34-دەرس
بىز يەھۋانى سۆيىدىغانلىقىمىزنى قانداق كۆرسىتەلەيمىز؟
مۇقەددەس كىتابنى تەتقىق قىلىشنى باشلىغاندىن بۇيان ئۆزىڭىزنى خۇداغا يېقىن ھېس قىلدىڭىزمۇ؟ ئۇنىڭ بىلەن بولغان دوستلۇق مۇناسىۋىتىڭىزنى كۈچەيتىشنى خالامسىز؟ ئەگەر شۇنداق بولسا، ئېسىڭىزدە بولسۇنكى، سىزنىڭ خۇداغا بولغان سۆيگۈ-مۇھەببىتىڭىز كۈچەيگەنسېرى، ئۇمۇ سىزنى تېخىمۇ ياخشى كۆرىدۇ ۋە غەمخورلۇق قىلىدۇ. ئۇنداقتا، سىز خۇدانى سۆيىدىغانلىقىڭىزنى قانداق كۆرسىتەلەيسىز؟
1. يەھۋاغا بولغان سۆيگۈمىزنى قانداق كۆرسىتەلەيمىز؟
بىز يەھۋانىڭ ئەمىرلىرىگە بويسۇنۇش ئارقىلىق ئۇنىڭغا بولغان سۆيگۈمىزنى كۆرسىتىمىز (1-يۇھاننا 5:3-نى ئوقۇڭ). ئۇ ھېچكىمنى ئۆزىگە بويسۇنۇشقا مەجبۇرلىمايدۇ. ئەكسىچە، ئۇ ھەربىرىمىزگە تاللاش ئەركىنلىكىنى بەرگەن. نېمە ئۈچۈن؟ چۈنكى، يەھۋا ئۇنىڭغا چىن دىلىمىزدىن بويسۇنۇشىمىزنى خالايدۇ (رىملىقلار 6:17، 18). باشقىچە ئېيتقاندا، ئۇ بىزنىڭ مەجبۇرىي ئەمەس، بەلكى ئۇنى سۆيگەنلىكىمىز ئۈچۈن، ئۇنىڭغا بويسۇنۇشىمىزنى ئۈمىد قىلىدۇ. بۇ كىتابنىڭ 3، 4-قىسىملىرى يەھۋا ياقتۇرىدىغان ئىشلارنى قىلىش ۋە ئۇ ياقتۇرمايدىغان نەرسىلەردىن يىراق تۇرۇش ئارقىلىق ئۇنىڭغا بولغان سۆيگۈمىزنى كۆرسىتىشىمىزگە ياردەم بېرىش مەقسىتىدە يېزىلغان.
2. نېمە ئۈچۈن يەھۋاغا بولغان سۆيگۈ-مۇھەببىتىمىزنى كۆرسىتىش قىيىن بولۇشى مۇمكىن؟
«ئادىل كىشى دۇچ كېلىدىغان قىيىنچىلىقلار كۆپ بولار» (زەبۇر 34:19). ھەممىمىز نامۇكەممەللىكىمىز بىلەن كۈرەش قىلىمىز. يەنە ئىقتىسادىي قىيىنچىلىق، ئادالەتسىزلىك ۋە باشقا قىيىنچىلىقلارغا دۇچ كېلىشىمىز مۇمكىن. بىز قىيىن ئەھۋالغا دۇچ كەلگەندە، يەھۋانىڭ دېگىنى بويىچە قىلىش قىيىن، ئەمما ئۆزىمىزنىڭ ئوي-پىكىرى بويىچە قىلىش ئاساندەك بىلىنىشى مۇمكىن. بىراق، سىز يەھۋانىڭ تەلەپ قىلغانلىرىنى ساداقەتمەنلىك بىلەن ئورۇنلىسىڭىز، ئۇنى ھەرقانداق نەرسىدىن بەكرەك ياخشى كۆرىدىغانلىقىڭىزنى كۆرسىتىسىز. ئۆزىڭىزنىڭ ئۇنىڭغا سادىق ئىكەنلىكىنى ئىسپاتلايسىز. شۇنىڭ بىلەن، ئۇمۇ سىزگە سادىق بولىدۇ ۋە ھەرگىز سىزنى تاشلىمايدۇ.—زەبۇر 4:3-نى ئوقۇڭ.
چوڭقۇرراق قېزىڭ
نېمە ئۈچۈن يەھۋاغا بويسۇنۇشىڭىزنىڭ مۇھىملىقىنى ۋە ئۇنىڭغا بولغان ساداقەتمەنلىكىڭىزنى ساقلاشقا نېمە ياردەم بېرىدىغانلىقىنى بىلىۋېلىڭ.
3. سىز بىلەنمۇ باغلىنىشلىق بىر مەسىلە
مۇقەددەس كىتابنى ئوقۇغىنىمىزدا، شەيتان ئايۇپ پەيغەمبەرنىڭلا ئەمەس، بەلكى يەھۋاغا خىزمەت قىلىشنى خالىغانلارنىڭ ھەممىسىنىڭ نىيەت-مەقسەتلىرىدىن گۇمانلانغان. ئايۇپ 1:1، 6–2:10-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
-
شەيتاننىڭ سۆزلىرىگە ئاساسلانغاندا، ئايۇپ نېمە ئۈچۈن يەھۋاغا بويسۇنغان؟—ئايۇپ 1:9–11-ئايەتلەرنى كۆرۈڭ.
-
شەيتان بارلىق ئىنسانلارنى ۋە سىزنى قانداق ئەيىبلىگەن؟ —ئايۇپ 2:4-ئايەتنى كۆرۈڭ.
ئايۇپ 27:5-نى ئوقۇڭ، كېيىن تۆۋەندىكى سوئالغا جاۋاب بېرىڭ:
-
ئايۇپ يەھۋانى چىن قەلبىدىن سۆيگەنلىكىنى قانداق ئىسپاتلىغان؟
ئايۇپ يەھۋاغا ساداقەتمەنلىكىنى ساقلاپ، ئۆزىنىڭ سۆيگۈ-مۇھەببىتىنى ئىسپاتلىغان
بىز يەھۋاغا بولغان ساداقەتمەنلىكىمىزنى ساقلاش ئارقىلىق ئۇنىڭغا بولغان سۆيگۈ-مۇھەببىتىمىزنى ئىسپاتلايمىز
4. يەھۋانىڭ كۆڭلىنى خۇرسەن قىلىڭ
پەندى-نەسىھەت 27:11-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
-
سىز دانالىق بىلەن يول تۇتۇپ، يەھۋاغا بويسۇنسىڭىز، ئۇ قانداق ھېس-تۇيغۇدا بولىدۇ؟ نېمە ئۈچۈن؟
5. سىز يەھۋاغا سادىق بولالايسىز
يەھۋاغا بولغان سۆيگۈ-مۇھەببىتىمىز بىزنى باشقىلارغا ئۇ ھەققىدە ئېيتىشقا دەۋەت قىلىدۇ. ئۇنىڭغا بولغان ساداقەتمەنلىكىمىز بىزنى قىيىن ئەھۋالدىمۇ شۇنداق قىلىشقا ئۈندەيدۇ. فىلىمنى كۆرۈڭ، كېيىن تۆۋەندىكى سوئاللار ئۈستىدە ئويلىنىپ كۆرۈڭ.
-
سىز باشقىلارغا يەھۋا ھەققىدە ئېيتىپ بېرىشتىن قورققانمۇ؟
-
كۆرگەن فىلىمدا، گرېيسونغا قورقۇنچنى يېڭىشكە نېمە ياردەم بەرگەن؟
بىز يەھۋا ياخشى كۆرگەن نەرسىنى ياخشى كۆرۈپ، ئۇ ئۆچ كۆرگەن نەرسىنى ئۆچ كۆرسەك، ئۇنىڭغا ساداقەتمەنلىكنى ساقلىشىمىز ئاسانراق بولىدۇ. زەبۇر 97:10-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
-
ئۆگەنگەنلىرىڭىزگە ئاساسلانغاندا، يەھۋا نېمىنى ياخشى كۆرىدۇ ۋە نېمىگە ئۆچ؟
-
ياخشى نەرسىلەرنى سۆيۈپ، يامانلىقنى ئۆچ كۆرۈشنى قانداق ئۆگىنەلەيسىز؟
6. يەھۋاغا بويسۇنساق، پايدىسىنى كۆرۈمىز
يەھۋاغا بويسۇنۇش — بىز ئۈچۈن مەڭگۈ ئەڭ ياخشى تاللاشتۇر. يەشايا 48:17، 18-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
-
يەھۋا بىز ئۈچۈن نېمىنىڭ پايدىلىق ئىكەنلىكىنى بىلىدىغانلىقىغا ئىشىنەمسىز؟ نېمە ئۈچۈن؟
-
ھازىرغىچە مۇقەددەس كىتاب ۋە ھەق خۇدا، يەھۋا ھەققىدە ئۆگىنىش سىزگە قانداق ياردەم بەردى؟
بەزىلەر مۇنداق دەيدۇ: «ساۋابلىق ئىشلارنى قىلسام، خۇدا خۇرسەن بولىدۇ».
-
قىلغان ئىش-ھەرىكەتلىرىمىز يەھۋانى خۇرسەن ياكى خاپا قىلىدىغانلىقىنى كۆرسىتىش ئۈچۈن قايسى ئايەتنى قوللىنالايسىز؟
خۇلاسە
سىز يەھۋاغا بويسۇنۇش ۋە قىيىنچىلىقلارغا قارىماي سادىقلىقنى ساقلاش ئارقىلىق، ئۇنىڭغا بولغان سۆيگۈ-مۇھەببىتىڭىزنى كۆرسىتەلەيسىز.
تەكرارلاش
-
ئايۇپ پەيغەمبەرنىڭ مىسالىدىن نېمىنى ئۆگەندىڭىز؟
-
يەھۋانى چىن قەلبىڭىزدىن سۆيىدىغانلىقىڭىزنى قانداق كۆرسىتەلەيسىز؟
-
يەھۋاغا بولغان ساداقەتمەنلىكىڭىزنى ساقلاشقا نېمە ياردەم بېرىدۇ؟
ئىزدىنىپ كۆرۈڭ
يەھۋاغا ۋە جامائەتكە سادىق بولۇش ئۈچۈن نېمە قىلالايسىز؟
شەيتاننىڭ ئىنسانلارنى ئەيىبلىگەنلىكى ھەققىدە كۆپرەك بىلىۋېلىڭ.
كىچىك بالىلارمۇ يەھۋانى سۆيىدىغانلىقىنى كۆرسىتىش ئۈچۈن نېمە قىلالايدۇ؟
ياشلار تەڭتۇشلىرىنىڭ بېسىمىغا دۇچ كەلگەندە، خۇداغا بولغان ساداقەتمەنلىكىنى قانداق ساقلاپ قالالايدۇ؟
بۇلارغىمۇ قىزىقىشىڭىز مۇمكىن
كۆپ سورالغان سوئاللار
مۇقەددەس كىتابنى تەتقىق قىلىش دېگەن نېمە؟
مۇقەددەس كىتابنى ھەقسىز تەتقىق قىلىش پروگراممىمىز ھەققىدە سوئاللارغا جاۋاب ئېلىڭ.
