МОН ВОРДӤСЬКИ 1923-тӥ арын Йоркширысь Хемсуэрт карын (Англия). Семьяямы ми кык кузя нылпиос вал — мон но мынам Боб агае. Куке мыным укмыс арес пала вал, атае, кудӥз адӟемпотостэм каре вал религиозной кивалтӥсьёслэсь чеберъяськемзэс, кытысь ке но книгаос шедьтӥз, кудъёсаз зэмос луисьтэм религилэн дышетонъёсыз шарае поттэмын вал. Со книгаос солы туж кельшизы. Кӧня ке аръёс ортчыса, ми доры Боб Аткинсон нимо адями лыктӥз. Со Рутерфорд агайлэн реченыз пластинкаез патефоназ пуктӥз но милемлы кылзыны сётӥз. Соку ми валамы, речез верась адями со организациысь ик шуыса, кудӥз атаелэсь ваем книгаоссэ поттӥз. Анае но атае ӵектӥзы Аткинсон агайлы котькуд ӝытэ милемын ӵош сиськыны но Библия сярысь трос юанъёсмылы валэктонъёс сётъяны. Милемыз ӧтизы одӥг агай доры пумиськонъёсы ветлыны, кудӥз ми дорысь кӧня ке иськемъёс кемын улэ вал. Ми соку ик соглаш кариськимы. Ӝоген Хемсуэртын пичи кенеш кылдӥз. Кӧня ке дыр ортчыса, ми доры кӧлыны дугдылыны кутскизы зональной ужась-тыршисьёс (соку озьы нимасько вал ёросэз чакласьёс), со сяна, ми вӧзамы улӥсь пионеръёсты нуназезэ сиськыны ӧтчаллямы. Ваньзы соос мыным туж умой пример луизы.

Милям семьямы мебель лэсьтыны но сое вузаны кутскиз вал. Но мынам атае агаелы шуиз: «Пионер луэмед потэ ке, милемлы ваньмызлэсь талэсь куштӥськоно». Боб соглаш кариськиз. 21 аресысен со нимаз улыны но пионер луыса ужаны-тыршыны кутскиз. Кык ар ортчыса, куке мыным 16 арес тырмиз, мон но пионер луи. Шутэтскон нуналъёсы сяна, мон ӟеч иворез огнам верасько вал, тодытон понна карточкаосты уже кутыса. Иегова монэ бакель кариз: мон одӥг кышномуртэн Библиез дышетыны кутски, но ӝоген со пылатӥськиз. Берлогес солэн тросэз ӵыжы-выжыосыз но Иеговалэн Адӟись-Ивортӥсьёсыз луизы. Вуоно араз мыным Мэри Хеншаллэн ӵош нимысьтыз пионер луыны ӵектӥзы. Ми ужамы-тыршимы огдырлы сётэм территориын, Чеширын.

Кыкетӥ дунневыл ож мыныку, фронтлы юрттон понна, кышномуртъёсты туж трос ужаны косо вал. Нош священникъёсты ӧз ужатэ, соин ик ми но,  нимысьтыз пионеръёс, малпаськомы вал, милемыз но ужаны уз косэ шуыса. Суд мукет сямен малпаз, но монэ 31 нуналлы тюрьмае пуктӥзы. Вуоно араз, куке мыным 19 арес тырмиз, мон властьёслы верай, ожлы юрттыны уг быгатӥськы шуыса, малы ке шуоно Инмарлы оскисько. Монэ кык пол судэ ӧтчазы, но кык полаз ик лэзизы. Со дыре мон шӧдӥсько вал, Иегова святой духеныз монэ юнматэ но китӥм кутыса возе шуыса (Ис. 41:10, 13).

1946-тӥ арын мон тодматски Артур Маттьюзэн. Оже мыныны соглаш луымтэез понна, со куинь толэзь тюрьмаын пукиз. Тюрьмаысь потэм бераз со лыктӥз Хемсуэртэ Деннис выныз доры, кудӥз отын нимысьтыз пионер луыса ужаз-тыршиз. Иегова сярысь соослы атайзы пичи дыръязы ик вераз, но соос быдэ вуэмзылэсь азьло ик пылатӥськизы. Ӝоген Деннисэз Ирландие ыстӥзы, соин ик Артур ӟеч иворез вераны эштэк кылиз. Мынам анаелэн но атаелэн син шоразы йӧтӥз со, кызьы та егит пионер ассэ возе но мылысь-кыдысь ужа-тырше, соин ик соос ӵектӥзы солы доразы улыны. Анай-атае доры бертылыкум, ми Артурен ӵош посуда миськиськомы вал. Собере ми ог-огмылы гожъяны кутскимы. 1948-тӥ арын Артурез нош ик куинь толэзьлы пуктӥзы. 1949-тӥ арын толшоре ми кузпалъяськимы но, луонлык вань на дыръя, вань дырмес сётыса ужан-тыршонмес азьланьтыны малпамы. Ми огшоры улыны тыршимы, но отпускмы дыръя, ӧжыт ке но коньдон поттон понна, емышъёс бичаллямы. Иегова милемыз бакель каре вал, но ми озьы ик пионеръёс луыса ужаны-тыршыны быгатӥмы.

Арлэсь тросгес ортчыса милемыз Уйпал Ирландие мыныны куризы, нырысь Армае, нош собере Ньюри каре, кытын тросэз улӥсьёс католикъёс вал. Отын мукет религиосты ӧз яратэ, соин ик ӟеч иворез туж чакласькыса верано вал. Пумиськонъёс одӥг семья дорын ортчо вал, кудӥз ми дорысь 16 иськем кемын улӥз. Отчы ог тямыс адями ветлӥз. Куддыръя ми отчы уйлы кылиськомы ке, выж вылын кӧлӥськомы вал, нош ӵукна султэммы бере милемыз ческыт сиёнэн куноято вал. Макем мон шумпотӥсько, али отын Адӟись-Ивортӥсьёс трос ини шуыса!

Мынам агае Лотти кышноеныз ӵош Уйпал Ирландиын нимысьтыз пионер луыса ужаз-тыршиз. 1952-тӥ арын ми ньыль кузя Белфастэ областной конгрессэ мынӥмы. Одӥг вын-агай милемыз Прайс Хьюзэн ӵош, кудӥз со дыре Англиысь филиалын ужа-тырше вал, ас дораз ӧтиз. Одӥг ӝытэ ми «Инмарлэн сюресэз — яратон» выль брошюра сярысь вераськиськомы вал, кудзэ нимысьтыз Ирландия понна поттӥзы. Соку Хьюз вын-агай вераз, макем секыт Ирландиын улӥсь католикъёслы ӟеч иворез вераны. Адӟись-Ивортӥсьёсты улон интыосысьтызы улляло вал, нош священникъёс соос вылэ лек адямиосты узато вал. Прайс шуиз: «Та брошюраосты быдэс шаертӥ вӧлмытон понна, милемлы кузпалъёс кулэ, кудъёсызлэн машиназы вань» a. Ӵапак соку ми верамы кылъёсты, кудъёссэ мон кутсконаз ик верай: «Ми дась!»

 Ми Дублинэ лыктӥмы но пыримы одӥг сузэр доры, кудзэ ваньмыз «Ратленд меми» шуыса нимало вал. Со трос аръёс ӵоже Иеговалы ужаз-тыршиз но котьку шумпотыса ас дораз пионеръёсты пыртэ вал. Куд-ог арбериосмес вузаса, ми ньыль ӵошен Боблэн коляскаен мотоциклаз пуксимы но машина утчаны кошкимы. Нош тупасьсэ шедьтэм бере куримы, сое ми доры кузёез ачиз мед ваёз шуыса, малы ке шуоно нокудмылэн но машина нуллэммы уг луы вал. Ӝытбыт Артур пукиз, син азяз пуктыса, кызьы со машинаен ветлэ. Ӵукнаяз, куке Артур машинаез гаражысь поттыны турттэ вал, ми доры лыктӥз Милдред Уиллетт (миссионер, кудӥз бератаз Джон Баррлы бызиз). Со машина нуллыны быгатэ вылэм! Милдред Артурез но дышетӥз. Табере ми сюрес вылэ потыны дась вал.

Милемлы улон инты шедьтоно вал. Ми корка утчамы, малы ке шуоно милемлы веразы, урод адямиос фургонэ тыл поныны быгатозы шуыса. Но ми номыр ӧм шедьтэ, соин ик со уе ньыль ӵошен машинаын кӧлоно луимы. Мукетаз нуналэ ми шедьтӥмы ас киын лэсьтэм пичи фургон, кудаз улыно-вылыно изён интыез вал. Со милемлы улон корка луиз. Паймымон, но лякыт сямо фермеръёс фургонмес асьсэлэн музъем вылазы келляны лэзизы! Ӟеч иворез ми вераськомы вал коркамылэсь 15—25 иськем кемын улӥсь адямиослы. Собере мукет интые кошкиськомы но ӟеч иворез вераськомы вал отын, кытчы талэсь азьло фургонмес келлямы вал.

Ми капчиен ортчимы Ирландилэн лымшор но шундыӝужанпал вискысьтыз вань коркаосты но 20 000 тросгес брошюра вӧлмытӥмы. Зэмлыкен тунсыкъяськись адямиослэсь нимъёссэс ми ивортӥмы Великобританиысь филиалэ. Макем шумпотоно тодыны, туннэ отын трос сю Иеговалэн Адӟись-Ивортӥсьёсыз уло шуыса!

Кӧня ке улыса, милемыз Лондонлэн лымшор палаз ыстӥзы. Нош кӧня ке арня ортчем бере Артурлы англи филиалысь вын-агай жингыртӥз. Со куриз сое ӵуказеысен ик кутскыны ёросэз чаклась луыса ужаны-тыршыны! Арня ӵоже дышетскеммы бере ми Шотландие мынӥмы. Артурлэн туж ӧжыт дырыз вал речьёсты дасяны. Но мыным туж кельше вал, со дась шуыса Иеговалы ужан-тыршонын котькыӵе уж борды басьтӥськыны, кыӵе гинэ секыт со медаз луы. Выль ужмы милемлы туж кельшиз. Трос аръёс ӵоже ми огдырлы сётэм территориын ӟеч иворез верамы. Нош табере ми котырын сомында вын-агайёс но сузэр-апайёс! Со зэмзэ ик туж бадӟым бакель карон вал.

1962-тӥ арын Артурез дас толэзь ӵоже Галаад школаын дышетскыны ӧтизы. Сыӵе ужпум кутыны милемлы капчи ӧй вал. Туж кемалы люкиськоно вал ке но, ми малпамы, Артурлы отын одно ик дышетсконо шуыса, малы ке шуоно со туж бадӟым дан. Мон «эштэк» кыли бере, монэ ыстӥзы вордскем Хемсуэрт карам нимысьтыз пионер луыса ужаны-тыршыны. Ар ортчыса Артур бертӥз, но сое улосэз чаклась каризы. Ми ужамы-тыршимы Шотландиын, Англилэн уйшор палаз но Уйшор Ирландиын.

1964-тӥ арын Артурез Ирландиысь филиаллэсь ужзэ радъясь каризы. Милемлы туж кельше вал азьвыл ужмы, соин ик нырысь мон туж сюлмаськи.  Нош табере мон туж шумпотӥсько, милям Вефильын ужаны-тыршыны луонлыкмы вал шуыса! Мон валай: тон соглаш луиськод ке Иеговалэсь выль ужзэ быдэстыны, со тыныд туж уг кельшы ке но, Иегова одно ик бакель кароз. Мон офисын ужай, публикациосты келяны дасяй, сиён пӧрай но утялски. Куддыръя ми быдэс шаерысь кенешъёстӥ ветлӥмы, вын-агайёсты но сузэр-апайёсты буйгатон понна. Озьы ик туж шумпотоно вал адӟыны, кызьы зэмлыкын юн сылыны кутско соос, кинъёслы ми Библиез дышетыны юрттӥмы. Ваньмыз со юрттӥз Ирландиысь Иеговалэн ужась-тыршисьёсыныз кусыпъёсмес юнматыны. Макем бадӟым бакель карон со!

1965-тӥ арын Дублинын калыккуспо конгресс ортчиз. Со вал нырысетӥез калыккуспо конгресс, кудзэ ортчытӥзы Ирландиын b. Туж юн пумитъяськонъёс вал ке но, конгресс туж умой ортчиз. Отчы лыктӥз 3 948 адями, 65 соос пӧлысь пылатӥськиз. Ваньзы, кинъёс ас доразы пыртӥзы мукет шаерысь лыктэм 3 500 вын-агайёсты но сузэр-апайёсты, тау карон гожтэтъёс басьтӥзы. Куно карись христианъёслы туж кельшиз со, кызьы асьсэды возизы соослэн кунооссы. Ирландия понна со зэмзэ но туж кулэ луись вакыт вал.

1966-тӥ арын ужпум кутэмын вал, Ирландия шормуӵлэн уй палаз но лымшор палаз ортчытӥськись тодытон ужен Дублинысь филиал кивалтоз шуыса. Сыӵе огкылысь улон туж висъяськиз солэсь, макем тупатэк улӥзы быдэс шормуӵын адямиос политика но религия пумысен. Туж шумпотоно вал адӟыны, кызьы тросэз католикъёс Иеговалэн Адӟись-Ивортӥсьёсыз луо но ӵош ужало-тыршо вын-агайёсын, кудъёсыз азьло протестантъёс вал.

2011-тӥ арын милям улонмы быдэсак воштӥськиз. Ужпум кутэмын вал Англиысь но Ирландиысь филиалъёсты огазеяны, соин ик милемыз Лондонысь Вефиле ыстӥзы. Ми со сярысь тодӥмы ӵапак соку, куке мон туж сюлмаськыны кутски Артурлэн тазалыкез пумысен. Солэсь Паркинсонлэсь висёнзэ шедьтӥзы. 2015-тӥ арын 20-тӥ куартолэзе Артур, кудӥз 66 ар ӵоже мынам оскымон кузпалы вал, кулӥз.

Мынам али ке но сюлмы чигиське, но мон ӵемысь туж куректӥсько. Азьло Артур котьку вӧзам вал. Макем мон солэсь мӧзмисько! Но, та выллем шуг-секытъёс пыр потыса, Иеговалы матэгес луиськод. Мон шумпотӥсько, Артурез мукет вын-агайёс но сузэр-апайёс туж ярато вал шуыса. Мыным трос гожтэтъёс гожъяло Ирландиысь, Великобританиысь эшъёсмы, нош озьы ик Огазеяськем Штатъёсысь но. Кылъёс ик уг шедё вераны, макем мон тау карисько со гожтэтъёс понна. Озьы ик мон туж тау карисько, Артурлэн Деннис выныз, солэн Мейвис кышноез но агаелэн Рут но Джуди нылъёсыз мыным туж юртто шуыса.

Монэ юнмато Исаиялэн книгаысьтыз 30:18 кылъёс: «Кузё-Инмар уг дырты тӥледыз жаляны, соин ик Со возиське тӥледыз жалянлэсь; уго Кузё-Инмар шонерлыклэн Инмарез луэ: шудоесь ваньмыз Со вылэ оскиськисьёс!» Монэ туж буйгатэ, Иегова возьма шуыса со дырез, куке со вань шуг-секытъёсмес быдтыны быгатоз но выль дуннеын милемлы тунсыко ужъёс сётоз.

Улонэ шоры учкыса, мон адӟисько, кызьы Иегова Ирландиысь тодытон ужен кивалтэ но сое бакель каре! Мон туж шумпотӥсько, мыным та шаерын ӟеч иворез вераны шуд усиз шуыса. Мон ас вылам шӧдӥ, Иегова котьку бакель каре шуыса сое, кин солэсь кылзӥське.