Макем ми тросгес тодӥськомы адямилэсь умой сямъёссэ, сокем юнгес со милемлы кельшыны кутске но милям соин кусыпъёсмы юнмало. Озьы ик Иеговаен но. Со сярысь тросгес тодыса, тодыса, кыӵе солэн сямъёсыз, милям соин кусыпъёсмы юнмало. Инмарлэн вань сямъёсыз пӧлысь ньыль валтӥсь сямъёссэ висъяны луоз: со кужым, визьлык, шонерлык но яратон.

«Э, Инмаре Кузё-Инмар! Аслад быдӟым кужыменыд но вӧлъям суйбыгытэныд Тон инмез но, музъемез но кылдытӥд» (ИЕРЕМИЯ 32:17).

Инмарлэн кужымез адӟиське солэн кылдытэмъёсысьтыз. Кылсярысь, мае тӥ шӧдӥськоды, шундыё гужем нуналэ ураме потыса? Шундылэсь шунытсэ. Отысь адӟиське Инмарлэн кужымез. Нош макем пӧсь Шунды? Шундылэн шораз 15 000 000 градус пӧсь. Секундлы быдэ Шунды бордысь сыӵе пӧсь потэ, кыӵе пӧсь потэ, огдыре трос сю миллион ядерной бомба пуштыку.

Но Шунды со самой бадӟым кизили ӧвӧл. Быдэс Дуннеын трос миллион кизилиос вань, кудъёсыз Шундылэсь бадӟымгес. Кылсярысь, тодосчиос верамъя, UY Щита кизили трослы бадӟымгес Шундылэсь. Сое Шунды интые пуктӥд ке, со ворсалоз Шунды котыртӥ бергась ньыль планетаосты: Меркуриез, Венераез, Музъемез, Марсэз но Юпитер дорозь ик вуоз. Со валаны юрттэ Иеремиялэсь кылъёссэ, кудӥз вераз, Иегова Инмар инмез но, музъемез но — Быдэс Дуннеез — аслаз быдӟым кужыменыз кылдытӥз шуыса.

Кыӵе пайда вае милемлы Инмарлэн кужымез? Милям улонмы герӟаськемын соин, мае Инмар кылдытӥз. Кылсярысь, ми ӧм быгатысалмы улыны шундытэк, музъемтэк, вутэк но омыртэк. Озьы ик Инмар аслаз кужыменыз быгатэ юрттыны нимаз адямиослы. Кызьы? Кылсярысь, нырысетӥ даурын Инмар аслэсьтыз кужымзэ сётӥз Иисус Христослы, со паймымон ужъёс мед лэсьтоз шуыса. Библиын гожтэмын: «Синтэмъёс адӟыны кутско, чутъёс ветло, гижлочерен висисьёс дунмало-чылкытало, пельтэмъёс кыло, кулэмъёс улӟо» (Матфей 11:5). Нош туннэ Инмар аслэсьтыз кужымзэ сётэ-а? Библиын верамын: «Жадем муртлы Со кужым сётэ». Озьы ик отын верамын на: «Кузё-Инмарлы оскиськыса улӥсьёс кужым басьтыса выльдӥськозы» (Исаия 40:29, 31). Иегова дась милемлы «мертантэм бадӟым кужым» сётыны, ми шуг-секытъёсты вормыны мед быгатомы шуыса (2 Коринфъёслы 4:7). Потэ-а тӥляд эшъяськемды соин, кин сокем сюлмаське тӥ сярысь, но кужым сётыса, тӥледлы юрттыны быгатэ?

«Туж паймымонэсь Тынад ужъёсыд, Кузё-Инмаре! Котьмае но Тон визьмын кылдытэмед» (ПСАЛТИРЬ 103:24).

Макем тросгес ми тодӥськомы Инмарлэн кылдытэмъёсыз сярысь, сокем юнгес паймиськомы, макем визьмо соос кылдытэмын. Кылсярысь, наукаын вань удыс, кудӥз нимаське биомиметика, яке биомимикрия. Тодосчиос, кудъёсыз ужало та удысын, Иеговалэсь кылдытэмъёссэ эскеро, мае ке выльзэ кылдытон понна. Озьы кылдытэмын вал трос арбериос — огшоры клей бордысен кутскыса, самолётозь.

Инмарлэн визьмо луэмез тужгес но яркыт адӟиське отысь, кызьы кылдытэмын адямилэн мугорыз. Учкомы, кылсярысь, кызьы анай пушкын нылпи будэ. Нырысь со туж пичи. Собере со будэ но, куке дырыз вуэ, солэн кылдо лыосыз, сӥльбыгытъёсыз, куэз, вирсэръёсыз но мукетыз. Нош укмыс толэзь ортчыса гинэ, быдэс адями вордӥське. Адӟыса макем визьмо кылдытэмын адямилэн мугорыз, тросэз соглаш карисько Библиысь кылъёсын: «Тонэ данъясько: мон уго паймымон кылдытэмын» (Псалтирь 138:14).

Кыӵе пайда вае милемлы Инмарлэн визьмо луэмез? Кылдытӥсьмы умой тодэ, мар милемлы кулэ, шудо луон понна. Со туж визьмо. Библия пыр со милемыз но визьмо луыны дышетэ. Кылсярысь, Библиын таӵе визь-кенеш вань: «Ог-огдылы простить каре» (Колоссыослы 3:13). Пайдаё-а со визь-кенеш? Пайдаё. Эскеронъёс возьмато, адямиос, кудъёсыз простить карыны быгато, умойгес изё, шергес бадӟым давленилэсь, депрессилэсь но мукет висёнъёслэсь курадӟо шуыса. Туж валась но сюлмаськись эш выллем, Инмар котьку дась пайдаё визь-кенеш сётыны (2 Тимофейлы 3:16, 17). Потэ-а, тӥляд но сыӵе эшты мед луоз шуыса?

«Кузё-Инмар шонерлыкез яратэ» (ПСАЛТИРЬ 36:28).

Инмарлэн ужъёсыз котьку шонересь. Зэмзэ но, «ӧрекчаськон Инмар дорысь уг поты, шонертэм суд Дунне Кутӥсь дорысь уг лыкты» (Иов 34:10). Иегова котьку шонер судъя. Тани мар вераз Иегова сярысь псаломъёсты гожъясь: «Тон калыкъёсты шонер судить кариськод» (Псалтирь 66:5). Иеговаез пӧяны уг луы, малы ке шуоно со «сюлэм шоры учке» (1 Эксэйлыкъёслэн 16:7). Со адӟе, ку адями пӧя, нош ку шонерзэ вера. Инмар ваньзэ адӟе. Со адӟе музъем вылысь котькуд шонертэм лек ужез но пӧяськонэз. Со кылзэ сётэ, «законлы пумит улӥсьёс музъем вылысь быдтэмын луозы» шуыса (Мадёнъёс 2:22).

Но Инмар жалясьтэм судья ӧвӧл, кудӥз муг утча, кызьы кыл кутытыны. Со котьку дась жаляны но простить карыны. Библиын верамын, Иегова «шырыт сямо, гажась-жалясь» шуыса. Озьы со учке сьӧлыкаса улӥсьёс шоры но, соос сюлмысь жаляло ке лэсьтэм янгышъёссы сярысь. Сыӵе луыны кулэ ӧвӧл-а со, кин зэмзэ ик шонерлыко? (Псалтирь 102:8; 2 Пётр 3:9).

Кыӵе пайда вае милемлы Инмарлэн шонерлыко луэмез? Апостол Пётр вераз: «Инмар адямиосты вылтус шоры учкыса улӥё-вылӥё уг кары. Котькуд калык пӧлысь Солэсь кышканэн, шонерлыко улӥсь муртъёс Солы кельшымонэсь-ярасесь луо» (Апостолъёслэн ужъёссы 10:34, 35). Ми Инмарлэсь адӟем карыны быгатӥськомы, кызьы шонерлыко луоно, малы ке шуоно со котьку шонер судъя но одӥг адямиез мукетызлэсь улӥе яке вылӥе уг пукты. Котькыӵе калыкысь, котькыӵе кылын вераськись адями, дышетскемын-а со, ӧвӧл-а, узыр-а, куанер-а, Инмарлы ярамон луыны но солы ужаны-тыршыны быгатэ.

Инмарлэн потэ, ми мед тодомы шуыса, малы со шонерлыко ужъёс лэсьтэ. Солэн потэ, ми солэсь адӟем мед каромы шуыса. Соин со милемлы возьытлык сётӥз. Библиын верамын, возьытлык — со закон, кудӥз милям сюлэмъёсамы гожтэмын. Возьытлык юрттэ милемлы валаны, ми асьмеды шонер возиськомы-а, ум-а (Римъёслы 2:15). Кыӵе пайда со милемлы вае? Милям возьытлыкмы шонер дышетэмын ке, со юрттоз милемлы шонертэм ужъёсты лэсьтытэк улыны. Нош ми янгышамы ке, со юрттоз милемлы лэсьтэм янгышмы сярысь жаляны но воштӥськыны. Ми туж шумпотӥськомы, Инмар ачиз но шонерлыко, милемыз но шонерлыко луыны дышетэ шуыса. Со понна ми сое эшшо но юнгес яратӥськомы!

«Инмар — со яратон» (1 ИОАНН 4:8).

Инмар кужмо, визьмо но шонерлыко. Но Библиын нокытыназ но верамын ӧвӧл, Инмар — со кужым, визьлык но шонерлык шуыса. Отын верамын, Инмар — со яратон шуыса. Малы? Малы ке шуоно, мае ке лэсьтыны Иегова аслэсьтыз кужымзэ кутэ. Кыӵе ке ужпум кутыкуз, солы юрттэ шонерлыко но визьмо луэмез. Нош мае ке лэсьтыны сое косэ яратон. Ваньзэ, мае лэсьтэ Иегова, со лэсьтэ яратэменыз.

Иегова инэз, музъемез но ваньзэ, мар соос вылын вань, ӧз кылдыты, малы ке шуоно солы мар ке уг тырмы вал. Ваньзэ сое со яратэмысьтыз кылдытӥз. Яратон косӥз сое кылчинъёсты но адямиосты кылдытыны — соосты, кинъёс быгатозы солэсь яратонзэ адӟыны но со понна солы тау карыны. Инмар музъемез кылдытӥз озьы, со адямиослы умой улон инты мед луоз шуыса но адямиос отын номыр сярысь сюлмаськытэк мед улозы шуыса. Инмар али но ми сярысь сюлмаське: «Со уго шундызэ уродъёс но, ӟечъёс но вылэ ӝужаны косэ, зорзэ шонер улӥсьёслы но, шонер улӥсьтэмъёслы но лэзе» (Матфей 5:45).

Со сяна, Иегова «ӟеч сюлэмо, ваньзэ гажась-жалясь» (Иаков 5:11). Со туж дунъя соосты, кинъёс вань сюлмысьтызы тыршо со сярысь тодыны но солы матэ кариськыны. Инмар туж яратэ котькудзэ сыӵе адямиез. Библия вера Инмар сярысь: «Со уго ваньмылы асьмелы матын улэ» (Апостолъёслэн ужъёссы 17:27).

Кыӵе пайда вае милемлы Инмарлэн яратонэз? Милемлы бадӟым шумпотон вае, куке ми адӟиськомы, кызьы шунды пуксе, кызьы нылпи серекъя. Милемлы туж кельше, куке милемыз ярато. Ваньмызтэк сотэк ми улыны быгатӥськомы, но со милесьтым улонмес шудо каре.

Озьы ик, ми быгатӥськомы вӧсяськыны. Со эшшо одӥгез, мар возьматэ Инмарлэсь яратэмзэ. Библия ӧте: «Номыр понна но эн сюлмаське, но ялан вӧсяськыса, тау карыса, Инмар азьын мар куронды вань, курелэ». Иегова — яратӥсь атай. Солэн потэ, ми солы мед вераломы шуыса ваньзэ, мар милемыз сюлмаськытэ. Ми озьы каримы ке, Иегова вера милемлы, аслэсьтыз каньыллыксэ сётоз шуыса, кудӥз «котькыӵе визьлэсь но вылӥын» (Филиппыослы 4:6, 7).

Ми эскеримы Инмарлэсь валтӥсь сямъёссэ — кужымзэ, визьлыксэ, шонерлыксэ но яратонзэ. Юрттӥз-а со тӥледлы умойгес валаны, кыӵе со Инмар? Иегова тӥледлы эшшо но матынгес мед луоз шуыса, ойдолэ тодомы, мар со милемлы кариз ини но мар кароз на вуонояз?