرەك. شۇنداق قىلىش ئارقىلىق، ئۇ بىر ئائىلە كىشىلىرىنىڭ خۇشال كەيپىياتنى ساقلىشىغا ئۆز ھەسسىسىنى قوشىدۇ. 1-پېترۇس 3:3–5-نى ئوقۇڭ، كېيىن تۆۋەندىكى سوئالغا جاۋاب بېرىڭ:
-
ئايال ئېرىگە ھۆرمەت قىلغاندا، يەھۋا قانداق ھېس-تۇيغۇدا بولىدۇ؟
6. نىكاھىڭلاردىكى قىيىنچىلىقلارنى يېڭەلەيسىلەر
ھېچبىر نىكاھ مۇكەممەل ئەمەس. شۇڭلاشقا، ئەر-خوتۇنلار قىيىنچىلىقلارنى يېڭىش ئۈچۈن بىرلىكتە تىرىشىشى لازىم. فىلىمنى كۆرۈڭ، كېيىن تۆۋەندىكى سوئال ئۈستىدە ئويلىنىپ كۆرۈڭ.
-
بۇ فىلىمدىكى، ئەر-ئايالنىڭ نىكاھ رىشتىسىنىڭ ئاجىزلىشىپ كېتىۋاتقانلىقى نېمىدىن كۆرىنىدۇ؟
-
ئۇلار نىكاھ رىشتىسىنى مۇستەھكەملەش ئۈچۈن قانداق قەدەملەرنى تاشلىدى؟
1-كورىنتلىقلار 10:24 ۋە كولوسىلىقلار 3:13-نى ئوقۇڭ. ھەربىر ئايەتنى ئوقۇغاندىن كېيىن تۆۋەندىكى سوئالغا جاۋاب بېرىڭ:
-
بۇ نەسىھەتنى ئەمەلىي قوللىنىش نىكاھ رىشتىسىنى قانداق كۈچەيتەلەيدۇ؟
مۇقەددەس كىتاب بىزنى بىر-بىرىمىزگە ھۆرمەت كۆرسىتىشكە دەۋەت قىلىدۇ. ھۆرمەت كۆرسىتىش بىر كىشىگە مېھرىبان مۇئامىلە قىلىپ، ئۇنى قەدىرلەشنى كۆرسىتىدۇ. رىملىقلار 12:10-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
-
ئۇ ماڭا ئاۋۋال ھۆرمەت كۆرسەتسۇن، دەپ ئەر-ئاياللار بىر-بىرىنى كۈتۈپ تۇرۇشى كېرەكمۇ؟ نېمە ئۈچۈن؟
بەزىلەر مۇنداق دەيدۇ: «ئارىمىزدىكى مۇھەببەت سوۋۇپ كەتتى».
-
مۇقەددەس كىتابنىڭ ئۇلارغا ياردەم بېرەلەيدىغانلىقىنى قانداق چۈشەندۈرۈپ بېرەلەيسىز؟
خۇلاسە
ئەر-ئايال بىر-بىرىنى سۆيسە، بىر-بىرىنى ھۆرمەتلىسە ۋە مۇقەددەس كىتاب پرىنسىپلىرىنى ئەمەلىي قوللانسا، شاد-خۇرام تۇرمۇش كەچۈرەلەيدۇ.
تەكرارلاش
-
ئائىلىنىڭ بەختلىك بولۇشىغا ئەر كىشى ئۆز ھەسسىسىنى قانداق قوشالايدۇ؟
-
ئائىلىنىڭ بەختلىك بولۇشىغا ئايال كىشى ئۆز ھەسسىسىنى قانداق قوشالايدۇ؟
-
توي قىلغان بولسىڭىز، مۇقەددەس كىتابتىكى قايسى پرىنسىپ، نىكاھ رىشتىڭىزنى مۇستەھكەملەشكە ياردەم بېرەلەيدۇ؟
ئىزدىنىپ كۆرۈڭ
بىر ئائىلە كىشىلىرىنىڭ شاد-خۇرام تۇرمۇش كەچۈرۈشى ئۈچۈن بېرىلگەن ئەمەلىي مەسلىھەتلەرنى بىلىۋېلىڭ.
خۇدانىڭ نەسىھەتلىرىنى نىكاھىڭىزدا ئەمەلىي قوللىنىش قانداق بەرىكەتلەرنى ئېلىپ كېلىدىغانلىقىنى تەسۋىرلەيدىغان مۇزىكىلىق فىلىمنى كۆرۈپ چىقىڭ.
ئەر كىشىنىڭ ئائىلە بېشى بولۇش ھوقۇقىنى ئېتىراپ قىلىش نېمە بىلدۈرىدىغانلىقىنى بىلىۋېلىڭ.
«نېمە ئۈچۈن ئاياللار باشچىلىققا بويسۇنۇشى كېرەك؟» («كۈزىتىش مۇنارى»، 2010-يىل، 15-ماي)
بىر جۈپ ئەرـئايال ھەتتا نىكاھتىن ئاجرىشىشنى ئۆز ئىچىگە ئالغان تۇرمۇشىدىكى ئېغىر قىيىنچىلقلارنى قانداق يەڭگەن؟
«بىز خۇدانىڭ ياردىمى بىلەن نىكاھلىق تۇرمۇشىمىزنى ئەسلىگە كەلتۈردۇق» (14:5)
بۇلارغىمۇ قىزىقىشىڭىز مۇمكىن
كۆپ سورالغان سوئاللار
مۇقەددەس كىتابنى تەتقىق قىلىش دېگەن نېمە؟
مۇقەددەس كىتابنى ھەقسىز تەتقىق قىلىش پروگراممىمىز ھەققىدە سوئاللارغا جاۋاب ئېلىڭ.
