29-ТӘТҚИҚ МАҚАЛИСИ
Дәһшәтлик чоң балаю апәткә тәйярмусиз?
«Тәйяр болуңлар» (МӘТ. 24:44).
49-НАХША Йәһва — бизниң панагаһимиз
БУ МАҚАЛИДӘ a
1. Немә үчүн балаю апәтләргә тәйярлиқ қилишни даналиқ дәймиз?
ӘГӘР биз һәрқачан тәйяр турған болсақ, бу һаятимизни қутқузуп қалалайду. Мәсилән, балаю апәт йүз бәргәндә, униңға алдин тәйярлиқ қилидиған кишиләрниң һаят қелиши вә башқиларға ярдәм бериш еһтималлиғи чоң болиду. Адәмләргә гуманитарлиқ ярдәм беридиған Европадики бир тәшкилат шундақ пикирни оттуриға қойған: «Пухта тәйярлиқ қилиш көплигән кишиләрниң җанлирини қутқузуп қалалайду».
2. Немә үчүн дәһшәтлик чоң балаю апәткә тәйярлиқ қилишимиз керәк? (Мәтта 24:44)
2 Дәһшәтлик чоң балаю апәт туюқсизла башлиниду (Мәт. 24:21). Башқа нурғун балаю апәт билән охшимайдиған йери шуки, бу апәтниң йеқинлап келиватқанлиғидин хәвиримиз бар. 2000 жил илгири Әйса Мәсиһ өз әгәшкүчилирини әшу күнгә тәйяр турушқа агаһландурған (Мәтта 24:44ни оқуң). Әгәр биз пухта тәйярлиқ қилсақ, у қийин күндин өтүшимиз вә башқиларниңму шундақ қилишиға ярдәм беришимиз асанирақ болиду (Луқа 21:36).
3. Чидамчанлиқ, көйүмчанлиқ вә сөйгү-муһәббәт бизниң дәһшәтлик чоң балаю апәткә тәйяр болушимизға қандақ ярдәм бериду?
3 Дәһшәтлик чоң балаю апәткә тәйяр болушимизға ярдәм берәләйдиған үч пәзиләтни көрүп бақайли. Әгәр биз қаттиқ зәрбә беридиған һөкүм хәвирини йәткүзүшкә буйрулсақ, буниңға қандақ инкас қайтуримиз? (Вәһ. 16:21) Йәһваниң бизни қоғдайдиғанлиғиға ишинип, Униңға итаәт қилиш үчүн чидамчан болушимиз керәк. Әгәр қериндашлиримиз пүткүл мал-мүлүклиридин айрилип қалса, немә қилимиз? (Һаб. 3:17, 18) Уларға көйүмчан болуп, еһтияҗлиқ нәрсилирини тәминләшкә күч чиқиришимиз лазим. Дөләтләр иттипақи һуҗум қилғанда, бир мәзгил қериндашлиримиз билән бир җайда яшашқа тоғра кәлсә, униңға қандақ инкас қайтуримиз? (Әзәк. 38:10—12) Бу қийинчилиқларға бәрдашлиқ бериш үчүн қериндашларға болған күчлүк сөйгү-муһәббәткә муһтаҗ болимиз.
4. Муқәддәс китап давамлиқ чидамчанлиқ, көйүмчанлиқ вә меһир-муһәббәтни йетилдүрүшимиз керәклигини қандақ көрситип бериду?
4 Худаниң Сөзи сизни давамлиқ чидамчан, көйүмчан вә меһир -муһәббәтлик болушқа дәвәт қилиду. Луқа 21:19-айәттә мундақ йезилған: «Силәр җениңларни тәқабиллиқ [сәвир-тақәт] билән сақлап қалисиләр». Колосилиқларға 3:12-айәттә (ЙД) болса: «Меһир-шәпқәт... билән кийиниңлар»,— дәп йезилған. Салоникилиқларға 1-хәт 4:9, 10-айәтләрдә мундақ сөзләр бар: «Силәр өзәңлар Худа тәрипидин бир-бириңларни сөйүшкә үгитилгән... Бирақ, қериндашлар, буни техиму толуқ йосунда қилишқа үндәймиз». Бу айәтләрниң һәммиси аллиқачан чидамчан, көйүмчан вә меһир-муһәббәт көрсәткән шагиртларға қаритилған. Шундақтиму улар бу пәзиләтләрни давамлиқ йетилдүрүши зөрүр еди. Бизму чоқум шундақ қилишимиз керәк. Биринчи әсирдики Мәсиһ әгәшкүчилири әшу һәрбир пәзиләтни қандақ нәмаян қилғанлиғини муһакимә қилиш шундақ қилишимизға ярдәм бериду. Әшу шагиртларни қандақ үлгә қилалайдиғанлиғимизни көрүмиз вә өзүмизниң дәһшәтлик чоң балаю апәткә тәйяр турғанлиғимизни тәкшүрәләймиз.
ЧИДАМЧАНЛИҒИҢИЗНИ КҮЧӘЙТИҢ
5. Биринчи әсирдики Мәсиһ әгәшкүчилири синақларда қандақ чидамчанлиқ көрсәткән?
5 Биринчи әсирдики Мәсиһ әгәшкүчилири чидамчан болуши керәк еди (Ибр. 10:36). Улар барлиқ кишиләр дуч келидиған қийинчилиқларға учрапла қалмай, башқа қошумчә синақларғиму дуч кәлгән. Уларниң көпинчиси пәқәт йәһудий дин рәһбәрлири вә Рим һөкүмитиниңла әмәс, бәлки өз аилисидикиләрниңму зиянкәшлигигә учриған (Мәт. 10:21). Җамаәт ичидә улар бәзидә һәқиқәттин үз өргәнләрниң тәсири вә бөлгүнчилик пәйдә қилидиған тәлимләр билән күрәш қилишқа тоғра кәлгән (Әлч. 20:29, 30). Шундақтиму, әшу Мәсиһ әгәшкүчилири чидамчанлиқ көрсәткән (Вәһ. 2:3). Улар Муқәддәс Язмилардики чидамчанлиқ көрсәткән Аюпқа охшаш кишиләрниң үлгилири һәққидә чоңқур ойланған (Яқуп 5:10, 11). Улар күч-қувәт сорап дуа қилған (Әлч. 4:29—31). Улар чидамчанлиқ көрсәтсә, Йәһваниң уларни мукапатсиз қоймайдиғанлиғини есидин чиқармиған (Әлч. 5:41).
6. Меританиң қаршилиққа бәрдашлиқ бәргинидин немиләрни үгинәләймиз?
6 Биз дайим Худа Сөзидики вә униңға асасланған нәшрий материаллиримиздики чидамчан болушта үлгә қалдурғанларниң мисаллирини тәтқиқ қилип үгәнсәк, улар һәққидә чоңқур ойлансақ, бизму чидамчан болалаймиз. Мошундақ қилиш арқилиқ Албаниядики Мерита исимлиқ қериндаш аилисидикиләрниң қаршилиғиға бәрдашлиқ берәлигән. У мундақ дәйду: «Аюп тоғрисидики үзүндиләрни үгәнгинимдә интайин тәсирләндим. У шунчә көп җапаларни чәккән. Амма бу синақлар кимдин кәлгәнлигини билмигән. У: “Өлүп кәткичә нуқсанлиғимни зади тартқузмаймән!”— дегән (Аюп 27:5). Аюпниң дуч кәлгән шунчә көп қийинчилиқлар билән селиштурғанда, мениң қийинчилиғим һечнемә әмәслигини ойлидим. Аюптин пәриқлиқ йери, мән қийинчилиқлиримни ким пәйда қилғанлиғини билимән».
7. Гәрчә һазир еғир бир синаққа дуч кәлмисәкму, чоқум немә қилишни үгинишимиз керәк?
7 Биз Йәһваға дуа қилип, дайим өз ғәм-әндишилиримиз тоғрилиқ ейтип бериш арқилиқ чидамчанлиғимизни күчәйтәләймиз (Флп. 4:6; Сал. 1-х. 5:17). Сиз бәлким һазирниң өзидә еғир синаққа дуч кәлмигәнсиз. Шундақ болсиму, көңлиңиз йерим болғанда, қаймуқуп немә қилишни билмәй қалғанда яки бесим һис қилғанда, Худадин ярдәм сорамсиз? Әгәр һазир күндилик турмушта дуч келиватқан қийинчилиқлар үчүн дайим Худадин ярдәм сорисиңиз, кәлгүсидә техиму чоңирақ қийинчилиқларға дуч кәлгәндә, һеч иккиләнмәйла, Униңдин ярдәм сорайсиз. Шундила Униң сизгә қачан вә қандақ ярдәм беридиғанлиғини ениқ билидиғанлиғиға ишәнчиңиз камил болиду (Зәб. 27:1, 3).
ЧИДАМЧАНЛИҚ
Биз баштин өткүзгән һәрбир синақ кейинки синақ үчүн чидамчанлиғимизни күчәйтиду (8-абзацқа қараң)
8. Бүгүнки күндики синақларға бәрдашлиқ беришниң кәлгүсидики синақларға бәрдашлиқ беришкә ярдәм берәләйдиғанлиғини Мираниң мисали қандақ көрситип бериду? (Яқуп 1:2—4; рәсимгиму қараң.)
8 Бүгүнки күндә синақларға бәрдашлиқ бәрсәк, кәлгүсидики дәһшәтлик чоң балаю апәткә бәрдашлиқ берәлишимиз мүмкин (Рим. 5:3). Немә үчүн шундақ дейәләймиз? Нурғун қериндашлиримиз һәр қетим еғир вәзийәтни баштин өткүзгәндин кейин өзлириниң йәнә башқа еғир синаққа бәрдашлиқ берәлигәнлигини көрүп йәткән. Чидамчанлиқ уларни тавлиған вә уларниң Йәһваниң өзлиригә ярдәм беришкә тәйяр екәнлигигә болған ишәнчисини күчәйткән. Улар Йәһваға ишәнгәчкә, кейинки синаққа бәрдашлиқ берәләйду (Яқуп 1:2—4ни оқуң). Албаниядики Мира исимлиқ пионер өзиниң илгирики қийинчилиқларға бәрдашлиқ бәргән кәчүрмишлири һазир униң давамлиқ қийинчилиқларға бәрдашлиқ беришигә ярдәм қилғанлиғини байқиған. Бәзидә у шунчә көп қийинчилиқларға пәқәт өзила дуч келиватқандәк һис қилғанлиғини ейтқан. Амма кейинирәк у Йәһваниң 20 жилдин буян уни қоллап-қувәтләш үчүн қанчилик ишларни қилғанлиғини әсләп, өз-өзигә шундақ дегән: «Давамлиқ садиқ болуп, Йәһваға хизмәт қилишни һәргиз тохтатма. Чүнки У сениң шунчә нурғун қийинчилиқларға бәрдашлиқ беришиңгә ярдәм бәрди». Сизму давамлиқ бәрдашлиқ беришиңиз үчүн Йәһваниң сизгә қандақ ярдәм қиливатқанлиғини чоңқур ойлап көрүң. У сизниң һәр қетим синаққа чидамчанлиқ билән бәрдашлиқ бәргәнлигиңизни көрүп, сизни мукапатлайдиғанлиғиға ишиниң (Мәт. 5:10—12). Шундақ болғанда, дәһшәтлик чоң балаю апәт башланғанда, сиз қандақ бәрдашлиқ беришини үгинисиз вә давамлиқ чидамчан болушқа қәтъий бәл бағлайсиз.
КӨЙҮМЧАН БОЛУҢ
9. Сүрийәниң Антакя шәһиридики җамаәт көйүмчанлиғини қандақ көрсәткән?
9 Йәһудийәдики Мәсиһ әгәшкүчилириниң еғир ачарчилиқ апитини баштин кәчүргәндә немә иш болғанлиғини көрүп бақайли. Сүрийәниң Антакядики җамаити ачарчилиқ һәққидә аңлиғанда, шәк-шүбһисизки, Йәһудийәдики қериндашларға һисдашлиқ қилған. Шуниң билән улар қериндашларға көйүнүп, ярдәм қолини сунған. «Шу вақитта шагиртлар Йәһудийәдә яшаватқан қериндашларға, һәркимниң чами йетишичә, ярдәм көрситишни қарар қилди» (Әлч. 11:27—30). Гәрчә ачарчилиқниң тәсиригә учриған қериндашлар жирақта яшиған болсиму, амма Антакядики етиқатчилар уларға ярдәм беришни қарар қилған (Йоһ. 1-х. 3:17, 18).
КӨЙҮМЧАНЛИҚ
Тәбиий апәтләр өз ара көйүмчанлиғимизни көрситишкә пурсәт яритип бериду (10-абзацқа қараң)
10. Етиқатчи қериндашлар балаю апәтниң тәсиригә учриғанда, қайси йоллар билән уларға көйүмчанлиғимизни көрситәләймиз? (Рәсимгиму қараң.)
10 Бүгүнки күндә бизму балаю апәттә зиянға учриған етиқатчи қериндашлиримизға көйүмчанлиғимизни көрситәләймиз. Бәлким биз ақсақаллардин сорап, дуниявий паалийитимизгә ианә бериш, апәткә учриғанлар үчүн дуа қилиш арқилиқ дәрһал ярдәм қолумизни суналаймиз b (Пәнд н. 17:17). 2020-жили пүтүн дунияда 950тин көпирәк Апәткә учриғанларға ярдәм бериш комитети тәшкилләнгән. Улар COVID-19 жуқумлуқ вирусниң тәсиригә учриғанларға ярдәм бәргән. Әшу апәттин қутқузуш хизмитигә қатнашқан қериндашларға алаһидә миннәтдарлиқ билдүримиз. Улар қериндашларға көйүнүп, керәк нәрсиләрни йәткүзүп бәрди вә уларға давамлиқ Йәһваға хизмәт қилишқа ярдәм бәрди. Бәзи вәзийәтләрдә қериндашларниң өйлирини вә ибадәт қилидиған беналарни ремонт қилди яки қайта ясап чиқти (Коринтлиқларға 2-хәт 8:1—4ни селиштуруң).
11. Көйүмчанлиғимиз әрштики Атимизға қандақ шан-шәрәп елип келиду?
11 Апәттин кейин биз көйүмчанлиғимизни көрсәтсәк, башқилар бизниң қилған қурбанлиқлиримизға диққәт қилиду. Мәсилән, 2019-жили «Дориян» намлиқ қара боран сәвәвидин Багам араллирида Ибадәт өйи вәйран қилинған. Қериндашлиримиз Ибадәт өйини қайта ясаватқан вақитта, Гувачи әмәс бир қурулушчи билән бәзи ишларни тохтамлашқан. Әшу қурулушчи қериндашларға мундақ дегән: «Мән силәрниң достуңларға көрсәткән көйүмчанлиғиңлардин қаттиқ тәсирләндим. Силәрниң тәшкилатқа ианә қилишни халаймән. Силәргә қурулушта ишлитилидиған қурал-сайманларни, қурулушчиларни вә материалларни ианә қилимән». Бу дунияда нурғунлиған кишиләр Йәһвани тонумайду. Амма уларниң нурғунлири Йәһва гувачилирини күзитиду. Көйүмчанлиғимиз башқиларни чоңқур сөйгү-муһәббәтни көрсәткән Йәһва Худа һәққидә билишкә дәвәт қилидиғанлиғини билгинимиздә, буниңдин интайин хошал болумиз! (Әфәс. 2:4)
12. Бүгүнки күндә көйүмчанлиқни йетилдүрүш бизни дәһшәтлик чоң балаю апәткә қандақ тәйярлайду? (Вәһий 13:16, 17)
12 Немә үчүн дәһшәтлик чоң балаю апәт мәзгилидә бир-биримизгә көйүмчан болушимиз керәк? Муқәддәс китапта мошу дунияниң сәясий һөкүмәтлирини қоллап-қувәтлимигәнләр бүгүнки күндә вә келәчәктики дәһшәтлик чоң балаю апәттә қийинчилиқларға дуч келидиғанлиғи ениқ тәкитләнгән (Вәһий 13:16, 17ни оқуң). Қериндашлиримиз турмушини қамдаш үчүн ярдәмгә муһтаҗ болуши мүмкин. Падишайимиз Әйса Мәсиһ һөкүмни иҗра қилишқа кәлгәндә, өз ара көйүмчан болғанлиғимизни көрсә, бизни Падишалиғиға варис болушқа тәклип қилиду (Мәт. 25:34—40).
МЕҺИР-МУҺӘББӘТНИ КҮЧӘЙТИҢ
13. Римлиқлар 15:7-айәттә көрситилгәндәк, дәсләпки Мәсиһ әгәшкүчилири муһәббәт риштисини күчәйтиш үчүн немә қилған?
13 Биринчи әсирдә һәммә киши Мәсиһ әгәшкүчилири бир-биригә меһир-муһәббәт көрситидиғанлиғини билгән. Бирақ уларниң меһир-муһәббәт көрситиши асан болғанму? Римдики җамаәттә пәриқлиқ қериндашларниң болғанлиғини ойлап көрәйли. Уларниң ичидә Муса пәйғәмбәрниң қануниға бойсунуп чоң болған йәһудийлар вә һәртүрлүк милләттин кәлгән йәһудий диниға киргән кишиләрму бар еди. Бәзи Мәсиһ әгәшкүчилири бәлким қуллар яки әркин кишиләр, һәтта қул егилири болған. Әшу Мәсиһ әгәшкүчилири арисидики пәриқләргә қаримай, бир-биригә меһир-муһәббәт көрситиш үчүн немә қилған? Әлчи Паул уларни бир-бирини «қобул қилишқа» дәвәт қилған (Римлиқларға 15:7ни оқуң). У немә демәкчи болған? «Қобул қилиш» дәп тәрҗимә қилинған сөз бириниң өйигә киргәндә яки дост-ярәнләр арисида бирини меһрибанлиқ яки меһмандостлуқ көрситип, қобул қилишни билдүриду. Мәсилән, Паул Филимунға қечип кәткән қули Онисимни қандақ қарши елишни ейтқан (Флм. 17). Прискила билән Акила Мәсиһ һәққидә өзлиридин билими азирақ болған Аполосни қобул қилип, сәпиридә уни өзлиригә һәмра қиливалған (Әлч. 18:26). Әшу Мәсиһ әгәшкүчилири пәриқлиқ кишиләрниң өзлири арисида бөлүнүш пәйда қилишиға йол қоймай, әксинчә пәриқни йеңип, бир-бирини қизғин қарши алған.
СӨЙГҮ-МУҺӘББӘТ
Барлиқ қериндашлиримизға чин көңлүмиздин сөйгү-муһәббәт көрситишимиз лазим (15-абзацқа қараң)
14. Анна вә униң йолдиши меһир-муһәббитини қандақ нәмаян қилди?
14 Бизму қериндашлиримизни қобул қилип, улар билән вақит өткүзүш арқилиқ сөйгү-муһәббитимизни ипадиләләймиз. Шундақ болғанда, уларму һәрдайим бизгә меһир-муһәббәт көрситиду (Кор. 2-х. 6:11—13). Анна вә униң йолдишиниң кәчүрмишлирини көрүп бақайли. Улар йеңила ғәрбий Африкида миссионерлиқ хизмитини башлап, узун өтмәйла COVID-19 тарқилишчан вируси башлинип кәткән. Улар йеңила кәлгәчкә, җамаәттики қериндашлар билән үзму үз көрүшәлмигән. Бу җүп меһир-муһәббитини қандақ ипадилигән? Улар видео улиниши арқилиқ шу йәрдики етиқатчи қериндашлар билән техиму яхширақ арилашмақчи болғанлиғини ейтқан. Җамаәттики қериндашлар дайим телефон қилиш вә учурлар әвәтиш арқилиқ улар билән алақилишип турған. Бу миссионерлар немә үчүн җамаәттики қериндашлар билән тонушушқа тиришқан? Анна мундақ дәйду: «Мән яхши-яман күнләрдә, маңа вә аиләмгә меһир-муһәббәт көрсәткән қериндашлиримни һәргиз унталмаймән. Уларниң үлгилири мениму меһир-муһәббәт көрситишкә дәвәт қилди».
15. Барлиқ қериндашларға сөйгү-муһәббәт көрсәткән Ванессаниң мисалидин немиләрни үгинәләйсиз? (Рәсимгиму қараң.)
15 Көпинчилиримиз охшимиған арқа көрүнүш вә һәрхил миҗәз-хулуққа егә қериндашлардин тәшкил тапқан җамаәтләрдә хизмәт қилимиз. Биз қериндашларниң яхши пәзиләтлиригә диққәт ағдуруш арқилиқ уларниң һәммисигә болған сөйгү-муһәббитимизни күчәйтәләймиз. Йеңи Зеландиядә хизмәт қилидиған Ванесса исимлиқ қериндаш илгири җамаитидики бәзи қериндашлар билән чиқишип өтүшни пәс көргән. Амма кейин у миҗәз-хулқи өзини териктүридиған кишиләрдин жирақлишишниң орниға, улар билән көпирәк биллә вақит өткүзүшни қарар қилған. У шундақ қилиш арқилиқ Йәһва уларниң қайси тәрәплирини яхши көридиғанлиғини көрүп йетәлигән. У мундақ дәйду: «Ерим районға җавапкар ақсақал болуп, хизмәт қилишқа башлиғандин кейин биз охшимиған миҗәз-хулқи бар қериндашлар билән вақит өткүздуқ вә улар билән чиқишип өтүшниң асан екәнлигини байқидим. Һазир пәриқлиқ қериндашларни яхши көрүмән. Наһайити ениқки, Йәһваму шундақ яхши көриду, чүнки У Өзи бизни шундақ пәриқлиқ кишиләрниң топиға җәлип қилған». Биз башқиларни Йәһваниң көзқариши билән көрүшни үгәнсәк, уларни сөйидиғанлиғимизни көрситимиз (Кор. 2-х. 8:24).
Дәһшәтлик чоң балаю апәт мәзгилидә биз етиқатчи қериндашлиримиз билән җәм болсақ, Йәһва вәдә қилған һимайигә еришимиз (16-абзацқа қараң)
16. Немә үчүн дәһшәтлик чоң балаю апәт мәзгилидә сөйгү-муһәббәт көрситиш бәк муһим? (Рәсимгиму қараң.)
16 Дәһшәтлик чоң балаю апәт мәзгилидә бир-биримизгә сөйгү-муһәббәт көрситиш интайин муһим. Әшу чоң балаю апәт башланғанда, Йәһва бизни қандақ һимайә қилиду? Қедимқи заманда бабиллиқлар һуҗум қилғанда, Йәһва Өз хәлқигә немә қилишни буйриғанлиғини ойлап көрәйли. У шундақ дегән: «Хәлқим, ичкири бөлмилириңгә кирип, кәйниңдин ишиклириңни япқин. Мениң ғәзивим өтүп кәткичә, бир мәзгил мөкүнүвалғин» (Йәшая 26:20). Қаримаққа, мошу сөзләр дәһшәтлик чоң балаю апәткә дуч келидиған биз үчүнму интайин мас келиду. «Ичкири бөлмә» бәлким җамаәтлиримизни билдүриду. Дәһшәтлик чоң балаю апәт мәзгилидә биз етиқатчи қериндашлиримизға қошулсақ, Йәһва вәдә қилған һимайигә еришимиз. Шуңа, чоқум қериндашлиримизға чин қәлбимиздин сөйгү-муһәббәт көрситишкә давамлиқ тиришишимиз керәк. Қутқузулуп қелишимиз дәл мошуниңға бағлиқ болуши мүмкин!
ҺАЗИРНИҢ ӨЗИДӘ ТӘЙЯРЛИҚ ҚИЛИҢ
17. Әгәр һазирниң өзидә тәйярлиқ қилсақ, дәһшәтлик чоң балаю апәт мәзгилидә немә қилалаймиз?
17 Йәһваниң улуқ күни барлиқ инсанийәт үчүн интайин қийин бир вақит болиду (Зәф. 1:14, 15). Йәһваниң хәлқиму қийинчилиқларға дуч келиду. Амма биз һазирниң өзидә тәйярлиқ қилсақ, тинч-хатирҗәм болуп, башқиларға ярдәм берәләймиз. Келәчәктә дуч келидиған һәрқандақ қийинчилиқларға чидамчанлиқ билән бәрдашлиқ беримиз. Қериндашлиримиз азап-оқубәт чәккәндә, көйүмчан болуп, уларға еһтияҗлиқ нәрсиләрни тәминләп бериш арқилиқ қолумиздин келишичә ярдәм қилимиз. Һазирниң өзидә қериндашлиримизға чин көңлүмиздин сөйгү-муһәббәт көрситишни үгәнсәк, келәчәктиму шундақ қилимиз. Шундила, келәчәктә барчә балаю апәтләр вә азап-оқубәтләр унтулуп кетилидиған йеңи дунияда Йәһва бизни мәңгүлүк һаятлиқ билән мукапатлайду (Йәшая 65:17).
24-НАХША Көзүң болсун мукапатта
a Дәһшәтлик чоң балаю апәт йеқинда башлиниду. Чидамчанлиқ, көйүмчанлиқ вә сөйгү-муһәббәт бизниң пат арида йүз беридиған, һечқачан болуп бақмиған ишларға тәйярлиқ қилишимизға ярдәм бериду. Биринчи әсирдики дәсләпки Мәсиһ әгәшкүчилири бу пәзиләтләрни қандақ йетилдүргәнлиги, бүгүнки күндә биз шуларға охшаш пәзиләтләрни қандақ йетилдүрәләйдиғанлиғимиз вә бу пәзиләтләр дәһшәтлик чоң балаю апәткә тәйяр турушимизға қандақ ярдәм беридиғанлиғини көрүп чиқимиз.
b Тәбиий апәт болған җайларда ярдәм бериш ишлириға қатнишишни халисиңиз, «Йәрлик лайиһә/Қурулуш программисиға қатнишиш үчүн илтимас хети» (DC-50) яки «Пидаий хизмәтчиләр үчүн илтимас» (A-19) намлиқ илтимас хетини толтуруң, кейин тәклипни күтүң.