Мон вордӥськи Саксонияысь пичи гуртын, кудӥз со дыре Германской Демократической Республикае (ГДР) пыре вал. Ми семьяямы огкылысь но тупаса улӥмы. Анае но атае дышетӥзы милемыз вылӥ эсэпъёсъя улыны. ГДР коммунистической шаер вал бере, тросэз адямиос ми палан Инмарлы ӧз оске. Мон малпай, Инмар ӧвӧл шуыса. 18 арес тырмытозям, мон вылэ пыӵазы атеистъёслэн но коммунистъёслэн учконъёссы.

Коммунистъёс дышетӥзы, вань адямиос одӥг кадесь шуыса. Та дышетон мыным туж яраз. Со сяна, мон малпай, ваньбурез котькуд адямилэн кулэяськонъёсызъя люкылӥзы ке, куанеръёс но узыръёс уз луэ ни шуыса. Соин ик мон пыри егитъёслэн коммунистической организациязы. 14 арес дыръям мон пыриськи котыр инкуазез утёнъя но макулатураез выльысь уже кутонъя проектэ. Ауэ карысь кивалтӥсьёс монэ карлэн сӥё-дано адямиосыз пӧлы пыртӥзы. Егит арлыды шоры учкытэк, мон ГДР-ысь куд-ог нимо-дано политикъёсын тодмо вал ини. Мон юн оски, мынам ужпумъёсы шонересь шуыса но азьпалан умой улон луоз шуыса.

Но малпамтэ шорысь мынам улонэ воштӥськиз. 1989-тӥ арын Берлин борддор куашказ, озьы ик Шундыӝужанпал Европаысь шаеръёсын коммунистъёс кивалтэмысь дугдӥзы. Соберегес ик мон эшшо тодӥ на, ГДР-ын трос шонерлыктэм ужъёс лэсьтӥськизы шуыса. Кылсярысь, соос шоры, кинъёс коммунистъёс пала ӧз кариське, учкизы «кыкетӥ сортъем» адямиос шоры кадь. Кызьы со озьы луыны быгатӥз? Ми, коммунистъёс, оскимы, вань адямиос одӥг кадесь шуыса. Коммунистъёслэн дышетонъёссы кыл вылын гинэ вал шат? Таин сэрен мынам мылкыды туж секыт луиз.

Мон аслэсьтым учконъёсме воштӥ но малпай улонме крезьгурен но буёлэн суредаськонэн герӟаны. Музыкальной училищеез быдтэме бере мон капчиен быгатӥсько вал университетэ пырыны. Мынам потэ вал суредась но крезьгурчи луэме. Вылӥ эсэпъёсты, кудъёсызлы монэ атае но анае дышетӥзы, мон вунэтыны кутски. Вань дырме мон шулдыръяськыса ортчытъяй. Кылсярысь, огдыре ик мон кӧня ке нылъёсын пумиськылыны быгатӥсько вал. Нош крезьгур, суредаськон но шулдыръяськыса улон сюлэмшугъяськонъёсме вунэтыны ӧз юрттэ. Суредъёсысьтым но адӟиське вал, макем секыт сюлмын мон улӥсько. Йырам котьку бергазы сюлэмшугъяськытӥсь малпанъёс: мар луоз вуонояз? Малы мон улӥсько?

Ӝоген мон сюлмаськытӥсь юанъёсылы валэктонъёс шедьтӥ. Одӥг пол ӝыт, училищеын дышетскеммы бере, ми ӵош дышетскись эшъёсынымы пукимы но вуоно улон сярысь вераськимы. Манди *, ми пӧлысь одӥгез нылаш, Иеговалэн Адӟись-Ивортӥсез вал. Со ӝытэ со мыным умой визь-кенеш сётӥз. Со вераз: «Андреас, юанъёсыдлы валэктонъёс Библиысь утча».

Мынам вал пӧртэм шӧдонъёсы: одӥг ласянь, мынам тодэме потэ вал, нош мукет ласянь, осконэ ӧй вал. Нош тодэме потэмен, мон соглаш луи. Манди саклыкме висъяз Даниилэн книгаысьтыз 2-тӥ люкетлы. Мон туж пайми. Отын вераське дунневыл державаос сярысь, кудъёсыз вашкала дыръёсысен асьме нуналозь ог-огзэс вошъязы. Озьы ик Манди возьматӥз Библиысь азьпалзэ тодытыса веранэз со сярысь, мар возьма адямиосты азьланяз. Мон валай, кытысь шедьтоно юанъёсылы валэктонъёс. Нош кин быгатысал азьпал улон сярысь сыӵе пыр-поч вераны? Зэм ик-а Инмар вань?

Манди тодматӥз монэ Хорст но Ангелика кузпалъёсын, кудъёсыз Иеговалэн Адӟись-Ивортӥсьёсыз вал. Соос монэн Библиез дышетыны кутскизы. Мон ӝог валай: Иеговалэн Адӟись-Ивортӥсьёсыз — со одӥг гинэ организация, кудӥз котьку но уже кутэ Инмарлэсь нимзэ, Иегова нимез, но со сярысь мукетъёсызлы вера (Улон-вылон 22:14; Матфейлэсь 6:9). Мон тодӥ, Иегова Инмар адямиослы музъем вылын пырак улыны кылзэ сётэ шуыса. Псалтирьын 36:9 верамын: «Кузё-Инмарлы оскиськыса улӥсьёс музъем басьтозы». Мыным туж кельшиз, таӵе луонлыкез вань шуыса котькинлэн, кин Инмарлэсь кылзӥськыса улэ.

Но аслэсьтым улонме тупатыны капчи ӧй вал. Быгатӥсь крезьгурчи но суредась луэменым, мон вылтӥяськись луи. Соин ик нырысь мыным дышетсконо вал зӥбыт-востэм луыны. Озьы ик секыт вал азыса-калгыса улонлэсь куштӥськыны. Мон туж тау карисько Иеговалы, кызьы со чиданзэ, гажан-жалянзэ но валанзэ возьматэ соослы, кинъёс вань кужмысьтызы Библиысь возетъёсъя улыны тыршо!

18 арес луытозям, мынам улонам валтӥсь инты басьтӥзы коммунистъёслэн но атеистъёслэн дышетонъёссы. Нош собере мон Библиысь возетъёсъя улыны кутски. Мон азьпал улонлэсь кышкамысь дугдӥ но валай, малы мон улӥсько. 1993-тӥ арын мон пылатӥськи но Иеговалэн Адӟись-Ивортӥсез луи. Нош 2000-тӥ арын мон кышно басьтӥ Табита нимо сузэрез, кудӥз ӟырдыт мылкыдын Иеговалы ужа-тырше вал. Ми трос дырмес висъяськомы, мукетъёсызлы Библиен тодматскыны юрттон понна. Тодытыкумы ми ӵем дыръя пумитаськомы адямиосты, кудъёсыз, мон сямен ик, будӥзы соку, куке коммунистъёслэн но атеистъёслэн дышетонъёссы вӧлмемын вал. Мыным туж кельше сыӵе адямиосты Иеговаен тодматыны.

Куке мон Иеговалэн Адӟись-Ивортӥсьёсыныз Библиез дышетыны кутски, мынам атае но анае туж кышказы. Нош собере соос адӟизы, макем воштӥз мынэсьтым улонме Адӟись-Ивортӥсьёсын эшъяськон. Табере соос но Библиез лыдӟо, озьы ик Иеговалэн Адӟись-Ивортӥсьёсызлэн пумиськонъёсазы ветло. Мон талы туж шумпотӥсько!

Ми Табитаен шумпотыса улӥськомы, малы ке шуоно Библиысь визь-кенешъёсты улонамы пыртыны тыршиськомы. Кылсярысь, отын верамын ог-огедлы оскымон луоно шуыса. Та визь-кенеш юрттэ милемлы кусыпъёсмес юнматыны (Еврейёслы 13:4).

Табере мон азьпал улон шоры юн осконэн учкисько. Мынам вань вынлыке, кудаз пӧртэм кылъёсын верасько, тупаса но огкылысь уло. Та семьяямы ми ваньзэс юн яратӥськомы. Ӵапак таӵе улонэз мон котьку но возьмай.