Музъем вылын вордӥськемезлэсь азьло Иисус инмын кылчин вал. Соин со пӧртэм луэ огшоры адямиослэсь (Иоанн 3:13). Иисус кылдытэмын вал Инмарен, куке нокин но, номыр но кылдытэмын ӧй вал на. Со юрттӥз Инмарлы кылдытыны ваньзэ, мар вань инмын но музъем вылын. Иисусэз гинэ Иегова ачиз кылдытӥз. Соин ик Иисус Инмарлэн «огназ вордӥськем Пиез» шуыса нимамын (Иоанн 1:14). Озьы ик Иисус «Кыл» шуыса нимамын, малы ке шуоно со Инмарен ыстэмын вал но Инмарлэн нимыныз вераськиз. (Лыдӟе Мадёнъёсты 8:22, 23, 30; Колоссыослы 1:15, 16.)

Инмар аслаз Пиезлэсь инмысь улонзэ Мария нимо иудей нылмуртлэн пушказ выжтӥз. Со бызьымтэ ныл вал но пиосмуртэн кӧламын ӧй вал на. Озьыен, Иисуслэн адямиос пӧлысь атаез ӧй вал (Лука 1:30—35). Иисус музъем вылэ лыктӥз: 1) адямиосты Инмар сярысь зэмлыклы дышетыны, 2) возьматыны, кызьы Инмарлэсь эриксэ быдэстоно соку но, куке со капчи ӧвӧл, но 3) аслэсьтыз сьӧлыктэм улонзэ сётыса, дун тырыны но милемыз мозмытыны. (Лыдӟе Матфейлэсь 20:28.)

Адями дун тыре, куке солэн мае ке аслыз берыктэмез яке кинэ ке мозмытэмез потэ (Потон 21:29, 30). Инмарлэн уг поты вал, адямиос мед пересьмозы но мед кулозы шуыса. Кытысь ми сое тодӥськомы? Инмар вераз нырысетӥ адямилы, Адамлы, со сьӧлыказ ке, кулоз шуыса. Озьыен, Адам ӧй сьӧлыкасал ке, со ноку но ӧй кулысал (Улон-вылон 2:16, 17; 5:5). Библия верамъя, кулон дуннее «пыриз» Адам пыр. Адамлэн сьӧлыкез вань нылпиосызлы палаз, нош сьӧлыкен ӵош кулон но. Кулон сьӧлыкъёс понна кыл кутытон луэ. Соин ик, кулонлэсь мозмытскон  понна, кудӥз милемлы Адамлэсь палаз, ми понна дун тыроно. (Лыдӟе Римъёслы 5:12; 6:23.)

Кин, дун тырыса, милемыз сьӧлыклэсь но кулонлэсь мозмытыны быгатысал? Куке адями кулэ, со аслаз сьӧлыкъёсыз понна гинэ дун тыре. Одӥг сьӧлыко адями но уг быгаты мукет адямиослэн сьӧлыкъёссы понна дун тырыны. (Лыдӟе Псалтирез 48:8.)

Иисус сьӧлыктэм вал. Соин со милесьтым пӧртэм луэ. Нош со сьӧлыктэм вал бере, солы аслаз сьӧлыкъёсыз понна кулоно ӧй вал. Иисус мукет адямиослэн сьӧлыкъёссы понна кулӥз. Инмар адямиосты яратэмзэ возьматӥз, аслэсьтыз Пизэ музъем вылэ ыстыса, со ми понна мед кулоз шуыса. Иисус но яратэмзэ возьматӥз. Со Атаезлэсь кылзӥськиз но аслэсьтыз улонзэ милям сьӧлыкъёсмы понна сётӥз. (Лыдӟе Иоаннлэсь 3:16; Римъёслы 5:18, 19.)

Учке «Малы Иисус кулӥз?» видеороликез.

Музъем вылын улыкуз, Иисус висисьёсты бурмытъяз, кулэмъёсты улӟытъяз но шуге-леке сюремъёслы юрттылӥз. Озьы со возьматӥз, мар со кароз азьланяз Инмарлэсь кылзӥськись адямиослы (Матфей 15:30, 31; Иоанн 5:28). Куке Иисус кулӥз, Инмар сое кужмо кылчин карыса улӟытӥз (Ефесъёслы 1:20). Собере Иисус Инмарлэн бурпалаз пуксиз но возьманы кутскиз, ку Атаез сое эксэй кароз но быдэс музъемен кивалтыны право сётоз (Еврейёслы 10:12, 13). Али Иисус инмын Эксэй луыса кивалтэ, нош солэн пытьытӥз мынӥсьёсыз быдэс музъем вылын со сярысь ӟеч иворез верало. (Лыдӟе Данииллэсь 7:13, 14; Матфейлэсь 24:14.)

Ӝоген Иисус кивалтыны правозэ кутоз но музъем вылысь вань курадӟонъёсты но лек адямиосты быдтоз. Ваньмыз, кинъёс Иисуслы оско но солэсь кылзӥсько, музъем вылын райын улозы. (Лыдӟе Псалтирез 36:9—11.)