Котькуд религиын вань адямиос, кудъёсызлэн зэмзэ ик Инмарлы ярамон луэмзы потэ. Туж шумпотоно, Инмар сыӵе адямиосты адӟе но соослы юрттэ шуыса. Но, жаляса верано луэ, религия понна адямиос трос дауръёс ӵоже урод ужъёс лэсьтыса улӥзы (2 Коринфъёслы 4:3, 4; 11:13—15). Иворъёс верамъя, куд-ог религиос ожъёсты нуыны юрттӥсько, лек ужъёсы но нылпиосты эриктэманэ пырисько. Со сюлмаськытэ кылзӥськись сюлэмо адямиосты, кудъёсыз зэмзэ ик Инмарлы оско! (Лыдӟе Матфейлэсь 24:3—5, 11, 12.)

Зэмос религия Инмарез данъя, нош зэмос луисьтэмез Инмарез сантэма. Зэмос луисьтэм религия дышетэ солы, малы Библия уг дышеты. Со пӧяськонэз вӧлмытэ Инмар сярысь но со сярысь, мар луэ адямиен кулэм бераз. Нош Иеговалэн потэ, адямиос со сярысь зэмзэ мед тодозы шуыса. (Лыдӟе Екклесиастэз 9:5, 10; 1 Тимофейлы 2:3—5.)

Шумпотоно, Инмарез пӧяны уг луы шуыса. Со адӟе пӧяськемзэс адямиослэсь, кудъёсыз верало, Инмарез ярато шуыса, нош асьсэос Шайтанлэсь дуннезэ ярато (Иаков 4:4). Вань зэмос луисьтэм религиос Библиын «Быдӟым Вавилон» шуыса нимамын. Вавилон — со вашкала кар вал, кудаз Ной улон нуналъёсы ортчем Ву тудӟон бере зэмос луисьтэм религия кылдӥз. Ӝоген Инмар шӧдтэк шорысь быдтоз религиосты, кудъёсыз адямиосты пӧяло но зӥбыса возё. (Лыдӟе Усьтӥськонэз 17:1, 2, 5, 16, 17; 18:8.)

Эшшо одӥг ӟеч ивор вань на. Иегова ӧз вунэты зэмос луисьтэм религиысь кылзӥськись сюлэмо адямиосты. Со соосты ас дораз люка но зэмлыклы дышетэ. (Лыдӟе Михейлэсь 4:2.)

Иегова дунъя адямиосты, кудъёсызлэн зэмлыкез тодэмзы но ӟеч ужъёс лэсьтэмзы потэ. Со ӧте соосты зэмос луисьтэм религиысь потыны. Инмарез яратӥсь адямиос дась воштӥськыны, малы ке шуоно соослэн Инмарез шумпоттэмзы потэ. (Лыдӟе Усьтӥськонэз 18:4.)

Нырысетӥ даурын кылзӥськись сюлэмо адямиос апостолъёслэсь ӟеч ивор верамзэс кылӥзы но шумпотӥзы. Соос улонзэс воштӥзы но сое Инмарлэн эрикезъя тупатӥзы. Озьы соослэн улонзы шудо луиз но азьланезлы осконзы кылдӥз. Со христианъёс милемлы умой пример возьматӥзы. Соос ӟеч иворез кылзӥзы но улонзэс Иеговалы сӥзизы. (Лыдӟе 1 Фессалоникаослы 1:8, 9; 2:13.)

Иегова аслаз семьяяз ӧте соосты, кинъёслэн зэмос луисьтэм религиен нокыӵе кусып воземзы уг поты. Тӥ солэн сюлмысь ӧтемезлы вазиськиды ке, солэн эшез луоды но ужась-тыршисьёсыз пӧлысь трос умой эшъёс шедьтоды. Нош азьланяз пырак улон басьтоды. (Лыдӟе Марклэсь 10:29, 30; 2 Коринфъёслы 6:17, 18.)

Ӝоген Инмар зэмос луисьтэм религилы ялэм приговорзэ быдэстоз. Со адямиосты зӥбет улысь мозмытоз. Зэмос луисьтэм религия ноку но уз быгаты ни адямиосты пӧяны но соос пӧлы люкиськонъёс вайыны. Адямиос но кылчинъёс одӥг семья кадь огкылысь одӥг гинэ зэмос Инмарлы ужалозы-тыршозы. (Лыдӟе Усьтӥськонэз 18:20, 21; 21:3, 4.)