ЭСКЕРОН ПОННА СТАТЬЯ 29
Дась-а тӥ бадӟым куректонлы?
«Дась луэ» (МАТФ. 24:44).
150-ТӤ КЫРӞАН Утча Иеговаез, утиськон вылысь
ТА СТАТЬЯЫН a
1. Малы визьмо луоз шимучыръёслы дасяськыны?
ДАСЯСЬКОН улонэз утьыны быгатэ. Кылсярысь, соос, кинъёс шимучырлы азьло ик дасяськизы, асьсэос но утиськозы, мукетъёсызлы но юрттыны быгатозы, дыр. Тани мар та сярысь вераз Европаысь юрттэт сётонъя организация: «Умой дасяськид ке, утиськод».
2. Малы милемлы «бадӟым куректонлы» дась луыны кулэ? (Матфей 24:44).
2 «Бадӟым куректон» шӧдтэк шорысь лыктоз (Матф. 24:21). Бадӟым куректон пӧртэм луоз мукет шимучыръёслэсь, малы ке шуоно ми тодӥськомы, со вуоз шуыса. Ог 2 000 ар талэсь азьло Иисус аслаз дышетскисьёсызлы вераз, со нуналлы дась луоно шуыса. (Лыдӟе Матфейлэсь 24:44.) Ми дасяськимы ке, милемлы капчигес луоз со секыт дыре юн луыны но мукетъёсызлы юрттыны (Лука 21:36).
3. Кызьы юн луон, гажан-жалян но яратон юрттозы милемлы бадӟым куректонлы дасяськыны?
3 Ойдолэ эскеромы куинь сямъёсты, кудъёсыз юрттозы милемлы бадӟым куректонлы дасяськыны. Мар ми каромы, куке судъян иворез верано луоз, нош оскисьтэм адямиос милемлы пумитъяськозы? (Усьт. 16:21). Милемлы юн луыны кулэ луоз. Соку ми быгатомы Иеговалэсь кылзӥськыны но оскыны, со милемыз утёз шуыса. Нош мар ми каромы, агайёсмы улэм-вылэмзэс ыштӥзы ке? (Авв. 3:17, 18). Соослы юрттон понна, милемлы кулэ гажась-жалясь луыны. Кызьы ми асьмеды возёмы, куке калыкъёслэн огазеяськонзы ми вылэ урдскоз но милемлы кыӵе ке дыр ӵоже мукет агайёсын но сузэръёсын ӵош пичи интыын ватскыса улоно луоз? (Иез. ). Со секыт дырез чидан понна, милемлы соосты юн яратоно луоз. 38:10—12
4. Кызьы Библия валэктэ, милемлы юн луонмес, гажан-жалянмес но яратонмес возьматоно шуыса?
4 Инмарлэн Кылыз милесьтым мылкыдмес ӝутэ юн, гажась-жалясь но яратӥсь луыны. Лукалэсь 21:19 гожтэмын: «Чидан [«юн луон», ВД] пыр лулъёстэс утелэ». Колоссыослы 3:12 мылкыдмес ӝутэ: «Дӥсяське-шобырске гажась-жалясь... луонлэн дӥськутэныз». Нош 1 Фессалоникаослы 4:9, 10 верамын: «Ачиз Инмар ог-огдэс яратыны дышетӥз. [...] Агай-вынъёсмы, тӥледыз эшшо но золгес яратыса улыны куриськомы». Вань та кылъёс гожтэмын вал христианъёслы, кудъёсыз юн луэмзэс, гажан-жалянзэс но яратонзэс возьмато вал ини. Озьы ке но соослы азьланяз но та сямъёссэс возьматоно вал. Озьы ик кароно милемлы но. Мар милемлы юрттоз? Ойдолэ эскеромы, кызьы нырысетӥ даурысь христианъёс та сямъёссэс возьматъязы. Собере вераськомы, кызьы со вын-агайёслэсь но сузэр-апайёслэсь адӟем карыны быгатомы. Та юрттоз милемлы валаны, дась-а ми бадӟым куректонлы.
ЮНЭСЬ ЛУЭ
5. Мар юрттӥз нырысетӥ христианъёслы шуг-секытъёссы дыръя юн луыны?
5 Нырысетӥ христианъёслы юнэсь луоно вал (Евр. 10:36). Соос пумиськылӥзы трос шуг-секытъёсын, кудъёсыныз со дыре улӥсь адямиос пумиськылӥзы. Со сяна, соосты уйылӥзы-уллязы иудей религиозной кивалтӥсьёс яке рим кивалтӥсьёс, озьы ик ӵыжы-выжыоссы но (Матф. 10:21). Нош куддыръя кенеш пушкын соослы нюръяськоно вал зэмос йыбырттонлэсь палэнскемъёсын но соослэн дышетонъёсынызы, кудъёсыз сэрен люкиськылонъёс кылдӥзы (Ап. уж. 20:29, 30). Озьы ке но со христианъёс юнэсь вал (Усьт. 2:3). Мар соослы юрттӥз? Соос малпаськизы Иов кадь адямиос сярысь, кудъёсыз сярысь Библиын гожтэмын (Иак. 5:10, 11). Озьы ик соос кужым курыса вӧсяськизы (Ап. уж. 4:29—31). Со сяна, со христианъёс тодазы возизы, Иегова соосты юн луэмзы понна бакель кароз шуыса (Ап. уж. 5:41).
6. Кызьы Мериталэн учырез юрттоз тӥледлы пумитъяськонъёсты чиданы?
6 Ми но быгатомы юн луыны, малпаськимы ке адямиос сярысь, кудъёсыз юнэсь вал. Соос сярысь гожтэмын Библиын но публикациосамы. Ӵапак та юрттӥз Албаниысь Мери́та сузэрлы семьяезлэсь пумитъяськемзэ чиданы. Со вера: «Монэ туж паймытӥз Иовлэн примерез. Малы курадӟемзэ со ӧз тоды ке но, солэн юн мылкыдыз вал ваньзэ чиданы но кулытозяз оскымон кыльыны. Мон малпай, мынэсьтым курадӟонъёсме Иовлэн шуг-секытъёсыныз ӵошатыны ик уг луы шуыса, малы ке шуоно мон тодӥсько, кин янгыш мынам курадӟонъёсы понна» (Иов 27:5).
7. Мар карыны дышетсконо али ик ини, милям бадӟымесь шуг-секытъёсмы ӧвӧл ке но?
7 Озьы ик ми быгатомы эшшо но юнэсь луыны, Иеговалы ӵем вӧсяськимы ке но солы вань шуг-секытъёсмы сярысь верамы ке (Флп. 4:6; 1 Фес. 5:17). Оло нош, али тӥляд бадӟымесь шуг-секытъёсты ӧвӧл. Но юалэ асьтэлэсь: «Утчасько-а мон Иеговалэсь юрттэтсэ, куке мылкыды куашкамын яке мар карыны уг тодӥськы?» Тӥ дышемын ке котьку Инмарлы вӧсяськыны, бадӟым шуг-секытъёс дыръя но тӥледлы капчи луоз солэсь юрттэт курыны. Юн оске: со умой тодэ, ку но кызьы тӥледлы юрттоно (Пс. 26:1, 3).
ЮН ЛУОН
Секыт дыре юн луимы ке, ми дась луомы вуоно шуг-секытъёслы (Учке 8-тӥ абзацез.)
8. Кызьы Миралэн учырез возьматэ, али юн луэммы вуоно шуг-секытъёс дыръя но юрттоз шуыса? (Иаков 1:2—4). (Озьы ик учке суредэз.)
8 Ми али ик ини шуг-секытъёс дыръя юн луимы ке, соку бадӟым куректон дыръя но ваньзэ чиданы быгатомы, дыр (Рим. 5:3). Малы озьы вераны луоз? Тросэз вын-агайёс валазы: куке соос кыӵе ке шуг-секыт дыръя юн кылизы, мукет шуг-секытъёсты чиданы капчигес вал ини. Та соослэсь осконзэс юнматӥз, Иегова соосын артэ но соослы юрттыны дась шуыса. Нош оскон юрттӥз соослы вуоно шуг-секытъёс дыръя но юнэсь луыны. (Лыдӟе Иаковлэсь 1:2—4.) Албаниысь Ми́ра сузэр, кудӥз пионер луыса ужа-тырше, вера, шуг-секытъёс пыр потыса, со юнгес луиз шуыса. Куддыръя солы потэ, солэн гинэ сомында шуг-секытъёсыз шуыса. Но куке со тодаз вае, кызьы юрттӥз солы Иегова берло 20 аръёс ӵоже, со аслыз вера: «Эн сётскы! Эн вунэты ваньзэ сое, мар Иегова тыныд лэсьтӥз. Тодад возь, кӧня шуг-секытъёсты тон вормид ини Иеговалэн юрттэменыз». Тӥ но быгатоды тодады вайыны, кызьы Иегова тӥледлы юрттӥз шуг-секытъёстэс чиданы. Соку бадӟым куректон кутскыку, тӥледлы капчигес луоз шуг-секытъёстэс чиданы но мылкыдды луоз азьланяз но юн луыны. Юн оске: Иегова адӟе котькыӵе шуг-секытэз, кудӥныз тӥ пумиськиськоды, но юн луэмды понна со тӥледыз одно ик бакель кароз (Матф. 5:10—12).
ГАЖАН-ЖАЛЯНДЭС ВОЗЬМАТЭ
9. Кызьы Сирияысь Антиохияын улӥсь христианъёс гажан-жалянзэс возьматӥзы?
9 Эскеромы, мар луиз, куке Иудеяын «секыт сютэм ар» кутскиз. Куке Сирияысь Антиохияын улӥсь христианъёс та сярысь кылӥзы, соос Иудеяысь вын-агайёссэс гажазы-жалязы. Но таӵе шӧдонъёссы кылдэм сяна, та христианъёс гажан-жалянзэс уж вылын возьматӥзы. Соос «котькудӥз аслаз луонлыкезъя Иудеяын улӥсь агай-вынъёссылы юрттэт ыстыны мылкыд каризы» (Ап. уж. 11:27—30). Иудея кыдёкын интыяськемын вал ке но, Антиохияысь христианъёслэн туж потэ вал вын-агайёссылы юрттэмзы (1 Иоанн 3:17, 18).
ГАЖАН-ЖАЛЯН
Шимучыр дыръя ми быгатӥськомы гажан-жалянмес возьматыны (Учке 10-тӥ абзацез.)
10. Кызьы ми быгатӥськомы гажан-жалянмес возьматыны агайёслы но сузэръёслы, кудъёсыз кыӵе ке шимучырен пумиськизы? (Озьы ик учке суредэз.)
10 Туннэ но ми быгатӥськомы гажан-жалянмес возьматыны огъя оскисьёсмылы, кудъёсыз кыӵе ке шимучырен пумиськизы. Ми соку ик соослы юрттыны тыршиськомы. Кылсярысь, юрттыны дась луэммы сярысь тӧроослы вераськомы, дунневыл ужлы ас мылкыд кареммыя коньдонмес сётӥськомы яке шимучырен пумиськемъёс понна вӧсяськиськомы (Мад. 17:17) b. COVID-19 пандемия сэрен секыт югдуре сюремъёс сярысь сюлмаськон понна, 2020-тӥ арын быдэс дунне вылын кылдытэмын вал юрттэт сётонъя 950-лэсь тросгес комитетъёс. Ми туж тау кариськомы агайёслы но сузэръёслы, кудъёсыз та комитетъёсын ӵош ужазы. Огъя оскисьёссэс гажам-жаляменызы, соос соослы гуманитарной юрттэт сётъяло, юн осконэн улыны юртто, нош куддыръя коркаосты но Эксэйлык юртъёсты тупатъяло. (Ӵошатэ 2 Коринфъёслы 8:1—4.)
11. Кызьы ӟеч ужъёсмы инмысь Атаймес данъяло?
11 Шимучыре сюремъёслы юрттэммес мукетъёсыз но адӟо. Кылсярысь, 2019-тӥ арын «До́риан» кужмо сильтӧл Багам шормуӵъёсысь Эксэйлык юртмес куашкатӥз. Куке агайёсмы та юртэз тупатъязы, соос Адӟись-Ивортӥсь луисьтэм ужасьёслэсь юазы, кӧня коньдон ужамзы понна басьтозы. Соослэн кузёзы вераз: «Ужан тӥрлыкъёс, ужасьёс но материалъёс понна мон нокӧня но коньдон уг басьты. Мынам тӥляд организацидылы маин ке но юрттэме потэ. Монэ туж паймытӥз, кызьы тӥ ог-огды сярысь сюлмаськиськоды». Та дуннеысь тросэз адямиос Иеговаез уг тодо. Но соос пӧлысь тросэз адӟо Иеговалэн Адӟись-Ивортӥсьёсызлэсь ужъёссэс. Ми туж шумпотӥськомы, куке, ӟеч ужъёсмес адӟыса, адямиослэн тросгес тодэмзы потэ Инмар сярысь, кудӥз «быдӟым яратонзэ» возьматэ! (Еф. 2:4).
12. Малы туннэ ик ини дышетсконо гажан-жалянмес возьматыны? (Усьтӥськон 13:16, 17).
12 Малы милемлы гажан-жалянмес возьматыны кулэ луоз бадӟым куректон дыръя? Библия верамъя, соослэн, кинъёс та дуннеысь кивалтӥсьёс пала уг карисько, шуг-секытъёссы луозы асьме дыре но, озьы ик бадӟым куректон дыръя но. (Лыдӟе Усьтӥськонэз 13:16, 17.) Оло нош, агайёс но сузэръёс, ӟудыса улозы. Ӝоген Иисус Христос Эксэймы адямиосты судъяны лыктоз. Милям потэ, агайёсты но сузэръёсты гажам-жаляммес Иисус мед адӟоз шуыса! Соку со милемлы шуоз: «Басьтэлэ... Эксэйлыкез» (Матф. 25:34—40).
ЯРАТОНДЭС ВОЗЬМАТЭ
13. Кызьы Павеллэн визь-кенешез, кудӥз гожтэмын Римъёслы 15:7, нырысетӥ христианъёслы юрттӥз ог-огзэс эшшо но золгес яратыны?
13 Нырысетӥ христианъёсты ог-огзэс яратэмзыя тодмало вал. Но капчи-а вал соослы та сямзэс возьматыны? Кылсярысь, басьтомы Римысь христиан кенешез. Отчы пыро вал пӧртэм адямиос. Отын вал еврейёс но, кудъёсыз Моисей законъя улыны дышетэмын вал, озьы ик мукет калыкысь адямиос но, кудъёсыз мукет сямен будэтэмын вал. Христианъёс пӧлын вал, дыр, ляльчиос, огшоры адямиос, озьы ик ляльчиослэн кузёоссы но. Ваньзы соос туж пӧртэмесь вал ке но, кызьы соос ог-огзэс яратыны быгатӥзы? Апостол Павел соослэсь мылкыдзэс ӝутӥз: «Огдэс огды кабыл басьтэ». (Лыдӟе Римъёслы 15:7.) Мае та возьматэ? Кыл, кудӥз берыктэмын «кабыл басьтэ», возьматэ «кинэ ке ас дорад шуныт пумитамез» яке «кинэн ке эшъяськемез». Кылсярысь, Павел Филимонлэсь мылкыдзэ ӝутӥз Онисим нимо пегась ляльчизэ шуныт пумитаны (Флм. 17). Нош Прискилла но Акила ас доразы Аполлосэз ӧтизы. Та кузпалъёсын ӵошатыса, со христиан улон сярысь ӧжытгес тодӥз (Ап. уж. 18:26). Пӧртэмлыкъёс шоры учкытэк, нырысетӥ христианъёс тыршизы огкылысь улыны но ог-огзэс шуныт пумитаны.
ЯРАТОН
Милемлы вань агайёсмес но сузэръёсмес яратоно (Учке 15-тӥ абзацез.)
14. Кызьы кузпалъёс, кудъёсыз миссионеръёс луыса ужало-тыршо, яратонзэс уж вылын возьматӥзы?
14 Ми но быгатӥськомы агайёсмылы но сузэръёсмылы яратонмес возьматыны но соосын эшъяськыны. Собере соос но милемлы сюлэмъёссэс усьтозы, дыр (2 Кор. 6:11—13). Тани Анналэн учырез. Сое картэныз ӵош Шундыпуксёнпал Африкае миссионеръёс луыса ужаны-тыршыны ыстӥзы. Но ӝоген COVID-19 пандемия кутскиз. Соин ик соос ӧз быгатэ выль кенешысьтызы агайёсын но сузэръёсын пумиськылыны. Кызьы та кузпалъёс соослы яратонзэс возьматӥзы? Соос огъя оскисьёссылы интернет пыр жингыртылӥзы но соосын видео пыр вераськылӥзы. Соос вераллязы, соосын матэгес тодматскемзы потэ шуыса. Тросэз семьяос та миссионеръёслы яратэмзэс возьматэмзы понна туж тау каризы. Собере соослэн но мылкыдзы ӝутскиз та кузпалъёслы жингыртылыны но сообщениос келяны. Малы та миссионеръёс туж тыршизы выль кенешенызы эшъяськыны? Анна вера: «Мон ноку уг вунэты, кызьы агайёс но сузэръёс семьяелы яратонзэс возьматъязы — куректон дыръя но, шумпотон дыръя но. Соин ик мынам но потэ сыӵе ик яратонме возьматэме».
15. Кызьы Ванессалэн учырез дышетэ тӥледыз вань агайёсты но сузэръёсты яратыны? (Озьы ик учке суредэз.)
15 Кенеше ветло пӧртэм калыкъёсысь но пӧртэм сямо вын-агайёс но сузэр-апайёс. Туж кулэ соослэн умой сямъёссылы саклык висъяны. Соку ми соосты эшшо но золгес яратомы. Ване́сса сузэрлы, кудӥз Выль Зеландиын ужа-тырше, секыт вал кенешысьтыз куд-ог агайёсын но сузэръёсын тупаса улыны. Соослэсь палэнскем интые, со ужпум кутӥз соосын тросгес дырзэ ортчытъяны. Та юрттӥз солы адӟыны, мар понна Иегова соосты яратэ. Со вера: «Куке картэ ёросэз чаклась луиз, ми дырмес ортчытъяны кутскимы эшшо но тросгес адямиосын, кудъёсызлэн пӧртэм сямъёссы вал. Но та мыным секыт ӧй вал ини. Пӧртэмлыкез мон яратыны кутски. Адӟиське, Иеговалы но со кельше шуыса, малы ке шуоно со пӧртэм адямиосты ас дораз ӧтиз». Куке ми тыршиськомы адямиос шоры Иеговалэн синмыныз учкыны, ми соослы яратэммес возьматӥськомы (2 Кор. 8:24).
Иегова утёз милемыз бадӟым куректон дыръя, ми агайёсынымы но сузэръёсынымы ӵош луимы ке (Учке 16-тӥ абзацез.)
16. Малы туж кулэ луоз яратонмес возьматыны бадӟым куректон дыръя? (Озьы ик учке суредэз.)
16 Яратонмес возьматыны тужгес но кулэ луоз бадӟым куректон дыръя. Кызьы Иегова милемыз утёз, со кутскыку? Тани мар карыны кулэ вал Инмарлэн ужась-тыршисьёсыз, куке мидян но перс ожгарчиос вашкала Вавилон вылэ урдскизы: «Калыке, мын, шутэтскон интыосад пыр но ас бӧрсяд ӧсъёстэ ворса, огдырлы, вожпоттон дыр ортчытозьлы, ватӥськы» (Ис. 26:20). Та кылъёсты герӟаны луэ, дыр, милемын но, бадӟым куректон азьын улӥсьёсын. «Шутэтскон интыос» возьматыны быгато кенешъёсмес. Иегова милемыз утёз бадӟым куректон дыръя, ми агайёсынымы но сузэръёсынымы ӵош луимы ке. Соин ик агайёсты но сузэръёсты чидаса улэм интые, милемлы али ик ини дышетсконо соосты яратыны. Таин герӟаськемын милям улонмы!
АЛИ ИК ДАСЯСЬКЕ
17. Мар карыны ми быгатомы бадӟым куректон дыръя, солы али ик ини дасяськимы ке?
17 «Кузё-Инмарлэн быдӟым нуналыз» дыръя вань адямиослы секыт луоз (Соф. 1:14, 15). Иеговалэн ужась-тыршисьёсызлы но капчи уз луы. Ми та нуналлы али ик ини дасяськимы ке, быгатомы каньыл сюлмын улыны но мукетъёслы юрттыны. Кыӵе гинэ шуг-секытъёсын ми медам пумиське, ми быгатомы юн сылыны. Агайёсмы но сузэръёсмы кыӵе ке но шимучырен пумиськизы ке, ми тыршомы соослы гажан-жалянмес возьматыны но соос сярысь сюлмаськыны. Нош огъя оскисьёсмылы али ик ини яратонмес возьматыны дышетскыса, ми быгатомы соослы азьланяз но яратонмес возьматыны. Соку Иегова кузьмалоз милемлы пырак улон, кытын шимучыръёс но куректонъёс уз луэ ини (Ис. 65:17).
144-ТӤ КЫРӞАН Учкы осконэн!
a Бадӟым куректон туж ӝог матэктэ. Солы дась луон понна, милемлы кулэ юн луон, гажан-жалян но яратон. Ойдолэ эскеромы, кызьы та сямъёс нырысетӥ даурысь христианъёслы юрттӥзы, кызьы соос туннэ милемлы юртто но кызьы соос юрттозы бадӟым куректонлы дасяськыны.
b Тӥляд потэ ке юрттэт сётонъя ужъёсы пыриськемды, гожтэ «Заявление на служение добровольцем в программе местного проектно-строительного отдела» (DC-50) яке «Заявление на добровольное служение» (A-19) но возьмалэ, ку тӥледыз ӧтёзы.