Иисус дышетскисьёссэ дышетӥз адямиосын тупаса улыны. Но огпол дышетскисьёсызлы со вераз: «Эн малпалэ, музъем вылэ тупаса улон вайыны Мон лыктӥ шуыса; тупаса улон вайыны ӧй лыкты, палаш вайыса лыктӥ, Мон лыктӥ уго адямиез атаезлэсь, нылзэ анаезлэсь, кензэ анайзылэсь люкыны» (Матф. 10:34, 35). Малы Иисус та кылъёсты вераз?

Иисуслэн уг поты вал, семьяос керетыса мед улозы шуыса. Но со валаз, дышетонъёсыз сэрен куд-ог семьяосын кусыпъёссы сӧриськозы шуыса. Соин ик, кин ке но ужпум кутӥз ке Христослэн дышетскисез луыны но пылатӥськыны, со валаны кулэ, кыӵе бервылъёсы вуттыны быгатэ та ужпум. Куддыръя кузпал яке мукет ӵыжы-выжыос пумитъясько. Соин сэрен Христослэн дышетонъёсызъя улыны секыт луэ.

Библия ӧте милемыз: «Вань адямиосын тупаса улэ» (Рим. 12:18). Нош малы Христослэн дышетонъёсыз куд-ог семьяосты люко? Со озьы луэ, куке кин ке но ужпум кутэ Иисуслэсь кылзӥськыса улыны, нош ӵыжы-выжыосыз соин соглаш уг карисько яке пумитъяськыны но кутско. Соку адямилы, кудӥз Библиез дышетэ, ӵыжы-выжыосыз «тушмонъёс» луо (Матф. 10:36).

Куд-ог христианъёслэн ӵыжы-выжыоссы Иеговалы уг оско. Соин ик куддыръя кылдо учыръёс, куке эскериське, макем зол соос ярато Иеговаез но Иисусэз. Кылсярысь, ӵыжы-выжыос косыны быгато соосын ӵош кыӵе ке праздникез пусйыны. Соку христиан муртлы быръёно, кинэ солэн шумпоттэмез потэ. Иисус вераз: «Кин атайзэ яке анайзэ, Монэ сярысь, тросгес яратэ, со Мыным ярамон ӧвӧл» (Матф. 10:37). Та кылъёсын Иисус ӧз вера, табере солэн дышетскисьёсыз анай-атайёссэс ӧжытгес яратозы шуыса. Иисуслэн валэктэмез потэ вал, мар улонын тужгес но валтӥсез луэ. Ӵыжы-выжыосмы Иеговалы ужаны-тыршыны люкето ке но, ми соосты яратэмысь ум дугдӥське. Но Инмарез ми золгес яратӥськомы.

Куке ӵыжы-выжыосмы люкето милемлы Иеговалы ужаны-тыршыны, милемлы вӧсь луэ. Но Христослэн дышетскисьёсыз тодазы возё солэсь кылъёссэ: «Мон сьӧры мынӥсьтэм мурт Мыным ярамон ӧвӧл» (Матф. 10:38). Христианъёс валало, Христос сьӧры мыныса, соос шуг-секытъёсын пумиськозы шуыса. Кылсярысь, соослы семьязы пумитъяськыны быгатэ. Озьы ке но соос оско, умой ужъёссэс адӟыса, ӵыжы-выжыоссылэн сюлэмзы небӟоз но соослэн Иегова сярысь тросгес тодыны мылкыдзы ӝутскоз шуыса (1 Пётр 3:1, 2).